Հրանտ Բագրատյանն ու Կարինե Աճեմյանը՝ մարզային հանդիպումներից ունեցած տպավորությունների մասին

Մի քանի օր է՝ եթեր է հեռարձակվում «Այո և ոչ» հեռուստանախագիծը, որի շրջանակներում հասարակական և քաղաքական գործիչները Հայաստանի մարզերում իրականացնում են քարոզչություն՝ սահմանադրական փոփոխությունների հանրաքվեի հետ կապված:

Past.am-ի հետ զրույցում թե՛ «այո»-ի,թե՛ «ոչ»-ի թևի ներկայացուցիչները խոսել են հանդիումներից ստացված տպավորությունների մասին:

Նախկին վարչապետ, ՀԱԿ խմբակցության պատգամավոր Հրանտ Բագրատյանն ասաց. «Սահմանադրական փոփոխությունների հանդեպ ժողովուրդն ունի հետաքրքրվածություն, այլ հարց է, որ մարդիկ լավատեղյակ չեն, քանի որ տեքստ ժողովրդին չի բաժանվել: Նրանք միանգամից անցնում են «ոչ»-ի ճամբար, երբ նրանց հետ խոսում ես և բացատրում»:

ՀՀԿ խմբակցության պատգամավոր Կարինե Աճեմյանի խոսքով՝ ժողովրդի հարցերը կապված են և՛ սահմանադրական փոփոխությունների, և՛ իրենց սոցիալական խնդիրների հետ:

«Ինչ վերաբերում է սահմանադրական բարեփոխումների նախագծին, կարծում եմ, որ շատ մարդիկ հետաքրքրված են: Մենք բաժանում ենք թղթեր, բուկլետներ, քանի որ շատերն ուզում են կարդալ նոր նախագիծը, սակայն չունեն ինտերնետի և այլ հնարավորություն: Հետաքրքրությունը մեծանում է, իրազեկման մակարդակն աճում է: Մեր նպատակն այն է, որ անտարբեր մարդ չմնա: Քանի որ ես «այո»-ի քարոզիչ եմ, փորձում ենք այնպես անել, որ մեր մտադրություններն ու նպատակները տեղ հասնեն»,-նշեց մեր զրուցակիցը:

Կարինե Աճեմյանն ընդգծեց, որ այս հանդիպումներից շատ մեծ տեղեկատվություն է հավաքում, որը կօգտագործի իր հետագա աշխատանքում:

Ըստ պատգամավորի՝ ինքն այդ հանդիպումներից հարստանում և էներգիա է ստանում: Մեր հարցին՝ գերակշիռ մասը «ոչ»-ի՞, թե՞ «այո»-ի կողմնակից են, Աճեմյանը պատասխանեց. «Մենք այդ հարցը ժողովրդին չենք տալիս, այլ լսում ենք մարդկանց մտահոգությունները: Ես կարծում եմ՝ դրական տրամադրված մարդիկ ավելի շատ են, պարզապես ավելի քիչ են խոսում, խնդիրներ ունեցողներն ավելի շատ են խոսում»:

Լևոն Փանոսյան