Իսկապե՞ս Լոնդոնն աշխարհի ամենաանձրևային մայրաքաղաքն է. պարզվում է՝ ոչ

Մենք գիտենք, որ...

Անգլիան անձրևային ու ցուրտ երկիր է՝ մանավանդ Եվրոպական այլ երկրների հետ համեմատած, իսկ Լոնդոնը ամենաանձրևային մայրաքաղաքն է։

Իրականում այդպես չէ։

Բանն այն է, որ, օրինակ՝ Լոնդոնում տարեկան տեղումները կազմում են 500 միլիմետր, իսկ, ասենք, Հռոմում՝ 760 միլիմետր, Միլանում՝ 1000 միլիմետր, Գենուայում՝ 1100 միլիմետր։ Ուղղակի նույն Իտալիայում անձևները, որպես կանոն, հորդառատ են, բայց քիչ հաճախականությամբ ու տևողությամբ, իսկ Անգլիայում դրանք մարմանդ են, բայց երկարատև՝ ամբողջ տարվա ընթացքում։ Սա ուղղակի ընդունված կարծրատիպ է, որ Բրիտանիայում անձրևոտ է, ցուրտ և խոնավ։ Իրականում այնտեղ շատ ավելի տաք է, քան նույն հորիզոնականում գտնվող շատ այլ եվրոպական երկրներում, և դրա պատճառը հրաշագործ տաք Գոլֆստրիմ հոսանքն է, որի մասին գիտեն բոլորը։ Իհարկե, երկրի հյուսիսային մասը ավելի ցուրտ է, քան հարավայինը, բայց իրականում Բրիտանիայում ամեն տեղ գերակշռում են հյուսիսային և հյուսիս-արևել յան քամիները։ Արդյունքում մոտավորապես տարվա կեսը այնտեղ լինում են մառախլապատ օրեր։ Իհարկե, տեղումները հավասարաչափ չեն ամբողջ տարածքով, օրինակ Շոտլանդիայի բարձրադիր գոտիներում լինում են մոտավորապես տարեկան 3 000 միլիմետր տեղումներ, իսկ Քեմբրիջում՝ 500 միլիմետր, ընդ որում, միջինը լինում է ընդամենը 100 անձրևային օր։ Բրիտանիայում անգամ թևավոր խոսք կա. դուր չի գալիս եղանակը՝ ընդամենը սպասիր հինգ րոպե, և այն կփոխվի։ Իրականում Բրիտանիայում իրոք մառախլապատ օրերը շատ են։ Բայց մառախուղը անձրև չէ։ Ինչպես նշել ենք, տարվա համարյա կեսը մառախուղ է, և դրա պատճառը մթնոլորտային ցածր ճնշումն է։ Ավելի անկեղծ լինելու համար պետք է արձանագրենք, որ Անգլիայում անձրևային է միայն որոշակի շրջան՝ սեպտեմբերից հունվար, իսկ մնացած ժամանակ և հատկապես ամռանը շատ տաք եղանակ է լինում։ Այն, որ Բրիտանիայում խոնավ է, ճիշտ է։ Բանն այն է, որ ցանկացած դեպքում սա կղզի է՝ շրջապատված օվկիանոսով, որը ևս իր հերթին նպաստում է բարձր խոնավությանը։ Ընդունված է, որ Բրիտանիան խստաշունչ է, այլ կերպ նրան կոչում են «մառախլապատ Ալբիոն»։ Այնուամենայնիվ, իր այս մառախլապատ եղանակով հանդերձ Բրիտանիայում առկա են բավականին բերրի հողեր և բնական հարստություններ։ Արդյունքում ստացվել է բավականին հարմոնիկ երկիր իր զարգացած գյուղատնտեսությամբ և արդյունաբերությամբ, մշակույթով , պատմությամբ և զարմանալի ժառանգությամբ։

Բրիտանիան կարողացել է դառնալ աշխարհի առաջատար երկրներից մեկը։ Բրիտանիա այցելող զբոսաշրջիկին պետք չէ անձրևային եղանակից վախենալ ։ Բանն այն է, որ այնտեղ էլ է այն ժամանակ եղանակը անձրևային, երբ անձրևային է եղանակը, օրինակ՝ Երևանում կամ Վանաձորում։

Ի դեպ, Հավայան կղզիներից Քաուայում գտնվող Ուայալեալե լեռը հանդիսանում է ամենաանձրևային վայրը. այնտեղ տարեկան մինչև 350 անձրևային օր է լինում, իսկ տեղումները կազմում են 11 680 միլիմետր:

Ի դեպ, կա մի կարևոր պահ՝ կապված եղանակի հետ։ Բանն այն է, որ բրիտանական օդերևութաբանները տարբերվում են մնացած բոլոր օդերևութաբաններից։ Նրանք չեն կատարում եղանակի կանխատեսումներ մի քանի օրվա համար։ Այնտեղ հիմնականում կանխատեսում են եղանակը մոտակա մի քանի ժամվա, լավագույն դեպքում՝ տվյալ օրվա համար։ Ընդ որում, դա էլ կատարում են իմիջիայլոց, քանզի լավ գիտեն, որ ցանկացած պահ եղանակը կարող է գլխապտույտ արագությամբ փոխվել և չհամապատասխանել կանխատեսմանը։ Բացի այդ, նրանք ապահովագրում են իրենց նրանով, որ ներկայացնում են եղանակի կանխատեսումը ամբողջ երկրի մասշտաբով, նրանց մոտ չկա կանխատեսում ըստ տարածքների։ Այսինքն, ստացվում է, որ բրիտանական օդերևութաբանները երբեք իրենց կանխատեսումներում չեն սխալվում, քանի որ ամբողջ Բրիտանիայում մի տեղ անձրև է, մի այլ տեղ՝ մառախուղ, իսկ մի այլ վայրում՝ պայծառ արև։

Նյութը հրապարակման պատրաստեց Past.am-ը