36 մի­լի­ոն դրամ՝ դա­տա­պար­տյալ­նե­րի գե­ղա­գի­տա­կան դաս­տի­ա­րա­կու­թյան և կրթա­կան ծրագ­րե­րի իրա­կա­նաց­ման հա­մար

ՀՀ արդարադատության նախարարությունը 2019 թվականի ընթացքում հասցրել է արդեն երեք պայմանագիր կնքել «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի հետ: Այս մասին «Փաստը» տեղեկանում է ՀՀ էլեկտրոնային կառավարման համակարգերը համատեղող միասնական կայքից՝ ՊՈԱԿ-ների ֆինանսավորում բաժնից:

Պետությունը դրամաշնորհների տեսքով մոտ 356 միլիոն դրամ է տրամադրում վերը նշված ՊՈԱԿ-ին, որն էլ այս երեք պայմանագրերի շրջանակում պարտավորվում է իրականացնել.

1. արդարադատության համակարգի աշխատակիցների վերապատրաստում և հատուկ ուսուցում (5,223,000 ՀՀ դրամ),

2. իրավախախտում կատարած անձանց գեղագիտական դաստիարակության և կրթական ծրագրերի իրականացում (36,927,400 ՀՀ դրամ),

3. ՀՀ արդարադատության նախարարության հատուկ ծառայողների հատուկ ուսուցման իրականացում (313,464,600 ՀՀ դրամ): Երեք պայմանագրերն էլ ուժի մեջ են մինչև 2019 թվականի ավարտը: Պայմանագրերից մեկի համաձայն՝ 36 մլն 927 հազար 400 դրամ հատկացվել է 2019 թվականի ընթացքում դատապարտյալների գեղագիտական դաստիարակության և կրթական ծրագրերի իրականացման նպատակով: Փորձենք հասկանալ, թե կրթական ինչ ծրագրերի մասին է խոսքը: 

Պայմանագրին կցված միջոցառումների ցանկից պարզ է դառնում, որ իրավախախտում կատարած անձանց գեղագիտական դաստիարակության և կրթական ծրագրի իրականացումը ներառում է հետևյալ դասընթացները՝ դեկորատիվ կիրառական արվեստ, հայոց լեզու և գրականություն, անգլերեն, համակարգչային հմտություններ, բիզնես գրագիտություն: Դասընթացներին պետք է մասնակցի 22 խումբ՝ 110 կալանավորված և դատապարտված անձ (ներառյալ պրոբացիայի շահառուները): Նրանք դասընթացների ընթացքում պետք է ստանան ինչպես տեսական գիտելիքներ, այնպես էլ մասնակցեն գործնական պարապմունքների: Ծրագիրն իրականացվում է արդարադատության նախարարության «Աբովյան» և «Արմավիր» ՔԿՀ-ներում պահվող դատապարտյալների և կալանավորված անձանց համար: Դրա շահառուներին տրամադրվելու են անհրաժեշտ ուսումնաօժանդակ նյութեր՝ կավ, ներկեր, վրձիններ, գրենական պիտույքներ և այլն: Դասընթացների ավարտին մասնակցին տրվելու է հավաստագիր, սակայն այն դեպքում, երբ նա ամենաքիչը երկու կամ ավելի թեմաների շրջանակում մասնակցել է 240 ակադեմիական ժամ տևողությամբ դասընթացներին, իսկ եթե միայն մեկ թեմայի՝ 120 ժամ տևողությամբ դասընթացի, ապա նրան կտրվի մասնակցության վկայագիր:

Հիմա վերը նշված ՊՈԱԿ-ի մասին: Մի քանի տարի առաջ «ՀՀ արդարադատության նախարարության իրավաբանական ինստիտուտ» անունով պետական հիմնարկը վերակազմակերպվել է և դարձել «Իրավական կրթության և վերականգնողական ծրագրերի իրականացման կենտրոն» ՊՈԱԿ, որի տնօրենը 2004 թվականից իրավաբանական գիտությունների թեկնածու Աշոտ Հայրապետյանն է: 

ՊՈԱԿ-ը զբաղվում է ՀՀ քրեակատարողական և դատական ակտերի հարկադիր կատարումն ապահովող ծառայողների վերապատրաստման ու հատուկ ուսուցման դասընթացների կազմակերպմամբ, իրավախախտում կատարած անձանց ուղղման, սոցիալական վերականգնման և վերաինտեգրման ծրագրերի մշակմամբ և իրականացմամբ, դատապարտյալների աշխատանքային զբաղվածության ապահովմամբ և այլն:

ՀՀ էլեկտրոնային կառավարման համակարգերը համատեղող միասնական կայքում բացակայում են 2018 թվականին վերաբերող տվյալները, մասնավորապես՝ իրականացվե՞լ են նման ծրագրեր, թե՞ ոչ:

Օրինակ, կայքում տեղադրված նախորդ տարիների տվյալներից պարզ է դառնում, որ 2017 թվականին այս ՊՈԱԿ-ին 345 մլն 166 հազար 200 դրամ գումար է հատկացվել ՀՀ արդարադատության նախարարության հատուկ ծառայողների վերապատրաստման և հատուկ ուսուցման ծառայություններ իրականացնելու նպատակով՝ 32 միլիոնով ավելի շատ, քան՝ 2019 թվականին: Ի դեպ, ճիշտ նույնքան գումար՝ 345 մլն 166 հազար 200 դրամ, ՊՈԱԿ-ին հատկացվել է նաև 2016 թվականին:

ԼՈՒՍԻՆԵ ԱՌԱՔԵԼՅԱՆ