Դատական համակարգում այնպիսի իրավական գործընթաց չենք սկսի, որ փլուզում լինի, վիրահատությունը միշտ պետք է կտրուկ լինի, բայց արվի նրբորեն. Հ. Աղազարյան

 

Ինչպես մեր հանրապետությունում, այնպես էլ միջազգային հանրության մոտ որևէ կասկած չկա, որ Հայաստանում դատական համակարգը բարեփոխման կարիք ունի, կոռումպացված միավորում է, ինչի դեմ պայքարը պետք է տեղի ունենա միայն ու միայն հեղափոխական վիրահատական ճանապարհով: Tert.am-ի հետ զրույցում նման տեսակետ հայտնեց «Իմ քայլը» խմբակցության պատգամավոր Հովիկ Աղազարյանը:

 

Ըստ նրա՝ դրանով հանդերձ միջազգային կազմակերպությունները, այդ թվում նաև Վենետիկի հանձնաժողովը, եվրոպական կազմակերպությունները այս մի քանի ամիսների ընթացքում ականատես եղան, որ ՀՀ իշխանությունները ոչ մի կերպ չեն ուզում միջամտել դատական համակարգի գործունեությանը՝ դա համարելով բացասական պրակտիկա:  

 

«Եվ այդ կազմակերպությունները, տեսնելով մեր իշխանությունների հետևողական կեցվածքը նաև այս բնագավառում, տեսնելով, որ մենք չենք շեղվում օրինականությունից, պատրաստակամություն են հայտնել օգնելու, և դա շատ էական ու բարձր գնահատական է մեր իշխանություններին»,-ասաց նա:

 

 

Հովիկ Աղազարյանը, պատասխանելով այն հարցին, թե Վենետիկի հանձնաժողովի կողմից աջակցությունն ի՞նչ է ենթադրում, նկատեց, որ դա կարող է լինել առաջին հերթին մասնագիտական, նաև ֆինանսական:

 

«Աջակցությունը կարող է լինել առաջին հերթին մասնագիտական՝ այլ  երկրների փորձը հաշվի առնելով, հաշվի առնելով նաև մեր ազգային առանձնահատկությունները, մեր մոտեցումներին աջակցություն ցուցաբերեն մասնագիտական առումով, և բարեփոխումներն առավել անցնցում և առավել ընդունելի տարբերակով անցկացնելու համար: Չի բացառվում նաև, որ աջակցությունը լինի նաև ֆինանսական»,-ասաց նա:

 

Հիշեցնենք, որ ՀՀ վարչապետ Նիկոլ Փաշինյանը նամակ է ստացել Վենետիկի հանձնաժողովի նախագահ Ջաննի Բուքիքիոյից, որում հանձնաժողովի նախագահը պատրաստակամություն է հայտնել աջակցել Հայաստանում դատաիրավական համակարգի վճռական բարեփոխումներին և վեթինգի իրականացմանը: 

 

Անդրադառնալով մամուլի այն հրապարակումներին, որ ՀՀ կառավարությունը չէր հրապարա­կել նամակը, քանի որ բավականին կոշտ գնահատա­կաններ պարունակող նամակ է ստացել Վե­նետիկի հանձնաժողովից, Աղազարյանը նշեց, որ բացարձակ ոչ մի կոշտ արձագանք չի եղել: «Բոլոր արձագանքները միջազգային կազմակերպությունների կողմից միայն ու միայն եղել են դրական և հետևաբար նաև պատրաստակամություն են հայտնել այդ իսկ պատճառով մեզ օժանդակելու»,-ասաց նա:

 

«Իմ քայլի» պատգամավորը չի կարծում, որ գործընթացը կարող է երկար ձգձգվել, և համոզված է, որ դա համակարգի փլուզման չի հանգեցնի:

 

«Վիրահատությունը միշտ պետք է կտրուկ լինի, արվի նրբորեն, բայց կտրուկ: Մեր ռեսուրսները բավարար են, և չի կարող նման միջամտությունը համակարգի փլուզման հանգեցնել: Մենք այնպիսի իրավական գործընթաց չենք սկսի, որ փլուզում լինի, սաբոտաժ, իհարկե, կլինի, բայց սաբոտաժ այսպես թե այնպես կար, հետևաբար պայքարը սաբոտաժի դեմ է նաև»,-ասաց նա:

 

Անդրադառնալով իրավական համակարգից եկող ազդակներին՝ հնարավոր վեթինիգի իրականցման համար, Աղազարյանը նշեց, որ բնականաբար դատավորների մեծ մասի համար դա անընդունելի տարբերակ է:  

 

«Որովհետև դա իրենց արժեհամակարգին, մտածողությանը, ապրելակերպին, կենցաղին դեմ է և անհարիր միջոցառումների պլան է նախատեսում, հետևաբար նրանք բացասական են արձագանքում: Բայց կարծում եմ՝ դատական համակարգում կան բոլոր դեպքերում որոշ քանակությամբ դատավորներ, որոնք կհարմարվեն նոր իրողություններին և իրենց նպաստը կբերեն դատական համակարգի կայացմանը, ինչպես նաև դատական համակարգից դուրս, անկասկած, կան երիտասարդ իրավաբաններ, որոնք պատրաստ կլինեն աշխատելու և ծառայելու: Հանրությունը դատավորներին շատ լավ է ճանաչում և ընդունում է այս ամենը որպես հեղափոխության մի փուլ»,-ասաց նա: 

 

Իսկ թե սա ուղղակի միջամտություն չէ՞ դատական իշխանության ձևավորմանը, Աղազարյանը նշեց, որ բացարձակ իշխանություն ունի ժողովուրդը, որն իրականացնում է գործադիր, օրենսդիր և դատական համակարգերի միջոցով: 

 

«Ժողովուրդը օրենսդիր և գործադիր համակարգում իր հեղափոխական փոփոխությունները կատարել է և պետք է կատարի նաև դատական համակարգում, չի կարող այլ կերպ լինել, ուղղակի դա պետք է լինի այնպես, որ առավելագույնս բխի Սահմանադրությունից, միջազգային ընդունված նորմերից, որպեսզի մեր գործընկերների մոտ որևէ հարց չառաջանա, և մենք չկղզիանանք իրավական դաշտում, և փառք Աստծո մենք տեսնում ենք, որ նման միտում անգամ չկա»,-ասաց նա: