«Տնտեսության զարգացման ու ազգային համերաշխության կայացման հարցում լուրջ խնդիրներ կան»

Որոշ դրական փոփոխություններ կան: Մասնավորապես՝ իշխանության վերին շերտերում համակարգված կոռուպցիա չկա: Դրական փոփոխությունների մեջ կարելի է առանձնացնել նաև հատկապես ներմուծման հարցում մենաշնորհային քաղաքականության դեմ պայքարը: Գնահատելով հայաստանյան իրավիճակը, խոսելով երկրում առկա մթնոլորտից` Past.am-ի հետ զրույցում նման տեսակետ հայտնեց քաղաքական վերլուծաբան Արծրուն Պեպանյանը: Նա շեշտեց, որ կարող է շարունակել թվարկել ևս մի քանի դրական փաստեր, բայց խնդիրն այլ է:

«Հարցն այն է, որ տնտեսության զարգացման ու ազգային համերաշխության կայացման հարցում լուրջ խնդիրներ կան, և դրանք ներքին լարվածության ու ագրեսիվության պատճառ են դառնում»,-ասաց նա:

Անդրադառնալով հասարակական տրամադրություններին՝ Ա. Պեպանյանը նշեց. «Ես բավականաչափ ուսումնասիրել եմ մեր ժողովրդի պատմությունը և գիտեմ, որ վերջին հազար տարին բացասական ազդեցություն է թողել մեր ժողովրդի մտածողության վրա՝ խտացված չարություն կա: Դա ուրիշի լծի տակ երկար մնալու հետևանքն է, իսկ նման հատկանիշներ ունեցող ժողովրդին չի կարելի տանել հեղափոխության և կոշտ քաղաքական պայքարների»,-նշեց նա՝ իրավիճակը համեմատելով շշում թաքնված «Ջինի» առասպելի հետ:

«Եթե ներքին չարության «շիշը» բացես, այն այնտեղից դուրս է գալու ու անկառավարելի է դառնալու. այդ վտանգը ես հիմա տեսնում եմ ու միշտ էլ խորհուրդ եմ տվել խուսափել դրանից, այլ ելք գտնել՝ էվոլուցիոն ճանապարհով, ժողովրդին ապաքինելով տանել առաջ: Հակառակ պարագայում հեղափոխությունը նման հետևանքների է բերելու: Եվ դա հատկապես այն դեպքում, երբ իշխանությունները բավականաչափ բազմափորձ չեն: Խոսքը մասնավորապես հասարակագիտության առումով է, ըստ որի՝ կիմանային, թե ինչ է պետք անել: Հիմա այդ հազար տարում կուտակված ներքին չարությունը դուրս է հորդում, ինչի հետևանքներն ակնհայտ են»,-շեշտեց մեր զրուցակիցը:

Ովքե՞ր պետք է նշված իրավիճակից դուրս գալու ճանապարհներ փնտրեն. Արծրուն Պեպանյանի խոսքով, խնդիրը բարդ է:

«Բարդ է խնդիրը, իսկ լուծումը գտնելը, ինչպես ասում են, ամեն մեկի խելքի բանը չէ: Նախ պետք է հասկանանք՝ ինչո՞ւ ունենք այս իրավիճակը և ինչպե՞ս կարելի է դուրս գալ դրանից: Ես խոշորացույցով եմ նայել մեր իրականությանը՝ փորձելով հասկանալ, թե ինչո՞ւ ունենք այն, ինչ ունենք: Հետո ինքս ինձ հարց եմ տվել՝ իսկ ո՞ր կառույցը, մարդկային ո՞ր խումբը կկարողանա կամ հույս կա, որ կկարողանա իրավիճակը տանել դեպի քաղաքակիրթ դաշտ: Եվ երկար որոնումից հետո կարծում եմ, որ այդ դերը կարող էր ստանձնել Հանրային խորհուրդը»,-ասաց Ա. Պեպանյանը՝ հավելելով, որ Հանրային խորհրդի վերջին նիստի ժամանակ բարձրաձայնել է այդ մասին:

Նա նշեց, որ Հանրային խորհուրդն այդ դերն ունի օրենսդրությամբ: Հավելեց, որ Հանրային խորհրդի պարտականություններից մեկն էլ հասարակության մեջ առկա խնդիրների մասով հաշտեցնելու մեխանիզմներ գտնելն է:

«Ես Հանրային խորհրդի անդամներին ասացի՝ էլ ի՞նչ առճակատում էիք ուզում, եկեք, օրենքով սահմանված դերակատարությունը ստանձնենք, գտնենք հնարը, ձևը, որ այս ահագնացող լարվածությունն ինչ-որ ձև կարողանանք մեղմել, որ քաղաքական պայքարը քաղաքակրթության շրջանակում կլինի, և ոչ թե հայհոյանքների ու սպառնալիքների: Այս ամենը կարող է պետության կործանմանը տանել»,-նշեց Ա. Պեպանյանը՝ հույս հայտնելով, որ ՀԽ-ում այդ ուղղությամբ կաշխատեն:

Նա նշեց, որ ամենաճիշտ տարբերակը Հանրային խորհուրդն աշխատեցնելն է, որովհետև քաղաքական դաշտում բոլորը ճամբարավորված են:

Աննա Բադալյան