Գյումրիի տնակներում բնակվող 5 ընտանիք բնակարան ստացավ. բանալիները հունիսի 1-ին հանձնելը խորհրդանշանական էր (ֆոտո)

Ավերիչ երկրաշարժից 31 տարի անց Գյումրիի տնակներում բնակվող 5 բազմազավակ ընտանիք այսուհետ կապրեն նոր ու վերանորոգված բնակարաններում (ֆոտոռեպորտաժ)։

«Տաշիր» բարեգործական հիմնադրամի եւ «Հայաստանի էլեկտրական ցանցեր» ՓԲԸ համատեղ ծրագրի շրջանակում այսօր՝ հունիսի 1-ին, 5 բազմաբազակ ընտանիքի հանձնվեցին նոր բնակարանների բանալիները։

«Հայաստանի էլեկտրական ցանցեր» ընկերության հասարակայնության եւ կորպորատիվ կապերի դեպարտամենտի ղեկավար Նատալյա Սարջանյանը նշեց, որ ծրագիրն արդեն 3 տարի է՝ ինչ իրականացվում է. «Այսօր նվիրել ենք 5 բնակարան, ընդհանուր առմամբ՝ Գյումրիում նվիրել ենք 20 բնակարան։ Առաջնորդվել ենք բազմազավակ ընտանիքների ընտրության սկզբունքով, այսինքն՝ ընտրել ենք սոցիալապես անապահով եւ անմխիթար պայմաններում ապրող այն ընտանիքներին, որտեղ անչափահաս երեխաներ կան։ Այդ պատճառով էլ որոշեցինք բնակարանների բանալիները նրանց հանձնել Երեխաների պաշտպանության միջազգային օրը»։

Ընտանիքի մայրը՝ Նաիրա Սարհադյանը, հիշում է՝ սովորել էին դժվար պայմաններին, իսկ բնակարան ստանալու լուրը շոկային էր՝ անսպասելի։

Ընտանիքի հայրը՝ Հայկյան Արտյոմը հավելում է. «30 տարի հույսը կտրած մարդու համար սա շոկ էր, առ այսօր էլ չենք հավատում, որ անմխիաթար պայմաններում ապրելուց հետո տեղափոխվելու ենք այս բնակարան»։

Տանը 5 հոգով են բնակվելու։ Ընտանիքում երկու փոքրիկ է մեծանում՝ 3-ամյա դուստրը եւ 6–ամյա որդին։ Տղան՝ Նարեկը, որոշել է՝ զինվոր է դառնալու, հայրենիքն է պաշտպանելում։ Շրջել է տանը, բայց դեռ չի որոշել, թե որն է լինելու իր սենյակը։ Ամենից շատ խաղահրապարակն է հավանել, արդեն ընկերներ ունի բակում, գնդակով խաղում է բակի տղաների հետ։

Նույն թաղամասում բնակարան է ստացել նաեւ Դանիելյան Մարիամը։ Տունը շատ է հավանել։ Ասում է՝ 30 տարվա երազանքն է կատարվել։ Իսկ տնակում ապրելու դժվարությունը, տիկին Մարիամի խոսքով, կհասկանա միայն այնտեղ ապրած մարդը։

Ծրագրի շահառուներից Շողիկը Սահակյանն էլ պատմում է՝ 4 երեխա է մեծացրել տնակում, հիմա տղան ամուսնացել եւ 4 երեխա ունի։ Ուրախ է, որ տղայի երեխաներն ապրելու են ընդարձակ բնակարանում։

Նոր բնակարանում ապրելու է 4 թոռնիկների, որդու, հարսի եւ դստեր հետ։ Իսկ երազանքների մասին չի խոսում, ասում է՝ «Երազանքս միայն տունն էր»։ Հպարտությամբ խոսում է թոռնուհու՝ 8-ամյա Շողիկի մասին, որ դպրոցում գերազանցիկ է։ 

Շողիկը սիրում է նկարել, պատմում է՝ դպրոցում նկարչության ժամերին տուն էր նկարում եւ վերեւում գրում՝ «Իմ տունը»։ Ցանկանում է բժշկուհի դառնալ, բայց դրան զուգահեռ շարունակելու է նկարել, այժմ արդեն ծառ, ծաղիկ, ամպեր։

Ծրագրի շրջանակում նաեւ համերգ էր կազմակերպվել երեխաների համար։ Նրանց դիմավորեցին մուլտֆիլմերի հերոսներ, աճպարարներ։ Երեխաները երգեցին, պարեցին,  նվեր ստացան։