Ադրբեջանում զինվորը մահացել է «սրտի անբավարարությունից»

Ադրբեջանի զինված ուժերում հերթական մահվան դեպքն է գրանցվել:

Վկայակոչելով Meydan TV հեռուստաալիքը, Գյանջայում տեղակայված զորամասերից մեկի Բեյլագանի շրջանից 4 ամիս առաջ զինծառայության կանչված 21-ամյա զինվոր Նուրլան Քերիմովը նոյեմբերի 12-ին մահացել է «սրտի անվաբարարությունից»:

Ադրբեջանի պաշտպանության նախարարությունը զինվորի մահվան հետ կապված պաշտոնական հայտարարությամբ հանդես չի եկել:

«Խազար» ռազմական հետազոտությունների ինստիտուտի տվյալներով` 2015 թվականի ընթացքում Ադրբեջանի ԶՈւ կորուստը կազմել է  64 զինծառայող, որոնցից 31-ը մարտական, 33-ը` ոչ մարտական կորուստ է, 10 զինծառայողներ էլ վիրավորվել են:  «Խազար»-ը չի բացառում, որ Ադրբեջանի ՊՆ եւ ԱԱՆ համակարգում կորուստը կարող է ավելի մեծ լինել:

2015 թվականի սկզբից մինչ այժմ Ադրբեջանի պետական կառույցները խոստովանել են 23 զինծառայողների մահը:

Ադրբեջանը առաջնագծում զինադադարը խախտելու կամ զինված ուժերի կողմից իրագործած դիվերսիոն գործողություններից հետո ունեցած իր կորուստները, որպես կանոն, միջադեպերին հաջորդող օրերին հաճախ ներկայացնում է որպես ոչ կանոնադրական հարաբերությունների, ինքնասպանության, անվտանգության կանոնների խախտման, անզգուշության, հիվանդության կամ ճանապարհատրանսպորտային պատահարի հետևանքներ:

Նշենք, որ դա Ադրբեջանի Պն կողմից կորուստները թաքցնելու կամ զինծառայողների մահվան պատճառների մասին ապատեղեկատվության առաջին դեպքը չէ, եւ հայկական կողմը ադրբեջանական բանակի կորուստների իրական պատկերը բացահայտելու նպատակով ստիպված դիմում է ոչ պաշտոնական աղբյուրների օգնությանը:

Թեեւ Ադրբեջանը շարունակում է սեփական զինուժում գրանցված մահվան դեպքերի ու արտակարգ պատահարների մասին տեղեկությունները թաքցնելու քաղաքականությունը, այդուհանդերձ, ՀՀ ՊՆ եւ ԼՂՀ ՊԲ կողմից սեփական միջոցներով ձեռք բերված տեղեկությունների, ինչպես նաեւ ոչ պաշտոնական աղբյուրների եւ սոցցանցերի հաղորդագրությունների համաձայն` տարվա սկզբից մինչ այժմ ադրբեջանական բանակի կորուստը կազմել է առնվազը 131 զինծառայող եւ 143-ից ավելի վիրավոր: