«Որոգայթ»-ը մեծ էկրաններին է. ֆիլմը կներկայացվի նաև ԱՄՆ-ում և Ռուսատանում

 Անձի պատմություն, ով ճակատագրի բերումով հայտնվում է որոգայթում ու փորձում դուրս գալ դրանից: Հայկական նոր` «Որոգայթ» գեղարվեստական ֆիլմը նոյեմբերի 19-ին «Մոսկվա» կինոթատրոնում առաջին անգամ ներկայացվեց հանրությանը:

«Բոլորին քաջածանոթ «Որոգայթ» սերիալի ռիմեյքն է: Քրեական դրամա է: Հերոսները նույնն են: Սերիալում բաց մնացած մասը` Հովիկի երիտասարդությունը, լրացվել է: Ասելիքը հիմնականում նույնն է, ներկայացվում է մի անձի պատմություն, ով ճակատագրի բերումով հայտնվում է որոգայթում ու փորձում դուրս գալ: Հավատարիմ ենք մնացել գեղարվեստական ֆիլմի բոլոր կանոններին»,-«Արմենպրես»-ի փոխանցմամբ` պրեմիերայից առաջ լրագրողների հետ զրույցում նշեց «Որոգայթ» գեղարվեստական ֆիլմի ռեժիսոր Ռոման Մուշեղյանը:

Նրա խոսքով` ֆիլմի վրա հայկական կինոարտադրության պարագայում բավականին մեծ գումարներ են ծախսվել. բյուջեն 400 հազար դոլարից ավելի է եղել:

«Վաղը Լոս Անջելեսում կլինի ֆիլմի պրեմիերան, շուտով այն նաև Մոսկվայում կներկայացվի»,-նշեց Ռոման Մուշեղյանը:

Դերասան Գրիշա Աղախանյանը խոստովանում է` միանգամից է համաձայնել խաղալ «Որոգայթ»-ում:

«Ինձ համար սա հետաքրքիր առաջարկ էր, առաջին անգամ դրամատիկ լուրջ դեր էր: Համոզված եմ, որ ժողովուրդն էլ որոշ չափով զարմացած է: Մեծ փորձ է, ուրախ եմ, որ նման դեր առաջարկեցին»,-նշեց նա:

«Որոգայթ»-ը ոչ թե աղմուկ հանած սերիալի խտացումն է կամ շարունակությունը, այլ առանձին սյուժեով ու սցենարով նկարահանված ֆիլմ, որի տևողությունը շուրջ 1.5 ժամ է:

Ռեժիսոր Ռոման Մուշեղյանի ֆիլմում հիմնականում խաղում են «Որոգայթ» սերիալի, ինչպես նաև այլ հայ դերասաններ: Ֆիլմում նկարահանվել են հայկական կինոյի և հեռուստատեսության ամենահայտնի դեմքերը` Հարություն Մովսիսյանը, Սարգիս Գրիգորյանը, Սոս Ջանիբեկյանը, Գրիշա Աղախանյանը, Ստեփան Ղամբարյանը, Արթուր Դարբինյանը, Ալեքսանդր Խաչատրյանը, Մարջան Ավետիսյանը, Սաթենիկ Հախնազարյանը, Վարդան Հովսեփյանը, Արմեն Մարգարյանը, Գարիկ Չեպչյանը, Արփինե Գաբրիելյանը և ուրիշներ: