«Հաղթանակած նախաձեռնությունը՝ երեկ, այսօր, վաղը». կայացավ առաջին ֆորմալ հանդիպումը

Past.am

«Հաղթանակած» նախաձեռնության՝ կարճ ժամանակում անցած ուղին և  առաջիկա անելիքների հեռանկարը քննարկելու նպատակով հունիսի 29-ին ՀՊՄՀ-ում կայացավ «Հաղթանակած նախաձեռնությունը՝ երեկ, այսօր, վաղը» խորագիրը կրող  բաց հանդիպում-քննարկումը:

Միջոցառումն իրենց ներկայությամբ պատվել էին Արցախի ազգային հերոս, ՀՀ ԶՈւ գեներալ-մայոր Արկադի Տեր-Թադևոսյանը՝ կենդանի լեգենդ Կոմանդոսը, ՀԵՀԵՄ կենտրոնի հոգևոր տեսուչ հայր Թովմա Խաչատրյանը, արցախյան ազատամարտի մասնակից, հետախույզ Գևորգ Գևորգյանը, ՀՀ ԶՈւ մայոր Սարգիս Ստեփանյանը,արցախյան ազատամարտի մասնակից, ազգագրական պարերի մասնագետ Գագիկ Գինոսյանը, Հունաստանում Հայաստանի առաջին դեսպանատան նվիրատուներ, հայ բարերարներ տեր և տիկին Կուրունլյանները, ովքեր ժամանել են Աթենքից,  սիրված և ճանաչված երգչուհի, արմատներով արցախցի Գայա Արզումանյանը և այլ հայտնի ու հարգարժան հասարակական գործիչներ:

Հանդիպմանը մասնակցում էին նաև Արցախի 4 բուհերից եռօրյա այցով Երևան ժամանած երկու տասնյակ երիտասարդները, ՀՀ տարբեր բուհերի ուսանողական կառույցների ներկայացուցիչներն ու պարզապես հետաքրքրված ու հայրենասեր մի շարք հյուրեր:

Միջոցառման ընթացքում հյուրերին ներկայացվեցին կատարված աշխատանքները, ապա քննարկվեցին առաջիկա անելիքներն ու ծրագրերը,  հնչեցին ողջույնի և շնորհավորանքի ելույթներ: Հագեցած ու բովանդակալից հանդիպումն ամփոփվեց Կոմանդոսի՝ թևավոր խոսք դարձած հայտնի մտքով. «ՀԱՂԹԱՆԱԿԸ ՀԱՅԻ ԳԵՆԻ ՄԵՋ Է»…