Գրա­վում են հայ­կա­կան հյու­րըն­կա­լու­թյու­նը և սնուն­դը, վանում են են­թա­կա­ռուց­վածք­նե­րը

Վարչապետ Նիկոլ Փաշինյանը ֆեյսբուքյան իր էջի միջոցով տեղեկացրեց, որ այս տարվա առաջին 6 ամիսների տվյալներով՝ 14,4 տոկոսով ավելի օտարերկրացի է ժամանել մեր երկիր, քան նախորդ տարվա առաջին վեց ամիսներին, հույս հայտնելով, որ տնտեսվարողները լավ կընդունեն Հայաստան ժամանողներին:

Տուրիզմի հայկական ֆեդերացիայի նախագահ Մեխակ Ապրեսյանը «Փաստի» հետ զրույցում նշում է, որ հուլիսի վերջին՝ ըստ մեթոդաբանության, ազգային վիճակագրական ծառայությունը կհրապարակի տվյալները, թե որքան զբոսաշրջիկ է ժամանել Հայաստան: «Զբոսաշրջիկների թիվն ընդհանուր այցելությունների թվի մի մասն է, որը, տոկոսային հարաբերակցությամբ, հաշվվում է ընդհանուր այցելությունների թվի մեջ: 

Օրինակ, 2018 թվականին Հայաստան ընդհանուր այցելությունները 3 մլն 8 հազար էր, որից 1,651 782 զբոսաշրջային այցելություններ էին», - ասում է Մեխակյանը՝ հավելելով, որ միայն հստակ թվերի հրապարակումից հետո հնարավոր կլինի ասել՝ 14,4 տոկոսը միայն զբոսաշրջիկնե՞ր են, թե՞ ոչ:

 

Նա նշում է, որ դեռևս 2013 թվականին արված վիճակագրական հետազոտությունների տվյալներով, որը կիրառվում է մինչ օրս, քանի դեռ չեն արվել նոր հետազոտություններ, Հայաստան ընդհանուր այցելությունների մեջ զբոսաշրջային այցելությունները կազմում են մոտավորապես 44 տոկոս: 

«Սա միջինացված թիվ է: Ըստ միջազգային մեթոդաբանության՝ սահմանային հատման բոլոր կետերում ամբողջ տարվա ընթացքում կատարվում է վիճակագրություն, հետո տվյալների գործակիցներ են ձևավորվում՝ ըստ եռամսյակների, սահմանային անցման կետերի, տրանսպորտի տեսակների և այլն», նշում է ֆեդերացիայի նախագահը:

Մեր զրուցակիցը ընդգծում է՝ թվերի մասին հստակ կարելի է խոսել, երբ լինեն այս տարվա առաջին կիսամյակի զբոսաշրջային այցելությունների թվերը, որոնք էլ կհամեմատեն նախորդ տարվա նույն ժամանակաշրջանի թվերի հետ:

Անդրադառնում ենք նաև Ռուսաստանից դեպի Հայաստան զբոսաշրջիկների հոսքի հնարավոր ավելացմանը՝ դեպի Վրաստան ռուսական ավիաընկերությունների թռիչքների արգել քը հաշվի առնելով:

«Մեզ մոտ մշտապես կա Ռուսաստանից այցելող զբոսաշրջիկների աճ, գնալով Հայաստանի նկատմամբ հետաքրքրությունը մեծանում է: Այս իրավիճակում, քանի դեռ այդ արգելքը գործում է, և այլընտրանքներից մեկը Հայաստանն է, լրացուցիչ այցելություններ, իհարկե, կունենանք: Այս դեպքում պետք է խելամիտ վերաբերվենք և այնպես անենք, որ դա նպաստի զբոսաշրջության արդյունավետ զարգացմանն այն իմաստով, որ չմտածենք, թե ունենալու ենք ավելի շատ զբոսաշրջիկներ և աչքաթող անենք որակը: 

Պետք է մշտապես պահպանենք մեր իմիջը՝ որպես հյուրընկալ ազգ, ինչը մեր ազգային առանձնահատկություններից և հիմնական գրավչություններից մեկն է, անհարկի գներ չբարձրացնենք, շարունակենք այն գաղափարախոսությունը, որ զբոսաշրջիկները պետք է Հայաստանից հեռանան լավագույն տպավորություններով: Այս դեպքում ավելի շահած կլինենք», - եզրափակում է Ապրեսյանը:

Հայաստանի տուրօպերատորների և տուրգործակալների ասոցիացիայի հիմնադիր նախագահ Կարինե Դավոյանը «Փաստի» հետ զրույցում նշում է՝ զբոսաշրջիկների իրական թվի մասին պատկերացում կազմելու համար տվյալներ պետք է տրամադրեն տուրօպերատորները, հյուրանոցները:

«Ցավոք սրտի, սակայն, մասնավոր հատվածից վիճակագրական ծառայություն հասնող տվյալները կարող են ճշգրիտ չլինել: Բացի դրանից, Հայաստան ժամանող շատ զբոսաշրջիկներ չեն օգտվում, օրինակ, զբոսաշրջային փաթեթներից, նրանք կատարում են անհատական այցեր:

Սա բնորոշ է ոչ միայն Հայաստանին, այլ ամբողջ աշխարհին: Երբեմն կրկնակի, անգամ եռակի մեծ է լինում անհատական այցելությունների թիվը, քան փաթեթային տուրերով այցելողներինը:

Տեխնոլոգիական առաջընթացի պայմաններում մարդիկ ինքնուրույն պատվիրում են հյուրանոց, տուրեր և այցելում ցանկացած երկիր: Սակայն ամեն դեպքում զբոսաշրջիկները գումար են ծախսում Հայաստանում, ինչպակաս կարևոր չէ», ասում է Դավոյանը:

Նա անդրադառնում է Ռուսաստանից դեպի Հայաստան ժամանող զբոսաշրջիկների թվի աճին: «Թվերի մասին հստակ պատկերացում կկազմենք ավելի ուշ, երբ ԱՎԿ-ն կհրապարակի տվյալները: Հնարավոր է, իհարկե, աճ լինի, որովհետև Հայաստանի միջոցով կարող են գնալ Ռուսաստան: Պետք է նկատի ունենալ, որ ռուս զբոսաշրջիկներից շատերը Ռուսաստանից Վրաստան են ուղևորվում մեքենաներով, այսինքն՝ հոսքն ամեն դեպքում, իմ կարծիքով, շատ չի նվազի:

Պետք է հաշվի առնել, որ սա ուղղակի կարող է լավ հնարավորություն լինել տուրիստական ընկերությունների համար, օրինակ՝ վրացական ընկերությունները սկսեն հայկականներին դիտարկել որպես անհրաժեշտ գործընկերներ և ամրապնդեն իրենց գործընկերությունը», - նշում է մեր զրուցակիցը: Դավոյանի խոսքով, զբոսաշրջիկները մեր երկրում շատ են գնահատում հյուրընկալությունը, սպասարկման որակը և, իհարկե, էկոլոգիապես մաքուր սնունդը:

«Զբոսաշրջիկների դժգոհության պատճառները կարող են տարբեր լինել: Օրինակ՝ մեծահասակների համար դժվար է ոտքով ինչ-որ տեղ ուղևորվելը, հուշարձաններին՝ հատկապես մեքենաներով մոտենալը: Առհասարակ ենթակառուցվածքներից դժգոհություններ միշտ լինում են», հավելում է Դավոյանն՝ ընդգծելով, որ միևնույն ժամանակ յուրաքանչյուր մարդ իր տեսակով յուրահատուկ է, ուստի նրա պահանջները և դժգոհությունները ևս տարբեր են:

ԼՈՒՍԻՆԵ ԱՌԱՔԵԼՅԱՆ