Նոր բնակարան, հողամաս, 70 000 ԱՄՆ դոլարի նվիրատվություն. փոխնախարարի ունեցվածքը

Ֆինանսների նախարարի առաջին տեղակալ Կարեն Բրուտյանը 2018 թվականին 35 000 ԱՄՆ դոլար արժողության բնակարան է ձեռք բերել: Այս մասին տեղեկանում ենք Կ. Բրուտյանի՝ ՀՀ բարձրաստիճան պաշտոնատար անձանց էթիկայի հանձնաժողովին ներկայացրած 2018թ. տարեկան հայտարարագրից:

Կարեն Բրուտյանը 2018թ. հարկային տարում ձեռք է բերել նաև հողամաս՝ 35 000 ԱՄՆ դոլար արժեքով: 2018 թ. հարկային տարվա սկզբում նրա փոխառության չափը կազմել է 55 000 եվրո, որը 2018թ.-ին վերադարձվել է:

Հայտարարատու պաշտոնատար անձի դրամական միջոցները 2018թ. հարկային տարվա սկզբում կազմել են 30 000 000 ՀՀ դրամ, 65 000 ԱՄՆ դոլար և 60 000 եվրո: Դրամական միջոցները 2018թ. հարկային տարվա վերջում կազմել են 26 500 000 ՀՀ դրամ, 65 000 ԱՄՆ դոլար և 65 000 եվրո:

ՀՀ դրամով ստացած եկամուտների հանրագումարը 2018թ.-ին կազմել է 54 440 651 ՀՀ դրամ: Նշված հանրագումարից 5 930 370 ՀՀ դրամը, 13 027 662 ՀՀ դրամը, 482 619 ՀՀ դրամը գոյացել են աշխատավարձերից, իսկ 35 000,000 ՀՀ դրամը՝ փոխառություններից (վարկեր): Կ. Բրուտյանը ստացել է նաև 5000 ԱՄՆ դոլար եկամուտ, որը ևս գոյացել է փոխառություններից: Նվիրատվության կամ օգնության կարգով ստացված գույքը, դրամական միջոցները բաժնում էլ նշված է 70 000 ԱՄՆ դոլարի մասին, որը, ըստ հայտարարագրի, պաշտոնյան ստացել է բնամթերքի տեսքով:

ԱՆՆԱ ԲԱԴԱԼՅԱՆ