«Վի­վա­Սել-ՄՏՍ» ըն­կե­րու­թյան պա­տաս­խան­նե­րը «Փաս­տի» հար­ցադ­րում­նե­րին՝ կապ­ված Ար­ցա­խում ռո­ու­մին­գի սա­կագ­նե­րի հետ

«Փաստ» օրաթերթը որոշ ժամանակ առաջ անդրադարձել էր Արցախի տարածքում գործող ռոումինգի բարձր սակագներին: Դեռևս մեկ տարի առաջ Արցախի իշխանությունները դիմել էին ՀՀ-ում գործող երեք օպերատորներին՝ Արցախում ևս կապի և հեռահաղորդակցության ոլորտում ծառայություններ մատուցելու առաջարկով:

«Փաստը» որոշել էր պարզել, թե ինչ քայլեր են ձեռնարկվել անցած մեկ տարվա ընթացքում:

Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովից, ի պատասխան «Փաստի» հարցադրումներին, նշել էին, որ դեռևս 2018 թվականի մայիսի 31-ին հեռահաղորդակցության ոլորտ մուտք գործելու հրավեր էր ուղարկվել հայաստանյան երեք օպերատորներին, որոնցից երկուսը՝ «ՄՏՍ Հայաստան» և «ՎԵՈՆ Արմենիա» ՓԲ ընկերությունները, նման ցանկություն չէին հայտնել՝ պատճառաբանելով հայաստանյան հեռահաղորդակցության շուկայում նոր ներդրումների իրականացման անհրաժեշտության առկայությամբ, իսկ մեկն ընդհանրապես չէր արձագանքել գրությանը:

Միևնույն ժամանակ հայտնել էին, որ հանձնաժողովի և «Ղարաբաղ Տելեկոմի» միջև կայացած քննարկումների արդյունքում որոշվել է 2019 թվականի օգոստոսի 1-ից բոլոր օպերատորների ռոումինգի սակագները համահավասարեցնել:

Խնդրի հետ կապված ներկայացրել էինք երկու օպերատորների՝ «ՎԵՈՆ Արմենիա» ՓԲԸ-ի և «Ucom» ընկերության պատասխանները՝ ռոումինգի սակագների և Արցախում գործունեություն չծավալելու պատճառների վերաբերյալ: «ՄՏՍ Հայաստան» ՓԲԸ-ի մարքեթինգի և հաղորդակցության բաժնից մեզ հայտնել էին, որ հարցմանը լիարժեք պատասխանելու համար առկա է որոշակի տվյալների հաշվարկման անհրաժեշտություն, հետևաբար՝ հավել յալ ժամանակ էին խնդրել:

Այժմ ներկայացնում ենք ընկերության պաշտոնական պատասխանը մեր հարցադրումներին:

Ընկերությունից հայտնում են, որ հեռահաղորդակցության ոլորտում իրականացվող գործունեության բոլոր ուղղությունները «ՎիվաՍելՄՏՍ»-ն ակտիվորեն զարգացնում է ՀՀ տրանսպորտի և կապի նախարարության կողմից 2004 թվականին տրամադրված լիցենզիայի շրջանակներում: Ինչ վերաբերում է ռոումինգի սակագներին, ապա ընկերությունից ներկայացնում են հետևյալ տվյալները:

«ՎիվաՍել-ՄՏՍ»-ն Արցախում ռոումինգի ծառայություն տրամադրող հայաստանյան 3 օպերատորներից մեկն է, ընդ որում` Արցախում ռոումինգի ծառայությունը գործել է նախքան «ՎիվաՍել-ՄՏՍ»-ի՝ շուկա մուտք գործելը:

Աշխարհով մեկ ռոումինգի սակագները կախված են ռոումինգ-գործընկերների առաջարկած միջօպերատորական սակագներից: Սակագների իջեցման դեպքում «ՎիվաՍելՄՏՍ»-ը ևս վերանայում է իր սակագները: Այսպես, շարունակական բանակցությունների արդյունքում վերանայվել ու 2018 թվականի սեպտեմբերի 3-ից Արցախից ռոումինգով դեպի ՀՀ ելքային զանգի սակագինը 45 դրամից դարձել է 38 դրամ:

«ՎիվաՍել-ՄՏՍ»-ի առաջարկած «Վոյաժ» ծառայությունը, այն է՝ Արցախում ռոումինգում գտնվող բաժանորդին մինչև 50 ՄԲ ինտերնետ ու դեպի «ՎիվաՍել-ՄՏՍ»-ի ցանց 50 SMS հաղորդագրություն ուղարկելու հնարավորությունը՝ օրական ֆիքսված 500 դրամով, նույնպես այդ բանակցությունների արդյունք է: 

«ՎիվաՍել-ՄՏՍ»-ն իր բաժանորդներին առաջարկում է ռոումինգի ամենացածր սակագները՝ դեպի Արցախ մուտքային զանգերի, ինչպես նաև՝ Արցախից ՀՀ զանգահարելու համար (ելքային):

Այսպիսով, Արցախում գտնվող «ՎիվաՍելՄՏՍ»-ի բաժանորդի համար ելքային զանգի մեկ րոպեի սակագինը կազմում է 38 դրամ, իսկ մուտքայինը՝ 25 դրամ: Ավելին՝ Արցախում ռոումինգում գտնվող բաժանորդները հնարավորություն ունեն զանգահարելու Հայաստան՝ «ՎիվաՍել-ՄՏՍ»-ի բաժանորդի «Զանգ Հայաստան» ծառայության միջոցով՝ ընդամենը 25 դրամ/րոպե սակագնով՝ յուրաքանչյուր զանգից առաջ հավաքելով *101*հեռախոսահամար#: Այսիքն՝ «ՎիվաՍելՄՏՍ»-ի բաժանորդների համար գործում է 25/25 դրամ/րոպե սիմետրիկ սակագինը, որը շատ քիչ է տարբերվում հայաստանյան օպերատորների միջև գործող սակագներից»,ասված է ընկերության պատասխանի մեջ:

Հավելենք, որ հիմնական հարցը, այն է՝ Արցախում ևս ծառայություններ մատուցելու հնարավորությունը, նրբորեն շրջանցված է, իսկ հարցումը հմտորեն օգտագործվել է գովազդի համար: Այնուամենայնիվ, քանի որ ներկայացրել ենք մյուս օպերատորների պատասխանները, հրապարակում ենք նաև այս մեկը:

ԼՈՒՍԻՆԵ ԱՌԱՔԵԼՅԱՆ