Ազատ կամարտահայտման իրավունքը Արցախի անքակտելի իրավունքն է. ՀՀ ԱԳ նախարար

 

Եթե Ադրբեջանն իսկապես անկեղծորեն շահագրգռված է Լեռնային Ղարաբաղի հակամարտության կարգավորմամբ, ապա նույն չափով պետք է շահագրգռված լինի Արցախի ընտրված իշխանությունների հետ բանակցություններով: Այս մասին հայտարարեց Հայաստանի ԱԳ նախարար Զոհրաբ Մնացականյանը՝ ելույթ ունենալով Երեւանում անցկացվող դեսպանների եւ դիվանագիտական ներկայացուցչությունների ղեկավարների համաժողովում:

 

Ներկայացնելով երկրի արտաքին քաղաքականության հիմնական ուղղությունները՝ նախարարը նշեց, որ Արցախի հարցում հայկական կողմը ղեկավարվում է տարածաշրջանում անվտանգության պահպանման նպատակով, ինչը բխում է տարածաշրջանային բոլոր երկրների շահերից: «Մենք տեսել ենք մեր հարեւան տարածաշրջաններում անվտանգության համակարգի փլուզման ծանրագույն հետեւանքները»,- նշեց ԱԳ նախարարը՝ շեշտելով  ռազմա-քաղաքական հավասարակշռության ահպանման կարեւորությունը: Նրա խոսքով՝ Հայաստանն այս ուղղությամբ հետեւողականորեն ջանքեր է ձեռնարկում:

 

 

Նախարարը միաժամանակ նշեց ռազմա-քաղաքական հավասարակշռությունը խախտելու Ադրբեջանի փորձերի մասին: «Հայաստանը հանդես է գալիս ղարաբաղյան հակամարտության խաղաղ կարգավորման դիրքերից, սակայն չի կարող ընդունել Ադրբեջանի կողմից բացահայտ կամ քողարկված ուժի կիրառման սպառնալիքները եւ հրադադարի ռեժիմը պայմանական դարձնելու որեւէ նկրտում: Լարվածության պայմաններում բանակցություններ վարելու Ադրբեջանի ջանքերը խոչընդոտում են խաղաղության նպաստող միջավայրի ձեւավորմանը եւ ըստ այդմ չեն նպաստում հիմնախնդրի տեւական եւ համապարփակ կարգավորմանը: Ադրբեջանն իր անփոփոխ հայատյաց քաղաքականությամբ շարունակում է մնալ Արցախի ժողովրդի գոյության սպառնալիք»,- նշեց ԱԳ նախարարը:

 

Նախարարը միաժամանակ շեշտեց, որ խաղաղությունն այլընտրանք չունի, Հայաստանը եւ Արցախն ունեն բավարար ուժ խաղաղության ապահովման համար։ ԱԳ նախարարը նշեց, որ հայկական կողմը բարձր է գնահատում միջազգայնորեն ընդունված միակ միջնորդական առաքելության՝ ԵԱՀԿ Մինսկի խմբի համանախագահության եւ համանախագահ երկրների դերակատարումը արցախյան հիմնահարցի կարգավորման եւ տարածաշրջանային խաղաղության պահպանման գործում։

 

Նախարարի խոսքով՝ Հայաստանը հստակ արտահայտել է իր մոտեցումները ղարաբաղյան խաղաղ կարգավորման առնչությամբ եւ այս տեսակետից հատուկ ընդգծեց Հայաստանի վարչապետ Նիկոլ Փաշինյանի՝ Ստեփանակերտում մարտի 12-ին Հայաստանի Հանրապետության եւ Արցախի Հանրապետության Անվտանգության խորհուրդների համատեղ նիստում եւ օգոստոսի 5-ին Վերածննդի հրապարակում անցկացված հանրահավաքին ելույթները:

 

«Ղարաբաղյան խաղաղ գործընթացում կարգավիճակի եւ անվտանգության խնդիրները մեզ համար ունեն առաջնային նշանակություն: Հայաստանը չի կարող գնալ կարգավորման որեւէ տարբերակի, որը կարող է վտանգել Արցախի ժողովրդի անվտանգությունը եւ սահմանափակել ինքնորոշման իրավունքի իրականացման շրջանակը:

 

Արցախի ժողովրդի ինքնորոշման իրավունքը եւ բոլոր պայմաններում կիրառելի մարդու անօտարելի իրավունքները ենթադրում են նաեւ ազատ կամարտահայտում, որը ներառում է նաեւ Արցախում ազատ ընտրությունների իրականացումը եւ այդ ընտրությունների արդյունքում ձեւավորված իշխանության ներկայացուցիչների գործուն ներգրավումը բանակցային գործընթացում:

 

Եթե Ադրբեջանն անկեղծորեն շահագրգռված է հակամարտության խաղաղ կարգավորմամբ, ապա պետք է նույնչափ շահագրգիռ լինի Արցախի ժողովրդի ընտրյալ ներկայացուցիչների հետ բանակցելու մեջ»,- նշեց ԱԳ նախարարը: