«Կարծես թե եկել են պաշտոնները վայելելու և ոչ թե աշխատելու»

«Ագրարագյուղացիական միավորում» ՀԿ-ի նախագահ Հրաչ Բերբերյանը «Փաստի» հետ զրույցում անդրադառնում է գյուղատնտեսության ոլորտում գրանցված անկմանը: Կառավարությունը ներկայացնում է 7 տոկոս անկում, մինչդեռ, Բերբերյանի խոսքերով, սա իրականությանը չի համապատասխանում:

«Մեր ուսումնասիրությունները ցույց են տալիս, որ գյուղատնտեսության ոլորտում անկումը կազմում է մոտավորապես 15-20 տոկոս՝ հատկապես պտղի, խաղողի, ցորենի, կարտոֆիլի արտադրության և անասնապահության ոլորտներում:

Բոլոր ուղղություններով ծանր վիճակ է: Անասնակերի մեկ հակը 1300 դրամ է` թանկացել է մոտ երկու անգամ: Սա զարմանալի է, քանի որ ամառ է, և մենք բավական անասնակեր պետք է ունենայինք:

Սա, իհարկե, երաշտի հետևանքով է, և կառավարությունը սրա հետ կապ չունի, բայց միևնույն ժամանակ այն պարտավոր էր անասնակերի հարցերը քննարկել մարզպետարանների հետ և այդ խնդիրը լուծել: Մասնավորապես՝ պետք է ժամանակին խոտհունձ անեին: 

Մի կողմից գյուղացիներն անասնակեր կունենային, մյուս կողմից էլ հրդեհների քանակն այսպիսին չէր լինի: Թե ինչով են զբաղված մարզպետները, անհայտ է մնում:

Կարծես թե եկել են պաշտոնները վայելելու և ոչ թե աշխատելու: Ժամանակն է եկել բոլորին իրենց տեղը նստեցնել՝ սկսած բոլոր այն մարդկանցից, որոնք պատասխանատու, ամպագոռգոռ բաներ են ասում, բայց տակը ոչինչ չկա, դատարկություն է:

Ընդհանրապես գյուղացիների աշխատանքները ձախողել են: Այդպես էլ չիմացանք, թե ով է գյուղատնտեսության նախարարության փակման և հիմնական խնդիրների պատասխանատուն:

Այո, մենք համարում ենք, որ նախարարությունները չեն միավորվել, այլ գյուղնախարարությունը փակվել է», - ասում է Բերբերյանը:

Նա անդրադառնում է նաև այս տարվա գյուղատնտեսական ապրանքների հնարավոր դեֆիցիտին: 

Նշում է, որ անցած տարի արդեն Բելառուսից Հայաստան կարտոֆիլ է ներկրվել: «Վերջին 15-20 տարում նման բան չէր եղել, ընդհակառակը՝ 2014 թվականին մենք 54 հազար տոննա կարտոֆիլ էինք արտահանել:

Շուկայում համարյա թե չհայտնվեց բաց գրունտի (բույսի մշակությունը բաց դաշտում- խմբ.)՝ դաշտային լոլիկ: Հիմնականում ջերմոցի լոլիկներն էին, այնպես որ, լոլիկի գինն էլ չէժանացավ», - նշում է փորձագետը:

Անդրադառնալով գներին՝ նա ընդգծում է՝ եթե գյուղատնտեսական արտադրանքը քիչ է կամ չկա, բնական է, որ գներն էլ պետք է բարձր լինեն: «Այս տարի ծիրանն ավելի թանկ էր, քան նախորդ տարի, խաղողն էլ թանկ կլինի:

Լավ ցուցանիշներ ունեինք ելակի, ձմերուկի և դեղձի ծավալների դեպքում»,ասում է մեր զրուցակիցը:

Բերբերյանի խոսքերով, բույսերի պաշտպանությունը ևս բարձիթողի վիճակում է, և առհասարակ գյուղմթերք արտադրող գյուղացին պաշտպանված չէ:

Նա նաև ահազանգում է, որ իրենց կանխատեսումներով հաջորդ գարնանը կարտոֆիլը շուկայում կվաճառվի 400-ից 500 դրամով: Բացի դա, տարեցտարի կարտոֆիլի ցանքատարածությունները պակասում են, կարտոֆիլի, ցորենի սերմացու չկա:

ԼՈՒՍԻՆԵ ԱՌԱՔԵԼՅԱՆ