Հար­ցը բե­րե՛ք օրենսդ­րա­կան դաշտ և լու­ծում տվե՛ք.հա­տուկ դպրո­ցի շուրջ կրքե­րը չեն հան­դարտ­վում

Կրթության ոլորտում անհանգստացնող միտումներ են նկատվում: Մեկնարկել է ուսումնական նոր տարին, մինչդեռ ուսումնական որոշ հաստատություններ չեն կարողանում նորմալ դասապրոցես իրականացնել: Մինչ ՀՀ աշխատանքի և սոցիալական հարցերի նախարարությունն առաջարկում է լուծարել Դիլիջանի, Բյուրեղավանի, Գյումրու թիվ 1 և թիվ 2 գիշերօթիկ հաստատությունները, չեն հանդարտվում կրքերը նաև Երևանի թիվ 16 հատուկ դպրոցի շուրջ:

Դպրոցի տնօրեն Մարիամ Շոլինյանը «Փաստի» հետ զրույցում նշում է՝ դպրոցը գործում է 50 տարի, 2002 թվականին այն վերանվանվել է որպես 16 հատուկ դպրոց: «Բայց որոշման մեջ նշված չէ, թե հատկապես ինչ ուղղությամբ հատուկ դպրոց:

Իսկ դպրոցի կանոնադրության մեջ նշված է, որ այստեղ կարող են սովորել տեսողական խնդիրներ ունեցող և ծնողական խնամքից զուրկ երեխաներ: 50 տարի է՝ դպրոցը կա, այդպիսի երեխաներ են այստեղ սովորում: Հիմա եկել, օգոստոսի վերջին ասում են, որ ստուգում է կատարվել, ձեր 170 երեխաներից միայն 19-ը ունեն տեսողական խնդիր, հետևաբար դպրոցի գոյությունը՝ որպես հատուկ դպրոց, նախարարությունը հարմար չի գտնում: Ընդ որում՝ այս երեխաների փաստաթղթերը մեկ գիշերում հանձնարարվել է ի մի բերել: Այ, այս տեմպով են աշխատում նախարարությունում: 

Մայիսին ծանուցվել ենք, որ առաջիկայում դպրոցը պետք է վերանվանվի թիվ 201 հանրակրթական հիմնական դպրոցի. հատուկը վերանում է: Ամբողջ կոլեկտիվը սրան կողմ էր, որովհետև պետությունը անցնում է ներառական կրթության:

Հանկարծ սեպտեմբերի 1-ից մի երկու օր առաջ պարզվում է, որ նախարարությունը նպատակահարմար չի գտնում սրա հետագա գործունեությունը, ընդ որում՝ չի ասում՝ լուծարելո՞ւ է այն, թե՞ ոչ: Պաշտոնապես որևէ որոշում չեմ ստացել, ընդամենն այդ ծանուցումն է»,-ասում է Շոլինյանը:

Նա նշում է, որ երեկ դասապրոցես է կազմակերպել, և հիմա հարց է առաջ քաշում՝ դպրոցում առաջացել է հարկադիր պարապուրդ, որը վնաս է պետությանը՝ նախարարության մեղքով: «Մեզ բանավոր ասել են, որ դպրոցը սեպտեմբերից չի ֆինանսավորվում:

Միևնույն ժամանակ մեր դպրոցը շարունակում է մնալ հատուկ դպրոց: Երեխաներն այսօր եկել են դասի, պետք է ճաշ ուտեն, սնունդը, գիշերային աշխատանքը հնարավոր չէ կազմակերպել, այսքան մարդու ո՞վ է գումար տալու՝ նրանք աշխատանքի են եկել:

Մենք ուզում ենք, որ լավ լինի երեխայի, պետության համար, ուզում ենք կառավարությանը ճիշտ պահանջ ներկայացվի, որ կառավարությունն էլ ճիշտ կողմնորոշվի և ճիշտ լուծում տա, ոչ թե իրենք գլխացավից ազատվելու համար դպրոցի գլուխը կտրեն: Թող վերանա հատուկ անունը, դրան համաձայն ենք, դառնա միջնակարգ դպրոց: Համայնքին ավելի ձեռնտու է իր տարածքում միջնակարգ դպրոց ունենալը և ոչ թե ընդհանրապես դպրոցի փակումը:

Նախարարության պաշտոնյան ինձ կարգադրում է՝ պարտավոր էիք մինչև հիմա այդ բոլոր մարդկանց ազատել աշխատանքից, բայց ինչի՞ հիման վրա ազատեմ:

Կողմ ենք հարցի՝ օրենքի սահմաններում լուծմանը: Իսկ երբ կառավարությունը կորոշի, որ դպրոցը, օրինակ, ցրվում է կամ այլ տարբերակ կառաջարկի, մենք ո՞վ ենք, որ չենթարկվենք, բոլորս էլ կառավարության որոշմանը պետք է ենթարկվենք, բայց առայժմ որոշում չկա: Ասում ենք՝ հարցը բերե՛ք օրենսդրական դաշտ և լուծում տվե՛ք», - նշում է դպրոցի տնօրենը: 

Նա նաև տեղեկացնում է, որ օգոստոսի վերջին նախարարությունից գրավոր հանձնարարական է ստացել՝ «արագ կերպով 170 երեխային «ցրել» ուրիշ դպրոցներով»:

«Այսինքն՝ մենք մեր ձեռքով երեխաներին «ցրենք», հետո իրենք կառավարությունում կեղծ իրավիճակ ներկայացնեն, թե այստեղ սովորող երեխա չկա, փակեք դպրոցը»,-եզրափակում է դպրոցի տնօրենը:

Հ. Գ. Ստացվում է, որ հերթական անգամ գործադիրը փորձում է առաջ քաշել խնդիրներ, դրանց լուծումներ տալ, սակայն, ինչպես միշտ, չի հաշվարկում իր քայլերի հաջորդականությունը և հնարավոր հետևանքները, մինչ որոշում կայացնելը չի ապահովում դրա կիրարկման հիմքերը, ինչն էլ հանգեցնում է համանման վիճակի: Երևանի թիվ 16 հատուկ դպրոցի, Հայաստանում գործող 4 գիշերօթիկների սաների թե՛ ծնողների, թե՛ ուսուցիչների անորոշ վիճակը սրա վառ ապացույցն է:

Թեման շարունակելու է մնալ «Փաստի» ուշադրության կենտրոնում: Դրան կանդրադառնանք մեր հետագա հրապարակումներում ևս:

ԼՈՒՍԻՆԵ ԱՌԱՔԵԼՅԱՆ