Ար­ցա­խյան ընտ­րու­թյուն­նե­րի ընդ­հա­նուր պատ­կե­րը

Սեպտեմբերի 8-ին Արցախի Հանրապետության բոլոր 228 գործող համայնքներում տեղի են ունեցել տեղական ինքնակառավարման մարմինների հերթական ընտրությունները:

Վերլուծելով ԱՀ ԿԸՀ-ի հրապարակած նախնական ամփոփագիրը՝ տեսնում ենք, որ 12 քաղաքային համայնքներում ընտրված համայնքների ղեկավարներից 7-ը (58,3%) «Ազատ հայրենիք» կուսակցության անդամ է, իսկ մյուս 5-ը (41,7%)՝ անկուսակցական:

Ըստ տարածքների, համայնքների ղեկավարների պաշտոնի համար առաջադրված թեկնածուների և ընտրված համայնքների ղեկավարների առումով պատկերը հետևյալն է. Ստեփանակերտի քաղաքապետի պաշտոնի համար առաջադրված 5 թեկնածուներից 4-ը ինքնառաջադրվել է, 1 թեկնածու առաջադրվել է «Ինքնություն և միասնություն» կուսակցության կողմից: Նախնական արդյունքներով, քաղաքապետ է ընտրվել անկուսակցական Դավիթ Սարգսյանը:

Ասկերանի շրջանի 42 համայնքների ղեկավարների պաշտոնների համար առաջադրված թեկնածուների ընդհանուր թիվը եղել է 83: Ընտրված համայնքապետներից 12-ը (38,7%) նորընտիր է: Կուսակցականության առումով՝ 23-ը (54,7%) անկուսակցական է, 11-ը՝ (26,2%) «Ազատ հայրենիք» կուսակցության, 4-ը (9,5%)՝ Արցախի ժողովրդավարական կուսակցության, 1-ը (2,4%)՝ ՀՅԴ անդամ:

Արցախյան ընտրությունների պրակտիկայում աննախադեպ դրություն է ստեղծվել շրջանի Բերքաձոր համայնքում, որտեղ առաջադրված ընդամենը 1 թեկնածուի՝ «Սասնա ծռեր» կուսակցության Արցախի համակարգող Գեղամ Գրիգորյանի օգտին հաշվարկվել է 21 քվե՝ ընդհանուր առմամբ 87 քվեաթերթիկից: 60 ընտրող քվեարկել է այդ թեկնածուի դեմ, ևս 6 քվեաթերթիկ ճանաչվել է անվավեր:

Օրենսդրությունը նման դեպքերը մեկնաբանում է որպես ընտրության չկայացում և իրավասու մարմնին տալիս ցուցում՝ նշանակելու նոր ընտրություն, որը տեղի կունենա արդյունքների վերջնական ամփոփումից հետո ընկած 40-օրյա ժամկետի վերջին կիրակի օրը (ամենայն հավանականությամբ՝ հոկտեմբերի 27-ին)

Շրջանի Արմենակավան և Խրամորթ համայնքներում ղեկավարների 2-ական թեկնածու ստացել է հավասար թվով առավելագույն կողմ քվեներ, իսկ այդ դեպքում ընտրական օրենսգիրքը սահմանում է վերահաշվարկի գործընթաց: 

Հադրութի շրջանի 30 համայնքների ղեկավարների պաշտոնների համար առաջադրված թեկնածուների ընդհանուր թիվը կազմում է 51: Ընտրված համայնքապետներից 16-ը (50,7%) նորընտիր է: Համայնքապետներից 25-ը (83,3%) անկուսակցական է, 2-ը` «Ազատ հայրենիք» կուսակցության, 2-ը՝ Արցախի ժողովրդավարական կուսակցության և 1-ը՝ ՀՅԴ անդամ:

Մարտակերտի շրջանի 43 համայնքների ղեկավարների պաշտոնների համար առաջադրված թեկնածուների ընդհանուր թիվը կազմում է 77: Ընտրված համայնքապետներից 19-ը (44,2%) նորընտիր է:

Համայնքապետներից 34-ը (79%) անկուսակցական է, 8-ը` «Ազատ հայրենիք» կուսակցության և 1-ը՝ Արցախի ժողովրդավարական կուսակցության անդամ:

Մարտունու շրջանի 35 համայնքների ղեկավարների պաշտոնների համար առաջադրված թեկնածուների ընդհանուր թիվը կազմում է 70: Ընտրված համայնքապետներից 20-ը (57,1%) նորընտիր է:

Համայնքապետներից 25-ը (71,4%) անկուսակցական է, 6-ը՝ «Ազատ հայրենիք» կուսակցության, 1-ը՝ Արցախի ժողովրդավարական կուսակցության և 2-ը՝ ՀՅԴ անդամ: Շրջանի Հերհեր համայնքում նույնպես 2 թեկնածու ստացել է հավասար թվով կողմ քվեներ:

Շահումյանի շրջանի 16 համայնքների ղեկավարների պաշտոնների համար առաջադրված թեկնածուների ընդհանուր թիվը կազմում է 23: Ընտրված համայնքապետներից 8-ը (50%) նորընտիր է:

Համայնքապետներից 12-ը (75,3%) անկուսակցական է, 3-ը՝ «Ազատ հայրենիք» կուսակցության և 1-ը՝ Արցախի ժողովրդավարական կուսակցության անդամ:

Շուշիի շրջանի 7 համայնքների ղեկավարների պաշտոնների համար առաջադրված թեկնածուների ընդհանուր թիվը կազմում է 12:

Ընտրված համայնքապետներից 2-ը (28,6%) նորընտիր է: Համայնքապետներից 6-ը (85,7%) անկուսակցական է, իսկ 1-ը՝ Արցախի ժողովրդավարական կուսակցության անդամ:

Քաշաթաղի շրջանի 54 համայնքների ղեկավարների պաշտոնների համար առաջադրված թեկնածուների ընդհանուր թիվը կազմում է 95: Ընտրված համայնքապետներից 23-ը (42,6%) նորընտիր է:

Համայնքապետներից 11-ը (20,3%) անկուսակցական է, 35-ը (64,8%)՝ «Ազատ հայրենիք» կուսակցության, 3-ը Արցախի ժողովրդավարական կուսակցության և 3-ը՝ ՀՅԴ անդամ: Շրջանի Արախիշ և Հակ համայնքներում նույնպես 2-ական թեկնածու ստացել է հավասար թվով կողմ քվեներ:

Ամփոփելով՝ արձանագրենք, որ նախնական տվյալներով, ընտրված 222 համայնքապետներից 137-ը (60,1%) անկուսակցական է, 65-ը (28,5%)՝ «Ազատ հայրենիք» կուսակցության, 13-ը (5,7%)՝ Արցախի ժողովրդավարական կուսակցության և 7-ը (3,1%)՝ ՀՅԴ անդամ: Եվս 5 համայնքում ընտրության արդյունքները վիճելի են և պահանջում են լրացուցիչ ընտրական միջոցառումներ:

ԱՆԴՐԱՆԻԿ ՀԱՐՈՒԹՅՈՒՆՅԱՆ