«Փոքրիկ խնդիրները չլուծող, մեզ վերջին օգնությունից զրկած կառավարությունն իրավունք ունի՞ նման հայտարարություն անել»

Օրերս Ազգային ժողովն առաջին ընթերցմամբ ընդունեց օրենքի նախագիծ, որով առաջարկվում է անշարժ գույքի շուկայի աստիճանական զարգացման պարագայում ՀՀ-ում ներդնել անշարժ գույքի միասնական գնահատման և հարկման համակարգ: 

Օրենքի նախագիծն ԱԺ-ում բավական բուռն քննարկվեց: ԲՀԿ խմբակցության ղեկավար Նաիրա Զոհրաբյանը հայտնեց, որ այն թերի է, և հնարավոր բոլոր բացասական հետևանքների համար քաղաքական պատասխանատվություն կրելու է քաղաքական մեծամասնությունը:

«Լուսավոր Հայաստան» խմբակցության պատգամավոր Մանե Թանդիլ յանը նշեց՝ նոր օրենքի համաձայն գույքի բազային արժեքի որոշման իրավասությունը տրվում է կառավարությանը, ինչը հակասում է Սահմանադրությանը, քանի որ հարկերը սահմանվում են բացառապես օրենքով: «Իմ քայլը» խմբակցության պատգամավոր Բաբկեն Թունյանն էլ հավելեց՝ անհանգստանալու կարիք ունեն միայն այն մարդիկ, որոնք անշարժ գույքի խոշոր սեփականատեր են և ներկայումս քիչ են հարկվում։

 

Օրենքում առկա բացերի մասին ահազանգ հնչեցրեց Դավիթ Պիպոյանը, ով երիտասարդ մասնագետների համար բնակարանային ապահովության սոցիալական ծրագրի շահառու է: 

Պիպոյանն ընդգծում է՝ օրենքի նախագծի հետ կապված իր մտահոգությունները վերաբերում են բացառապես երիտասարդ գիտնականներին և, մասնավորապես, մատչելի բնակարան ծրագրի շահառուներին: «Միայն երիտասարդները չէ, որ ներառված են եղել այդ ծրագրերում:

Դրանք եղել են մասնագետների, քաղծառայողների համար: Ինչո՞ւ եմ այս կարևոր հանգամանքը շեշտում, որովհետև, երբ կարդում էի օրենքի նախագիծը, հստակ նկատեցի, որ օրենքի՝ մասնավորապես անշարժ գույքի հարկով հարկման նպատակով անշարժ գույքի շուկայական արժեքին մոտարկված կադաստրային գնահատման կարգը սահմանելու մասին կառավարության կողմից սահմանված օրենսդրական փոփոխությունը, որն իրականացվում է, հակասահմանադրական է: 

Իմ մտահոգությանն արձագանքեցին նաև պատգամավորներ՝ ասելով՝ ինչո՞ւ եք անհանգստանում, ձեզ վրա օրենքը թույլ չափով կտարածվի, ձեր հարկը շատ քիչ կբարձրանա:

Պետք է շեշտեմ՝ որևէ մեկն ինձ իրավունք չունի նման բան ասել, որովհետև իմ աշխատավարձը չի վերանայվել, այսինքն՝ կամայական թիրախային խմբին, մասնավորապես գիտնականներին, որոնց աշխատավարձը տարիներով չի վերանայվել, չի կարելի այդքան հանգիստ ասել՝ լավ, թող մի քիչ հարկը բարձրանա:

Խնդիրն իրականում մի քանի հազար դրամի կռիվը չէ, այլ իրավական պետություն դառնալը: 

Նախագծի հեղինակները Հարկային օրենսգրքից հանել են կարգավորումներ և տարել են կառավարության որոշման տիրույթ և, ըստ էության, օրենսդրի գործառույթից հանել են գույքի հարկման արդյունքում գույքահարկի գումարը որոշելու օրենսդրի լիազորությունը: Հիմա ավելի պարզ:

 

Տեսեք՝ բնակելիների արժեքը որոշվելու է, թե ո՞ր տարածքում են գտնվում, նորակառո՞ւյց են, թե՞ ոչ և այլն: Ես իմ բնակարանը ձեռք եմ բերել «Մատչելի բնակարան» ծրագրով, որը լինելու է նորակառույց շենքում, բավական լավ տարածքում:

Բնակարանը ստացել եմ ոչ թե իմ գեղեցիկ աչքերի համար, այլ պետությունը որոշել է խթանել երիտասարդների բնակարանաշինության ծրագիրը, հաշվի է առել, որ մեր աշխատավարձերը ցածր են, և տարիներով աշխատել ենք այդ ցածր աշխատավարձով, և փոխհատուցել է, որպեսզի խթան ունենանք և գնանք, ակադեմիայում աշխատենք: 

Հիմա ինչո՞ւ այն պետք է ոչ թե իմ ձեռք բերած, այլ շուկայական գնով հաշվարկվի: 

 

Իմ աշխատավարձը 70-80 տոկոսով վերանայվե՞լ է, որ իմ հարկն այդքան ավելանա: Ինչո՞ւ պետք է իմ գնած բնակարանը վերագնահատվի: 

Եթե բնակարանը ձեռք եմ բերել կոնկրետ գնով, վարկով՝ 30 տարի մարման ժամկետով, ինչո՞ւ իմ գնած բնակարանը պետք է շուկայական գնով գնահատվի, չէ՞ որ հանրապետության միջին աշխատավարձից գիտնականները շատ ավելի ցածր աշխատավարձ են ստանում:

Մարդիկ տարիներով աշխատել են գիտնական կոչվելու իրավունքին արժանանալու և այդ ծրագրին մասնակից դառնալու համար:

Նման հայտարարություն անելու իրավունք ունի միայն այն օրենսդիրը և գործադիրը, որն առնվազն այդքան դրամով բարձրացրել է երիտասարդ գիտնականի աշխատավարձը»,- «Փաստի» հետ զրույցում ասում է Պիպոյանը՝ ընդգծելով՝ տպավորություն է, որ խոսում ենք մի բանից, բայց անում ենք լրիվ հակառակը: «Կառավարությունը մտածում էր, թե ինչպես անի, որ երիտասարդ կադրերն արտասահմանից հետ գան, իսկ գալուց հետո ի՞նչ է արվել: 

Գիտնականների աշխատավարձերի վերանայո՞ւմ է արվել. ընդամենը երիտասարդ գիտնականների աջակցության ծրագիրն է փակվել: Մի քանի հարյուր հազար դրամով խրախուսվում էինք հոդվածների համար: 

 

Փոքրիկ խնդիրները չլուծող, մեզ այդ վերջին օգնությունից զրկած կառավարությունը իրավունք ունի՞ նման հայտարարություն անել: Երբ գալիս ես և լավ ծրագիրը փակում, պետք է այդ ծրագրին համարժեք որևէ բան առաջարկես:

Այսօր երիտասարդ գիտնականների մեծ մասը, եթե դրամաշնորհային ծրագրեր չի շահել, ստանում է նվազագույն աշխատավարձ, նկատի ունեցեք՝ հանրապետությունում առկա գնաճի և ֆինանսական պայմանների ֆոնին»,-նշում է մեր զրուցակիցը: 

Նա ելք տեսնում է ստեղծված իրավիճակից: «Օրենքի մեջ պետք էր հստակ գրել, որ «Մատչելի բնակարան՝ երիտասարդ մասնագետներին» ծրագրի մասնակիցները պետք է բացառություն լինեն: Այստեղ հարցը ֆինանսը չէ, այլ վերաբերմունքը:

Այս երկրում աշխատել ենք, չենք հեռացել, և պետությունը պետք է հստակ հասկանա, որ երիտասարդ գիտնականներին, մասնագետներին պետք է աչքի լույսի պես պահել ու փայփայել և ոչ թե նմանատիպ նախագծեր անել, և դրանք կոչվեն արդար: Այստեղ ոչ մի արդարություն չկա: 

Նման վերաբերմունքը վկայում է այն մասին, որ մենք միայն խոսում ենք և խոսքից գործին չենք անցնում»,-եզրափակում է Դավիթ Պիպոյանը:

ԼՈՒՍԻՆԵ ԱՌԱՔԵԼՅԱՆ