«Մարդիկ, ում «վերևները» վստահել են, փորձում են համալսարանը ծառայեցնել իրենց անձնական շահերին»

Երևանի պետական համալսարանի շուրջ կրքերը շարունակում են բորբոքվել: ԵՊՀ ուսանողական խորհրդի նախագահ Դավիթ Ափոյանն օրերս ֆեյսբուքյան իր էջում գրառում էր կատարել, որով տեղեկացրել էր, որ ԵՊՀ հարյուրամյակին նվիրված միջոցառումները համակարգող կառավարական հոբել յանական հանձնաժողով չի ստեղծվել, տոնական միջոցառումների անցկացման համար կառավարությունը տրամադրել է ընդամենը 36 մլն դրամ և, ըստ նախնական պայմանավորվածության, թե՛ ԵՊՀ գիտական խորհրդի հանդիսավոր նիստին, թե՛ գլխավոր խորհրդաժողովին երկրի վարչապետն ու նախագահը չեն մասնակցելու։

«Փաստի» հետ զրույցում, խոսելով ստեղծված իրավիճակի մասին, Ափոյանը նշում է՝ ցավն այն է, որ ընդհանրապես վերաբերմունք չկա Երևանի պետական համալսարանի նկատմամբ: «Հիմա ԵՊՀ-ն անտարբեր վիճակում է հայտնվել, որևէ մեկին չի հուզում, թե համալսարանն ո՞ւր կգնա, ի՞նչ կլինի:

Համալսարանը մի քանի հոգու պատասխանատվության տակ է, որոնք ո՛չ համալսարանի հոգսերով են ապրում, ո՛չ իրենց հետաքրքրում է, թե համալսարանն ինչ կլինի: Իրենց կյանքում մատը մատին չեն տվել համալսարանի համար մի բան կառուցելու, քարը քարին դնելու համար: Երկրի քաղաքական ընդհանուր վիճակը խառն է, պատասխանատու լիազոր մարմինները չեն հասցնում հետաքրքրվել այս հարցերով, և համալսարանը մնացել է ստվերում:

Ու այդ մարդիկ, ում «վերևները» վստահել են, փորձում են համալսարանը ծառայեցնել իրենց անձնական շահերին: Իմ խորին համոզմամբ, համալսարանը ենթարկվում է մեծ ճնշումների: 

Ունենք հոգաբարձուների խորհուրդ, որտեղ հարցերը չեն քննարկվում՝ ի շահ համալսարանի: Դրանք խորը վերլուծության չեն ենթարկվում:

Եթե հոգաբարձուների խորհրդի կազմին նայեք, այն հիսուն տոկոսին, որն առաջադրվել է կառավարության կողմից, վստահ եմ՝ այդ կազմից շատերին՝ ութսուն տոկոսին որ հարցնեք, իրենք չգիտեն՝ ինչի համար են եկել ու քվեարկել:

Ուղղակի տեսել են, որ հոգաբարձուների խորհրդի նախագահն առաջարկել է այդ հարցը, կողմ են արտահայտվել:

Մարդը քվեարկում է, կառուցվածքային փոփոխության վերաբերյալ որոշում է կայացնում, բայց որևէ վերլուծություն չի անում, այս դեպքում ցանկացած տրամաբանող մարդու մոտ հարց է առաջանում. այդ մարդն ի՞նչ հիմքով է կողմ կամ դեմ քվեարկել, ո՞րն է նրա համոզմունքը: 

Այդ մարդը երբեք չի մտել համալսարան, չի տեսել, թե այն ինչ հոգսերով է ապրում, ինչի կարիք ունի, բայց կողմ է քվեարկում: Այստեղ այլ կարծիք լինել չի կարող, քան այն, որ մարդն իմիջիայլոց քվեարկում է: Նրանց էլ պետք չի մեղադրել, մեղավորներին, այդ անտարբերությունը պետք է ավելի վերև փնտրենք»,-ասում է ԵՊՀ ուսխորհրդի նախագահը:

Նա նշում է՝ օրերս ԵՊՀ գիտական խորհրդի ուսանող անդամները դիմեցին համալսարանի ռեկտորի ժամանակավոր պաշտոնակատար Գեղամ Գևորգյանին՝ ԵՊՀ գիտխորհրդի արտահերթ նիստ հրավիրելու նախաձեռնությամբ: «Ուսանողները նախաձեռնեցին գիտական խորհրդի արտահերթ նիստ, որպեսզի քննարկեն գիտական խորհրդի դերի բարձրացման հարցը:

Հոգաբարձուների խորհուրդը, որը համալսարանի գլխավոր ղեկավար մարմինն է, որոշումներ է կայացնում, որոնց հիմնական կատարողը գիտխորհրդի անձնակազմն է: Բայց տեսնում ենք, որ գիտխորհրդի կարծիքն ընդհանրապես հաշվի չի առնվում: Պնդում ենք, որ գիտխորհրդի կարծիքը հաշվի առնեն, նախապես հարցերը քննարկեն ու առաջադրվածը չխեղաթյուրեն:

Ես բոլորովին չեմ խոսում վետո ունենալու իրավունքի մասին:

Եթե մի քանի ամիս հետ գնանք, տեսնում ենք, որ գիտխորհրդի և հոգաբարձուների լիազորություններն ամբողջությամբ խախտվում են: Ինչ է ստացվում՝ գիտխորհուրդն առաջարկում է հոգաբարձուների խորհրդի հաստատմանը կառուցվածքային ստորաբաժանում, բայց տեղում հոգաբարձուների խորհուրդը խեղաթյուրում է այդ առաջարկը, որի իրավունքը չունի: 

Ինքը կա՛մ պետք է հաստատի, կա՛մ չհաստատի:

Տեղում այդ սխեմայից մի քանի ստորաբաժանում ջնջում են՝ ըստ իրենց սուբյեկտիվ նպատակահարմարության, և հաստատում են, մինչդեռ գիտական խորհուրդն իրենց ուրիշ բան է առաջարկել: Գիտական խորհուրդը դեմ է, որ Բյուրականի ուսումնարտադրական բազան վաճառվի, մեկ էլ, չգիտես ինչպես, օրակարգում հայտնվում է այն, որ բազան պետք է վաճառվի:

Սրանք արգելքներ են համալսարանի առաջ, որոնք օր առաջ պետք է կանխվեն: Այս խնդիրն օրհասական է և պետք է լուծում ստանա: Գիտխորհրդի դերը պետք է բարձրանա համալսարանում: Գիտխորհուրդն աշխատում է համալսարանի համար, մտահոգված է խնդիրներով, մինչդեռ նրա կարծիքը հաշվի չի առնվում»,-նշում է մեր զրուցակիցը:

Հետաքրքրվում եմ՝ ուսանողները, համալսարանի գիտխորհուրդն իրենց մտահոգություններով կիսվե՞լ են ԿԳՄՍ նախարար Արայիկ Հարությունյանի հետ: Ափոյանը բացասական պատասխան է տալիս: 

«Եթե նախարարը մտահոգված լիներ բուհով, ոչ միայն հիմա, այլ չորսհինգ ամիս առաջ տեսած կլիներ, թե բուհում ինչ է կատարվում: Բազմաթիվ քննարկումներ, մամուլի անդրադարձներ եղան, բայց նախարարը չկա: Եթե նախարարը չի հետաքրքրվում, ես գնամ, նախարարից ի՞նչ պահանջեմ»,-եզրափակում է ԵՊՀ ուսխորհրդի նախագահը:

 

Հ. Գ. Երեկ ԵՊՀ գիտխորհրդի արտահերթ նիստը չկայացավ. օրակարգը չհաստատվեց:

ԼՈՒՍԻՆԵ ԱՌԱՔԵԼՅԱՆ