Հայկական պատվիրակությունը քննարկում է ԵԽԽՎ-ում իր գործունեության ռազմավարությունը

 Եվրոպայի խորհրդի խորհրդարանական վեհաժողովում Հայաստանի պատվիրակության ղեկավար Հերմինե Նաղդալյանը վստահեցնում է, որ այս պահին արվում է ամեն ինչ վեհաժողովի լիագումար նիստում հակահայկական զեկույցների ընդունումը կանխելու համար: Ազգային ժողովում լրագրողների հետ զրույցում Նաղդալյանը նկատեց, որ այդ ուղղությամբ աշխատանքներ է տանում ինչպես պավիրակությունը, այնպես էլ խորհրդարանի ղեկավարությունը և ՀՀ ԱԳՆ-ն: «Այս պահին մենք քննարկում ենք բոլոր այն հնարավոր քայլերը, որոնք կարող են մեզ համար օգտակար լինել և թույլ կտան մեզ լիագումար նիստի ժամանակ բեկում մտցնել գործընթացում: Թե ինչ քայլեր մենք կանենք, կլինի դա հայտարարություն, թե մեկ այլ քայլ, մենք կորոշենք քննարկումների արդյունքներով: Իսկ երբ կայացվի որոշում, դուք կիմանաք այդ մասին: Ես պետք է ասեմ նաև, որ միջազգային խորհրդարանական այլ հարթակներում աշխատող մեր պատգամավորները ևս քայլեր են ձեռնարկում իրենց գործընկերների միջոցով ազդեցություն ունենալու այն պատվիրակությունների վրա, որոնք աշխատում են Եվրոպայի խորհրդի խորհրդարանական վեհաժողովում»,- ընդգծեց Նաղդալյանը:

Նա անդրադարձավ նաև վեհաժողովի ձմեռային նստաշրջանը բոյկոտելու մասին խոսակցություններին՝ նշելով, որ դա լավագույն տարբերակը չի համարում: «Մեր պատվիրակությունը նստաշրջանը բոյկոտելու հարցը չի էլ քննարկել, որովհետև մենք հիմա քննարկում ենք բոլոր այն տարբերակները, որոնք մեզ համար կարող են օգտակար լինել: Այլ քայլերի մենք կդիմենք, եթե զգանք, որ ուրիշ տարբերակ չունենք: Հնարավոր է, որ մենք նման որոշում ունենանք լիագումար նիստից առաջ՝ կախված նրանից, թե ինչպես կզարգանան իրադարձությունները»,- հավելեց Հերմինե Նաղդալյանը:

Անդրադառնալով ԵԽԽՎ-ում հայաստանյան պատվիրակության կազմի փոփոխության մասին խոսակցություններին՝ Հերմինե Նաղդալյանը հաստակեցրեց, որ պատվիրակության կազմը որոշում են խմբակցությունները, որոնք կարող են փոխել իրենց խմբակցության անդամին, եթե գտնում են, որ նա թերացել է իր աշխատանքներում: «Եթե խմբակցությունները կգտնեն, որ իրենց պատվիրակները լավ չեն կատարել իրենց աշխատանքը ու որոշեն փոխել նրանց, դա կլինի իրենց որոշումը: Իսկ Հանրապետական կուսակցությունը վեհաժողովում պատվիրակության կազմ փոխելու հարց չի քննարկում»,- մանրամասնեց ԵԽԽՎ հա յաստանյան պատվիրակության ղեկավարը:

ԵԽԽՎ քաղաքական հանձնաժողովը 24 կողմ, 16 դեմ ձայների հարաբերակցությամբ բրիտանացի պատգամավոր Ռոբերտ Ուոլթերի՝ «Բռնության աճը Լեռնային Ղարաբաղում և Ադրբեջանի այլ գրավյալ տարածքներում» հակահայկական զեկույցը ներառել է վեհաժողովի լիագումար նիստի օրակարգ: Ուոլթերն օգտագործել է այնպիսի հակահայկական և ոչ ճշգրիտ ձևակերպումներ, ինչպիսիք են` «հեռացնել Հայաստանի եւ այլ անկանոն զինված ուժերը Լեռնային Ղարաբաղի ու Ադրբեջանի այլ գրավյալ տարածքներից, ապահովել Ադրբեջանի տարածքների ամբողջականությունը»:

ԵԽԽՎ սոցիալական հարցերի հանձնաժողովը ձայների 9 դեմ, 16 կողմ հարաբերակցությամբ ընդունել է Սարսանգի ջրամբարի վերաբերալ հակահայկական զեկույցը: Հանձնաժողովի նիստին հայկական պատվիրակությունից մասնակցել են Վահան Բաբայանը և Նաիրա Կարապետյանը: ԵԽԽՎ-ն ընդունել է բոսնիացի պատգամավոր Միլիցա Մարկովիչի խիստ կողմնակալ և քաղաքական բառապաշարով զեկույցը: Զեկույցը կրում է «Ադրբեջանի սահմանամերձ շրջանների բնակիչները միտումնավոր զրկված են ջրից» խորագիրը: