2025 թվականին Հայաստանի և Արցախի միջև զանգերի սակագինը կկազմի 5 դրամ.

«Փաստ» օրաթերթը դեռևս հուլիսին անդրադարձել էր Արցախի տարածքում գործող ռոումինգի բարձր սակագներին: Պարզել էինք, որ Արցախում գտնվելիս պետք է պատրաստ լինենք մուտքային և ելքային զանգերի համար վճարել 38-45 դրամ:

Դեռևս 2018 թվականին Արցախի նախկին պետնախարարը դիմել էր ՀՀ-ում գործող կապի երեք օպերատորներին՝ Արցախում ևս կապի և հեռահաղորդակցության ոլորտում ծառայություններ մատուցելու առաջարկով: 

Կատարված աշխատանքի մասին տեղեկանալու համար դեռևս ամիսներ առաջ դիմել էինք Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովին, որտեղից մեզ հայտնել էին, որ հայաստանյան օպերատորներից երկուսը՝ «ՄՏՍ Հայաստան» (Վիվասել) և «ՎԵՈՆ Արմենիա» (Բիլայն) ընկերությունները, Արցախում կապի և հեռահաղորդակցության ոլորտում ծառայություններ մատուցելու ցանկություն չեն հայտնել՝ պատճառաբանելով հայաստանյան հեռահաղորդակցության շուկայում նոր ներդրումների իրականացման անհրաժեշտության առկայությամբ, իսկ երրորդն էլ ընդհանրապես չէր արձագանքել նախկին պետնախարարի առաջարկին: 

Հանձնաժողովից մեզ տեղեկացրել էին, որ Արցախում կապի և հեռահաղորդակցության ծառայությունների սակագների վերանայման արդյունքում նվազել են մի շարք ծառայությունների սակագներ՝ հետվճարային համարների բաժանորդավճարը նվազել է 50%- ով, բջջային, ֆիքսված և անլար ֆիքսված միջերես հեռախոսակապերի ծառայությունների սակագները՝ միջինը 13%-ով և այլն:

«Փաստը» նաև դիմել էր հայաստանյան երեք օպերատորներին, որոնք մեզ հետ զրույցում ընդգծել էին, որ քայլեր են ձեռնարկվում Արցախում ևս մեր քաղաքացիներին ավելի մատչելի սակագներով ծառայություններ մատուցելու ուղղությամբ:

Օրերս ՀՀ հանրային ծառայությունները կարգավորող հանձնաժողովը իրավական ակտերի նախագծերի հրապարակման միասնական կայքում շրջանառության մեջ է դրել նախագիծ, որով նախատեսվում է ըստ ժամանակացույցի, 2020 թվականի հունվարի 1-ից, յուրաքանչյուր տարի աստիճանաբար նվազեցնել «Ղարաբաղ Տելեկոմ» ընկերության և «ՎԵՈՆ Արմենիա», «ՄՏՍ Հայաստան» ու «Յուքոմ» ընկերությունների շարժական կապի ցանցերի, շարժական ու ամրակցված կապի ցանցերի միջև փոխկապակցման ծառայությունների առավելագույն վճարները՝ 2025 թվականի հունվարի մեկից հետո այն սահմանելով 5 դրամ/րոպե (առանց ԱԱՀ):

Նախագծի մշակման գործընթացում, բացի ՀՀ հանրային ծառայությունները կարգավորման հանձնաժողովից, մասնակցել են Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովը, ՀՀ և ԱՀ հանրային էլեկտրոնային հաղորդակցության ցանցի օպերատորները:

Նախագծում նշված է, որ 2019 թվականի սեպտեմբերի 6-ին ՀՀ հանրային ծառայությունները կարգավորող հանձնաժողովի, Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի և «ՎԵՈՆ Արմենիա», «ՄՏՍ Հայաստան», «Ղարաբաղ Տելեկոմ» փակ բաժնետիրական ու «Յուքոմ» սահմանափակ պատասխանատվությամբ ընկերությունների միջև ստորագրվել է փոխկապակցման վճարների և ռոումինգի ծառայությունների սակագների վերաբերյալ փոխըմբռնման հուշագիր, որի համաձայն նախատեսվել է՝ ըստ ժամանակացույցի՝ 2020 թվականի հունվարի 1-ից մինչև 2025 թվականի հունվարի 1-ը, աստիճանաբար նվազեցնել ՀՀ և ԱՀ օպերատորների շարժական ու ամրակցված կապի ցանցերի միջև փոխկապակցման ծառայությունների առավելագույն վճարները: 

Ընդ որում՝ ըստ նախագծի 2025 թվականի հունվարի մեկից հետո վճարի սակագին կսահմանվի 5 դրամը մեկ րոպեի համար (առանց ԱԱՀ): 

Նշենք, որ նախագծում նշված չէ, թե ինչ ժամանակում որքան պետք է նվազեն սակագները՝ մինչև 5 դրամի հասնելը: 

Այս փոփոխությունների արդյունքում ակնկալվում է, որ ՀՀ և ԱՀ շարժական ու ամրակցված կապի ցանցերի միջև փոխկապակցման ծառայությունների նվազեցումը հնարավորություն կընձեռի օպերատորներին նվազեցնել ՀՀ և ԱՀ միջև գործող հեռախոսային ծառայությունների վճարները, ինչը կնպաստի բաժանորդների կողմից նշված ծառայություններից օգտվելու ծավալների աճին:

ԼՈՒՍԻՆԵ ԱՌԱՔԵԼՅԱՆ