2020 թվականին Կարեն Դեմիրճյանի արձանը կտեղադրվի. Նիկոլ Փաշինյանը՝ Ռիմա Դեմիրճյանին

 

2020 թվականին Կարեն Դեմիրճյանի արձանը կտեղադրվի, այսօր` հոկտեմբերի 27-ին, ՀՀ վարչապետ Նիկոլ Փաշինյանն է ասել Կարեն Դեմիրճյանի այրուն` Ռիմա Դեմիրճյանին, ԱԺ բակում, Հոկտեմբերի 27-ի ոճրագործության զոհերի հուշարձանի մոտ:

«Հույս ունենք հասցնել 2020 թվականին, մենք մեզնից կախված ամեն ինչ արել ենք, մի հատ էլ կարագացնենք»,- ասել է վարչապետը տիկին Դեմիրճյանին, վերջինս էլ համոզմունք է հայտնել, որ արձանը կկանգնեցվի:

Լրագրողների հետ զրույցում Ռիմա Դեմիրճյանն ասել է, որ Հոկտեմբերի 27-ի դատաիրավական նոր զարգացումներից առանձնապես ակնկալիքներ չունի, բայց միշտ էլ հույս կա:

«Ես առանձնապես ակնկալիքներ չունեմ, բայց միշտ էլ հույս կա: Քանի որ դա շատ կարեւոր հարց է հասարակությանը հանգստացնելու համար, ոչ միայն մեզ համար, դա պետք է արվի, բայց արվի շատ զգուշավոր, օբյեկտիվ, համոզիչ, այ այդպես պետք է լինի, որովհետեւ մեր նպատակն է հանգստացնել մթնոլորտը»,- ասել է Կարեն Դեմիրճյանի այրին:

«Պետք է կամ բացահայտվի կամ ամեն ինչ անեն եւ հետո ասեն` ժողովուրդ, չի բացահայտվում, բայց համոզիչ լինեն», նշել է Ռիմա Դեմիրճյանը:

Հիշեցնենք, որ 20 տարի առաջ տեղի ունեցած ոճրագործության հետեւանքով զոհվեցին ՀՀ ԱԺ նախագահ Կարեն Դեմիրճյանը, վարչապետ Վազգեն Սարգսյանը, ԱԺ փոխնախագահներ Յուրի Բախշյանը եւ Ռուբեն Միրոյանը, ԱԺ պատգամավորներ Արմենակ Արմենակյանը, Հենրիկ Աբրահամյանը, Միքայել Քոթանյանը եւ օպերատիվ հարցերով նախարար (փաստացի կատարել է փոխվարչապետի գործառույթներ) Լեոնարդ Պետրոսյանը:

Զինված անձինք էին Նաիրի Հունանյանը, Կարեն Հունանյանը, Էդուարդ Գրիգորյանը, Վռամ Գալստյանը, Դերենիկ Բեջանյանը:

Հոկտեմբերի 27-ին տեղի ունեցած գործողությունների ղեկավարը Նաիրի Հունանյանն էր: Հետագայում Նաիրի Հունանյանը ցուցմունք տվեց և հայտարարեց, թե ինքը պետական մակարդակով ահաբեկչական ծրագրեր է ունեցել 1991 թվականին, բայց հանգամանքների բերումով չի կարողացել իրագործել:

Նշենք, որ «հոկտեմբերի 27-ի» գործով դատավճիռը հրապարակվել է 2003 թվականի դեկտեմբերի 2-ին:

Կենտրոնի դատարանի վճռով՝ 6 անձ դատապարտվել է ցմահ, մեկ անձ՝ 14 տարվա ազատազրկման: