Ի՞նչ փաստաթղթեր են անհրաժեշտ ընտանեկան կարգավիճակի մասին տեղեկանք ստանալու համար, և որքա՞ն է կազմում պետական տուրքի դրույքաչափը

«Փաստ» օրաթերթը շարունակում է ներկայացնել «Ճանաչեք և պաշտպանեք ձեր իրավունքները» խորագիրը: Շատ են դեպքերը, երբ քաղաքացիները չեն կարողանում պաշտպանել իրենց իրավունքները, քանի որ իրազեկված չեն, իսկ երբեմն էլ որոշ պետական հիմնարկներ էլ ավելի են շփոթեցնում նրանց: 

Օրաթերթը, համագործակցելով ՀՀ փաստաբանների պալատի հետ, այսուհետ հանրային իրազեկման արշավ է կազմակերպում, որը կօգնի մեր քաղաքացիներին իմանալ և պաշտպանել իրենց իրավունքները: Նշենք նաև, որ յուրաքանչյուր հինգշաբթի՝ ժամը 10:00-ից մինչև 17:00-ն փաստաբանների պալատի հանրային պաշտպանի գրասենյակն անվճար խորհրդատվություն է տրամադրում ՀՀ բոլոր քաղաքացիներին:

Հարց.-Ի՞նչ փաստաթղթեր են անհրաժեշտ ընտանեկան կարգավիճակի մասին տեղեկանք ստանալու համար, և որքա՞ն է կազմում պետական տուրքի դրույքաչափը։ 

Պատասխանում է փաստաբան Էդգար Գրիգորյանը։

Տեղեկանք ստանալու համար տեղեկանք հայցողը կամ նրա կողմից օրենքով սահմանված կարգով լիազորված անձը պետք է ՀՀ արդարադատության նախարարություն ներկայացնի.

1. տեղեկանք հայցողի (եթե անձամբ է դիմել ) անձը հաստատող փաստաթուղթ, 

2. բնակության ՔԿԱԳ տարածքային բաժնից տրված տեղեկանք՝ ամուսնության ակտի բացակայության մասին, իսկ եթե նախկինում ամուսնացած է եղել, ապա նաև ամուսնության դադարման փաստը հաստատող փաստաթղթի պատճենը,

 3. սահմանված ձևի դիմում-հայտարարություն՝ տեղեկանք հայցողի ամուսնության համար արգելք հանդիսացող հանգամանքների բացակայության հավաստման և տեղեկանք հայցողի կողմից ՔԿԱԳ-ի մարմիններին սուտ տեղեկություններ հայտնելու մասին նախատեսված պատասխանատվության մասին նախազգուշացված լինելու վերաբերյալ, 

4. լիազորագիր և լիազորվածի անձը հաստատող փաստաթուղթ լիազորված անձանց կողմից դիմում ներկայացնելու դեպքում: Լիազորագիրը պետք վավերացված լինի նոտարի կամ նոտարական գործողություններ կատարելու իրավասություն ունեցող անձի կողմից: Եթե տեղեկանք ստանալու համար դիմումը ներկայացրել է դիմողի ծնողը, ապա նա ներկայացնում է նաև`

1. իր անձը հաստատող փաստաթուղթ, 

2. տեղեկանք հայցողի անձը հաստատող փաստաթղթի և ծննդյան վկայականի պատճենները, 

3. սահմանված ձևի դիմում: Այն դեպքում, երբ ընտանեկան կարգավիճակի մասին տեղեկանք ստանալու դիմումը ներկայացվում է լիազորված անձի կամ ծնողի կողմից, ապա ՀՀ տարածքից դուրս գտնվող տեղեկանք հայցողը տալիս է նոտարական կարգով հաստատված հայտարարություն՝ ամուսնության համար արգելք հանդիսացող հանգամանքների բացակայության հավաստման և ՔԿԱԳ-ի մարմիններին սուտ տեղեկություններ հայտնելու մասին նախատեսված պատասխանատվության մասին նախազգուշացված լինելու վերաբերյալ, որն ենթակա է ապոստիլով (APOSTILLE) հաստատման և նոտարական կարգով հաստատված հայերեն թարգմանության: 

Եթե պետությունը «Օտարերկրյա պաշտոնական փաստաթղթերի օրինականացման պահանջը չեղյալ հայտարարելու մասին» 1961թ. Հաագայի կոնվենցիայի անդամ չէ, ապա փաստաթղթերը ենթակա են հյուպատոսական վավերացման: 

ՀՀ միջազգային պայմանագրերով նախատեսված առանձին երկրների պարագայում որևէ հաստատում անհրաժեշտ չէ:

Ընտանեկան կարգավիճակի մասին տեղեկանք տրամադրելու համար գանձվում է պետական տուրք՝ 1000 ՀՀ դրամ: 

Երկու աշխատանքային օրվա ընթացքում ծառայությունը մատուցելու համար՝ 12000 ՀՀ դրամի չափով: 

Նշված դիմումների ձևերը կարող եք ձեռք բերել ՀՀ արդարադատության նախարարության կայքից՝ www.moj.am հասցեով կամ ՔԿԱԳ մարմնից: