«Ես շատ էի սխալվել, մեկ երազանքը «Շանթ»-ում շատ քիչ է, այստեղ բոլոր երազանքներդ են կատարվում». Աննա Գրիգորյան (լուսանկարներ)

 

 

«Շանթ» հեռուստաընկերության «Ազգային երգիչ» նախագծի 6-րդ գալա համերգի քվեարկության արդյունքում նախագծից հեռացավ Աննա Գրիգորյանը: Անցած ճանապարհի, ձեռբերումների, դժվարությունների և այլնի մասին ArenaNews.am կայքը զրուցել է մասնակցի հետ:

 

–Աննա, հանդիսատեսի քվերակության արդյունքները որքանո՞վ էին անակնկալ Ձեզ համար, սպասու՞մ էիք, որ այս անգամ նախագիծը Դուք կլքեք։

 

-Ճիշտն ասած՝ գրեթե ամեն գալայից առաջ մտածում էի, որ հնարավոր է հենց ես  դուրս մնամ նախագծից, բայց այս գալայի ընթացքում շատ հանգիստ էի. մտքովս չէր անցնում, որ ես կլքեմ նախագիծը։ Նախապատրաստական ողջ ընթացքում կենտրոնացել էի Հարութի հետ ներկայացրած զուգերգը լավ կատարելու մտքի վրա ։

 

 

 

-Ինչի՞ հետ եք կապում դուրս մնալը՝ նախորդ անգամ ոչ այնքան լա՞վ եք երգել, թե՞ մրցակցությունն է էլ ավելի թեժացել։

 

-Նախորդ ելույթիցս շատ գոհ եմ, հանդիսատեսին էլ էր դուր եկել. Կարծում եմ՝ ինչքան քիչ մասնակից է մնում նախագծում, այնքան ավելի թեժանում է ամեն ինչ: Իմ կողքին, իհարկե, մեծ բանակ էր կանգնած, բայց այս անգամ ձայները փոքր-ինչ քիչ են եղել, դրա համար էլ դուրս մնացի:

 

-Այս ընթացքում ամենաշատը հարցնելու են՝ ի՞նչ տվեց նախագիծը Ձեզ՝ հմտություններից մինչև ընկերներ. ես էլ բացառություն չլինեմ, խնդրեմ, որ կիսվեք տպավորություններով:

 

-Նախագիծն իմ կյանքում շատ մեծ դեր ունի, կյանքում չեմ մոռանա այստեղ անցկացրած և ոչ մի օր։ Իմ առջև մեծ դուռ է բացվել, որովհետև միայն այն, որ քեզ ճանաչում են, դրսում ասում են՝ «վայ, Ազգայինի երգիչներից է», «վայ, մեր Աննան է», շատ հաճելի է։ Ամենակարևորը՝ ես այստեղ մեծ փորձ եմ ձեռք բերել՝ հանդիսատեսի հետ շփման, բեմում կանգնելու, բեմական խոսելու, մի խոսքով ամեն ինչ այստեղ սովորել եմ։

 

–Դժվարություններ հաղթահարե՞լն էլ:

 

-Դժվարություններ, այո, եղել են․ օրինակ՝ մեր առջև խնդիր կար, որ մեկ շաբաթում պետք է երգերը շատ արագ սովորեինք. մտածում էի՝ մեկ շաբաթում չեմ հասցնի ինձ անծանոթ երգն այնպես սովորել, որ և բառերը չմոռանամ, և նորմալ մատուցեմ։ Բայց հաղթահարեցի, ես ինքս ինձ վրա զարմանում էի՝ ինչպես եմ ամեն շաբաթ նոր երգ, նոր կերպար ստանում։ Վաղ առավոտից մինչև ուշ երեկո «Շանթ»-ում էինք, ու ինչ դժվարություն էլ եղել է, միաժամանակ նաև շատ հաճելի էր։

 

 

 

-Դուք նաև սովորում էիք, դասերի հետ ինչպե՞ս էիք համատեղում այդ զբաղվածությունը ։

 

-Այո, սովորում եմ Ռոմանոս Մելիքյանի անվան երաժշտական ուսումնարանում, երկրորդ կուրս եմ։ Այս ընթացքում այնտեղ ինձ շատ ընդառաջեցին, քաջալերում էին, ասում էին՝ հիմա գնա փորձերիդ, հետո բացը կլրացնենք։

 

-Ձեր լավագույն ելույթը։

 

-Իմ ամենալավ ելույթը, որ և ինձ մոտ է տպավորվել, և լսարանից եմ շատ դրական արձագանք ստացել, եղել  է Սիրուշոյի «Զոմա-զոմա» երգը։ Երբ մեր պրոդյուսեր Գիսանե Պալյանը երգն ինձ տվեց, մոտս մտավախություն կար։ Մտածում էի՝ երգը նոր է դուրս եկել, ես ինչպ ե՞ս պիտի ներկայացնեմ, որ ինձ մոտ էլ լավ ստացվի, որ ոչ թե ասեն՝ Սիրուշոյից վատ երգեց, այլ ասեն՝ ներկայացրեց իր ձևով։

 

Մեկ շաբաթում կարողացանք ստանալ այն, ինչ ուզում էինք։ Այդ երգի ժամանակ ինձ միացել էին իմ ընկերները՝ Ռազմիկն ու Մհերը, որոնք նույնպես նախագծից էին։ Համարում եմ, որ բոլոր առումներով այդ երգն ինձ մոտ հրաշալի ստացվեց։

 

–Աննա, ունե՞ք նախագծում ֆավորիտ։

 

-Մնացել են իմ 4 լավագույն ընկերները։ Անժելայի հետ շատ եմ մտերմացել, դարձել է ինձ հարազատ ընկերուհի. ստացվեց այնպես, որ բեմում մենք երկուսս մնացինք, ինչը շատ անսպասելի էր, ու երկուսս էլ շատ էինք տխրել։ Երբ ասացին, որ Անժելան է մնում նախագծում, ես ավելի շատ ուրախացա, Անժելան հուզվեց։ Համարում եմ, որ ամենաերջանիկ մարդն եմ, որ Անժելային գտել եմ այս նախագծում. ամեն ինչ անելու եմ, որ իր համար լավ լինի։

 

Մյուսներին  ևս շատ սիրում ու հաջողություն եմ մաղթում. և Հարությունի, և էդգարի հետ դուետներ եմ ունեցել, միասին աշխատել ենք ու հիացած եմ իրենցով։

 

 

 

-Հագեցած գրաֆիկից՝ փորձերից, նկարահանումներից հետո, հիմա Ձեր օրը ինչպե՞ս եք կազմակերպելու, արդեն զգու՞մ եք բացը։

 

-Դուրս մնալու օրը շատ էի տխրել, մտածում էի հիմա, որ առավոտյան վեր կենամ վե՞րջ, էլ «Շանթ» հեռուստաընկերություն չե՞մ գնալու: Բարեբախտաբար, ստացվեց այնպես, որ ինձ զանգահարեցին ու ասեցին, որ հաջորդ օրն էլի փորձի եմ, իմ ընկերներին բեք վոկալ է պետք, օգնելու եմ իրենց։ Այնպես, որ դեռ չեմ հասցրել հեռու գնամ, որ կարոտեմ։

 

Այդւոհանդերձ, ուզում եմ շնորհակալություն հայտնել նախագծի պրոդյուսեր Աննա Թադևոսյանին, որովհետև Աննայից անասելի մեծ դասեր եմ վերցրել այս նախագծում։ Աննան հատուկ նրբանկատությամբ է վերաբերում ամեն ինչի՝ սկսած հագուստից, մազերից. ցանկացած մանրուքի ուշադրություն է դարձնում, որ ամեն ինչ իդեալական լինի։ Ես այս նախագիծ էի եկել այսպես մի փոքր բան սովորած, բայց սովորել եմ շատ բան հենց նրա շնորհիվ։

 

Ուզում եմ «Շանթի» ողջ անձնակազմին շնորհակալություն հայտնել, որովհետև մեզ հետ շատ աշխատանք է տարվել։ Նաև ընտանիքիս եմ շնորհակալ. սկզբում վախենում էի, մտածում էի՝ չեմ կարող, բայց ինձ հետ եկան առաջին իսկ պահից, ասում էին՝ կստացվի ու ստացվեց։

 

Իմ առաջին հարցազրույցում նշել էի, որ ցանկանում եմ իմ երազանքներն այստեղ մի փոքր կատարվեն, բայց ես շատ էի սխալվել, մեկ երազանքը «Շանթ»-ում շատ քիչ է, այստեղ բոլոր երազանքներդ են կատարվում։