Գո­նե այն­պի­սին լի­նենք միմյանց նկատմամբ, ինչ­պես հուն­վա­րի 1-ին ենք.կհան­դի­պենք տո­նե­րից հե­տո

2019 թվականը մեկ բառով կարելի է բնորոշել հակասությունների տարի: Տարի, երբ առատ էին խոստումները, խոսքը, երկակի ստանդարտները, հիասթափությունները, դժգոհությունները: Բայց և տարի, որի ընթացքում եղել են նաև որոշակի ձեռքբերումներ, որոնք անտեսելը պարզապես անթույլատրելի է: 

Սակայն այս ամենի հետ ամենամտահոգիչը անցնող տարում եղել է ներհասարակական թշնամանքի, չարության, հայհոյանքի ու վիրավորանքի չափաբաժնի անհամեմատ մեծացումը: 

Այս մտահոգության մասին բարձրաձայնել ենք ողջ տարվա ընթացքում, գրեթե յուրաքանչյուր համարում: Չենք հոգնում կրկնել՝ այս ամենը դեպի անդունդ տանող ճանապարհ է, պառակտումը պատմականորեն որևէ ազգի ու ժողովրդի հաջողություն չի բերել: Առջևում տոներ են, ամենասիրված, ամենաընտանեկան, ամենահարազատական երկու տոները՝ Ամանորն ու Սուրբ ծնունդը:

 Սիրով շնորհավորում ենք Հայաստանի, Արցախի ու աշխարհասփյուռ ողջ հայության տոները: Պարզապես ցանկանում ենք, որ ապրենք խաղաղ, անփորձանք, առանց դավադրությունների ու դավադրապաշտականության, առանց չարության ու հայհոյանքի, առանց քինախնդրության ու վրեժխնդրության: 

Պարզապես ցանկանում ենք, որ բոլորս միմյանց նկատմամբ ամեն օր լինենք գոնե այնպիսին, ինչպիսին լինում ենք հունվարի 1-ին:

Կհանդիպենք: Կհանդիպենք տոներից հետո...