Վիլնյուսում կայացել է հայ-լիտվական միջկառավարական հանձնաժողովի նիստը

Վիլնյուսում նոյեմբերի 27-ին տեղի է ունեցել առևտրատնտեսական համագործակցության հայ-լիտվական միջկառավարական հանձնաժողովի անդրանիկ նիստը: Ինչպես«Արմենպրես»-ին տեղեկացրին ՀՀ էկոնոմիկայի նախարարության լրատվական ծառայությունից, նիստին ողջույնի խոսքով հանդես են եկել միջկառավարական հանձնաժողովի հայկակա ն կողմի համանախագահ, ՀՀ էկոնոմիկայի նախարար Կարեն Ճշմարիտյանը և լիտվական կողմի համանախագահ, Լիտվայի Հանրապետության էկոնոմիկայի նախարար Էվալդաս Գուստասը:

Իր ողջույնի խոսքում, շնորհակալություն հայտնելով Լիտվայի կառավարությանը ջերմ ընդունելության համար, Կարեն Ճշմարիտյանը համառոտ ներկայացրել է Հայաստանի տնտեսական քաղաքականությունը, հայ-լիտվական տնտեսական համագործակցության ներկա պատկերը և հնարավոր զարգացումները: Եզրափակելով խոսքը, Հայաստանի էկոնոմիկայի նախարարը նշել է, որ երկկողմ առևտրային և ներդրումային հարաբերությունների ներկայիս մակարդակը ամբողջովին չի արտացոլում երկու երկրների տնտեսական ողջ ներուժը և հույս է հայտնել, որ կառուցողական երկխոսության և փոխըմբռնման միջոցով հնարա վոր կլինի նոր մակարդակի բարձրացնել հայ-լիտվական տնտեսական համագործակցությունը:

Լիտվայի Հանրապետության էկոնոմիկայի նախարար Էվալդաս Գուստասն իր հերթին նշել է, որ երկու երկրների գործարարների և գործարար ասոցիացիաների միջև կապերի ամրապնդումը կարող է մեծապես նպաստել բոլոր բնագավառներում հայ-լիտվական հարաբերությունների արդյունավետ զարգացմանը: Նա հավելել է, որ լիտվական կողմը ձգտում է օգտագործել բոլոր հարթակները, որոնք կարող են նպաստել Լիտվայի և Հայաստանի առևտրատնտեսական հարաբերությունների ամրապնդմանը:

Նիստի ընթացքում քննարկվել է Հայաստանի և Լիտվայի միջև առևտրատնտեսական համագործակցությանն առնչվող հարցերի լայն շրջանակ, նախանշվել են փոխգործակցության զարգացման հեռանկարները: Նիստի արդյունքում ստորագրվել է արձանագրություն, որով ըստ ոլորտների սահմանվել են հետագա համագործակցության ուղղությունները:

Լիտվայի Հանրապետություն կատարած այցի շրջանակում ՀՀ էկոնոմիկայի նախարար Կարեն Ճշմարիտյանը Վիլնյուսում, նոյեմբերի 26-ին հանդիպել է Լիտվայի արտաքին գործերի նախարար Լինաս Լինկյավիչուսի հետ: Նախարարները գոհունակությամբ ընդգծել են, որ վերջին հինգ տարիների ընթացքում Հայաստանի և Լիտվայի միջև առևտրաշրջանառության ծավալները ավելացել են 5 անգամ և հույս են հայտնել, որ հայ-լիտվական միջկառավարական հանձնաժողովի հանձնաժողովի առաջին նիստը կխթանի երկկողմ տնտեսական համագործակցության զարգացումը:

Կարեն Ճշմարիտյանի գլխավորած պատվիրակությունը այցելել է լիտվական Global BOD Group ընկերություն, որը հայտնի է ինովացիոն տեխնոլոգիաների բնագավառում իր նորամուծություններով: Ընկերության հիմնադիր և նախագահ Վիդմանտաս Յանուլեվիչուսը ծանոթացրել է հայկական պատվիրակության անդամներին ընկերության ստեղծման պատմությանը, տեխնոլոգիական պրոցեսների նրբություններին և արտադրության ընդլայնման ծրագրերին:

Հայ-լիտվական միջկառավարական հանձնաժողովի առաջին նիստին մասնակցել է ՀՀ պատվիրակությունը, որի կազմում եղել են ՀՀ էկոնոմիկայի, արտաքին գործերի, գյուղատնտեսության, ֆինանսների, առողջապահության, բնապահպանության, տրանսպորտի և կապի, մշակույթի, կրթության և գիտության նախարարությունների, ՀՀ ԳԱԱ պաշտոնատար անձինք:

Նիստի աշխատանքին և ՀՀ էկոնոմիկայի նախարարի պաշտոնական հանդիպումներին մասնակցել են Լիտվայի Հանրապետությունում Հայաստանի Հանրապետության արտակարգ և լիազոր դեսպան Արա Այվազյանը և Հայաստանի Հանրապետությունում Լիտվայի Հանրապետության արտակարգ և լիազոր դեսպան Էրիկաս Պետրիկասը: