Սահմանադրության և դրան հարակից օրենքների փոփոխությունը՝ տնտեսական անորոշության և ռիսկի պատճառ

Past.am-ը զրուցել է տնտեսագետ Վիլեն Խաչատրյանի հետ՝ կապված գալիք տարվա բյուջեի, սահմանադրական փոփոխությունների և այլ հարցերի հետ:

- Դուք անդամակցեցիք Արթուր Բաղդասարյանի «Հայկական վերածնունդ» շարժմանը: Ինչո՞վ էր դա պայմանավորված:

- «Հայկական վերածննդին» իմ միանալը պայմանավորված է այն հանգամանքով, որ ես իմ տնտեսական գիտելիքներով և գաղափարներով կոորդինացնելու եմ կազմակերպության տնտեսական թևը: Ես տնտեսական վերլուծությունների և մոնիթորինգի հանձնաժողովի նախագահն եմ: Բնականաբար, այդ հանձնաժողովի շրջանակում փորձելու ենք մշակել «Հայկական վերածննդի» տնտեսական հարցերի ցանկը, որոնց լուծումը կփորձենք ստանալ:

- 2016 թվականի բյուջեով նախատեսվում է 2,2% տնտեսական աճ: Ըստ ձեզ՝ սա իրատեսակա՞ն թիվ է:

-Դա այն մինիմալ աճի ցուցանիշն է, որը մինչև այդ նախատեսված չի եղել երբևէ: Ես նման բյուջետային տարի չեմ հիշում, որ այդքան ցածր տնտեսական աճ նախատեսված լինի: Բնականաբար, դա այն ցուցանիշն է, որը կատարման և իրատեսականության տեսանկյունից ունի շատ ավելի բարձր հավանականություն, քան 5,6 կամ 7%-անոց տնտեսական աճը: Ընտրելով այդքան ցածր ցուցանիշ՝ ապահովում են հիմքեր, որ հնարավոր լինի ծրագրերը կյանքի կոչել: Սակայն աննախադեպ է այն, որ բյուջեի եկամտային մասն այս տարի անկում է ապրել:

-Իսկ սահմանադրական փոփոխություններն ի՞նչ ազդեցություն կունենան տնտեսական առումով:

-Տնտեսական տեսանկյունից այդ փոփոխությունները հիմնավոր չեն, այն պարզ պատճառով, որ Սահմանադրության և դրան հարակից մոտ 300 օրենքների փոփոխությունը, որոնց անհրաժեշտությունը կարող է ի հայտ գալ, կհանգեցնի մեծ անորոշության և ռիսկի: Այդ անորոշության և ռիսկի մթնոլորտը ձեռք չի տալիս ներդրողներին: Ներդրողներն այս անցումային շրջանում հետաձգելու են իրենց պլանները՝ սպասելով օրենսդրական դաշտի կարգավորմանը և նոր իշխանությունների ձևավորմանը: Քաղաքական անորոշությունների ռիսկը նույնպես ազդելու է տնտեսական գործոնների վրա:

Լևոն Փանոսյան