Խուզարկությունը դեռ չի սկսվել, որովհետեւ Հրայր Թովմասյանին թույլ չեն տալիս ծանոթանալ դատարանի որոշմանը. Պաշտպան

Արդեն տեւական ժամանակ է, որ ՀՔԾ քննիչները եւ ոստիկանության կազմակերպված հանցավորության դեմ պայքարի գլխավոր վարչության աշխատակիցները գտնվում են ՍԴ նախագահ Հրայր Թովմասյանի բնականարնում, սակայն խուզարկությունը դեռ չի սկսվել: Այս մասին այսօր՝ հունվարի 24-ին, լրագրողների հետ զրույցում նշեց ՍԴ նախագահ Հրայր Թովմասյանի պաշտպաններից Ամրամ Մակինյանը:

Նրա խոսքով, պետք է կատարվի խուզարկություն, կա դատարանի որոշում, սակայն խուզարկությունը դեռեւս չի սկսվել, քանի որ քննչական խմբի ղեկավարը խոչնդոտում է իրենց իրավունքների ամբողջ ծավալով իրականացմանը:

Մենք համապատասխան միջնորդություն ենք ներկայացրել, սա աննախադեպ պրակտիկա է Հայաստանի քրեական դատավարության մեջ, որ թույլ չի տրվում անձին, պրոֆեսիոնալ իրավաբանին որոշումը կարդալ: Պատճառաբանություններ, որպես այդպիսին, չեն բերվում: Այնպիսի աննախադեպ իրավիճակ է, որ ես չեմ կարողանում մեկնաբանություններ բերել»,-ասաց նա՝ հավելելով, որ Հրայր Թովմասյանն այս պահին իր բնակարանում է:

Պաշտպանը նշեց, որ պաշտպանական խմբի իրավունքը ամբողջ ծավալով պետք է իրացվի. «Մենք թե գրավոր, թե բանավոր միջնորդել ենք հնարավորություն տալ ծանոթանալ, պատճեն ստանալ այդ որոշումից: Մենք իրավունք ունենք օրենքով սահմանված կարգով, դատարանի որոշումը բողոքարկել: Ո՞նց կարող ենք բողոքարկել մի դատավարական փաստաթուղթ, , որի պատճենը չունենք: 4-5 թերթ որոշումը հիշողությա՞մբ ենք բողոքարկելու, սա ի՞նչ պրակտիկա է:

Պատճառաբանություններ չկան, որպես այդպիսին: Քննիչը պահում է ձեռքին, ընթերցեցին, մենք լսեցինք: Պարոն Պողոսյանին այդպես են ասել. ես ինքս ծանոթացել եմ, բայց մեզ հնարավորություն չի տրվում պատճեն ստանալ:

Իսկ քննչական գործողություններ չեն սկսվում, որովհետեւ պարոն Թովմասյանը դեռ չի ծանոթացել որոշմանը: Քննչական գործողությունն  սկսվում է դատարանի որոշմանը ծանոթանալուց հետո: Հիմա կրկին պարոն Թովմասյանի իրավունքները խախտվում են: Հիմա էլ բնակարանի անձեռնմխելիության իրավունքն է խախտվում»,-ասաց պաշտպանը:

Հիշեցնենք, որ ՀՀ ՍԴ նախագահ Հրայր Թովմասյանին մեղադրանք է առաջադրվել 2019 թվականի դեկտեմբերի 27-ին՝ ՀՀ քրեական օրենսգրքի 308-րդ հոդվածի 2-րդ մասի հատկանիշներով՝ պաշտոնեական լիազորությունները չարաշահելու համար։ Նրան որպես մեղադրյալ ներգրավելու որոշումը կայացրել էր ՀՀ գլխավոր դատախազը՝ դեկտեմբերի 26-ին, նույն օրը, երբ ՀՀ նախագահ Արմեն Սարգսյանը ստորագրեց Սահմանադրական դատարանի դատավորներին վաղաժամ թոշակի գնալու հնարավորություն տալու մասին օրենքը։