Այնպես չէ, որ պետք է պարտադիր փոփոխություն լինի, ժողովուրդն ուզում է իրեն հարմար փոփոխություններ. Երվանդ Մանարյանը՝ նոր Սահմանադրության մասին

Սիրված դերասան, ռեժիսոր Երվանդ Մանարյանը Past.am-ի հետ զրույցում անկեղծորեն նշեց, որ մի փոքր անտարբեր է սահմանադրական փոփոխությունների հանդեպ:

«Որովհետև էդ տեսակ բան չի, որ կազմակերպեն և կուսակցությունների հետևից գնաս: Բայց մարդը պետք է խղճի մտոք քվեարկի: էսքան տարի ապրել ենք և որոշ պատկերացումներ ունենք այդ հարցերի մասին: Այդ ամենից ելնելով՝ պետք է քվեարկենք «այո» կամ «ոչ»: Բայց չեմ կարծում, որ դրական տրամադրվածություն լինի»,- կարծիք հայտնեց անվանի արտիսը:

Հարցին՝ ի՞նչ կփոխի նոր Սահմանադրությունը ժողովրդի կյանքում, պարոն Մանարյանը պատասխանեց. «Չգիտեմ՝ ինչ կփոխի: Կարող է փոփոխություն լինի, բայց հայտնի չէ՝ դեպի լա՞վը, թե՞ դեպի վատը փոխի:

Այնպես չէ, որ պետք է պարտադիր փոփոխություն լինի, ժողովուրդն ուզում է իրեն հարմար փոփոխություններ, որ մի քիչ կյանքը լավանա, հակառակ դեպքում անիմաստ բան է»:

Երվանդ Մանարյանը չի կարծում, որ հասարակությունն անտարբեր է, բայց նաև չի տեսնում մարդկանց մոտ սպասելիքներ: Խոսելով ընդդիմության մասին՝ դերասանը նշեց. «Դժվարանում եմ ասել, որովհետև ես առնչություն չունեմ»:

Ըստ մեր զրուցակցի՝մարդիկ պետք է սովորեն քաղաքացի դառնալ:

«Մի ընտրությամբ ոչինչ պայմանավորված չէ: Կարող է այս ընտրությանը մեկը շահեց, բայց դա դեռ չի նշանակում, որ նրա համար ճանապարհ է բացվում: Մարդիկ պետք է ամեն բան իրենց տեղը դնեն, հասկանան՝ հասարակության մեջ ինչն է ճիշտ և ինչը՝ սխալ: Մենք նոր-նոր ենք սկսում կազմակերպված քաղաքացի դառնալ»,- իր խոսքը եզրափակեց Երվանդ Մանարյանը:

Լևոն Փանոսյան