Ավելի քան 200 գինեկոլոգներ անհանգստացած են Ռազմիկ Աբրահամյանի պատվի համար. ստորագրություններով բաց նամակն ուղարկել են պաշտոնատար այրերին

Past.am

Ավելի քան 200 գինեկոլոգներ պատրաստվում են բաց նամակով հանդես գալ՝ ուղղված մի շարք բարձրաստիճան պաշտոնյաների: Այդպիոսվ նրանք իրենց աջակցությունն են հայտնում ապօրինի որդեգրման գործով մեղադրյալ Ռազմիկ Աբրահամյանին, վստահություն հայտնելով, որ ներկայացվող մեղադրանքը որևէ աղերս չունի իրականության հետ և կոչ են անում պաշտոնատար անձանց ապահովել վարույթի օբյեկտիվությունը:

«ՀՀ Վարչապետ Նիկոլ Փաշինյանին
ՀՀ Նախագահ Արմեն Սարգսյանին
ՀՀ Ազգային ժողովի նախագահ Արարատ Միրզոյանին
ՀՀ Գլխավոր դատախազ Արթուր Դավթյանին
ՀՀ Մարդու իրավունքների պաշտպան Արման Թաթոյանին

Մանկաբարձ-Գինեկոլոգներից

Մեծարգո պարոնայք

Մենք՝ Հայաստանի Հանրապետության տարբեր բուժհաստատություններում աշխատող մանկաբարձ-գինեկոլոգներս, անհանգստացած ենք հանրապետությունում մանկաբարձության և գինեկոլոգիայի հիմնադիրներից մեկի՝ մեր սիրելի ուսուցիչ, ՀՀ վաստակավոր բժիշկ, ՀՀ ԳԱԱ ակադեմիկոս, պրոֆեսոր Ռազմիկ Աբրահամյանի բարի համբավի, պատվի և հեղինակության համար, ով հեղինակ է շուրջ 435 գիտական աշխատության, այդ թվում՝ հայերեն լեզվով 5 դասագրքի, 8 մենագրության, 25 ուղեցույցի: Նրա գիտական ղեկավարությամբ պաշտպանվել են 9 դոկտորական և 25 թեկնածուական ատենախոսություններ՝ մանկաբարձություն և գինեկոլոգիա մասնագիտությամբ:

ՀՀ ԱՆ գլխավոր մանկաբարձ-գինեկոլոգ եղած տարիներին պրոֆեսոր Աբրահամյանի ջանքերով են կրկնակի և ավել չափով նվազել մայրական և նորածնային մահացության ցուցանիշներ և բարելավվել ծնելիության ցուցանիշները:
Միաժամանակ, անհանգստացած ենք բժշկագիտության ոլորտի առանցքային ուղղություններից մեկի՝ մանկաբարձ-գինեկոլոգի մասնագիտության շուրջ ստեղծված մտացածին աղմուկի առթիվ, որն արդեն քննարկման առարկա է դարձել նաև մեր երկրից դուրս՝ վտանգելով տարիների ընթացքում մեր ձեռք բերած մասնագիտական վարկը և բուժհաստատության պրոֆեսիոնալ համբավը:

Ղեկավարելով իր նշանակությամբ և դերակատարությամբ խիստ կարևոր՝ վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտը, պրոֆեսոր Ռ.Աբրահամյանը երկար տարիներ անմնացորդ նվիրվել է գործին՝ չխնայելով կյանքն ու առողջությունը, անուրանալի նպաստ բերելով մեր երկրում վերարտադրողական առողջության կազմակերպման ոլորտին:

Ասվածը հաշվի առնելով՝ հիշեցնում ենք, որ հարուցված գործի օբյեկտիվ և անաչառ քննությունը, դրա ընթացքին որևէ միջամտության անթույլատրելիությունը և վերջնական ճշմարտության բացահայտումը ուղղակիորեն կապված է ինչպես նշանավոր, միջազգային ճանաչում ունեցող բժիշկ- գիտնականի անվան, այնպես էլ մեր մասնագիտական պատվի, արժանապատվության, մեր բուժհաստատությունների բարի համբավի հետ:
Վստահ ենք, որ ներկայացվող մեղադրանքը որևէ աղերս չունի իրականության հետ, քանզի մեր պրակտիկ գործունեությունից ելնելով գիտենք, որ յուրաքանչյուր դեպքում՝ պտղի զարգացման արատը ճշտվում է տարբեր մեթոդներով, տարբեր կլինիկաներում և մի քանի մասնագետների կողմից: Հայտնի է, որ պտղի զարգացման արատները, ներարգանդային ինֆեկցիաները, մեռելածնությունը, նորածնային մահացությունը և վաղաժամ ծննդաբերությունները միշտ եղել են, կան, և շարունակելու են լինել նույնիսկ ամենազարգացած առողջապահական համակարգեր ունեցող երկրներում:
2019թ. սեպտեմբերի վերջից մեր հասարակությունը ուշադիր հետևում է ՎԱՊՄԳՀ ինստիտուտում տեղի ունեցած մեռելածնության դեպքի քննության ընթացքին և սպասում գործի հանգուցալուծմանը, որը սակայն ձգձգվում է: Այս ընթացքում մեռելածին պտուղ ծննդաբերած կինը, իբրև իր նախաձեռնությամբ, սկսեց մի արհեստական, մասնագիտական (բժշկական) գիտելիքների և մեկնաբանությունների հետ անհամատեղելի՝ հոգեբանա-հուզական ելույթներով ուղեկցվող շարժում՝ անպատասխանատու հայտարարություններով հընթացս վարկաբեկելով ինստիտուտը և նրա աշխատակիցներին:

Հարկ է նշել, որ ինստիտուտը տարիներ շարունակ սպասարկել է մարզերից ուղեգրված բարձր ռիսկի խմբի հղիներին և ծննդաբերներին, այդ թվում՝ մահացած պտուղներով, որոնց ծննդալուծումը հաճախ ուղեկցվում է մեծ վտանգներով: Այդ կանայք բուժօգնություն են ստանում ինչպես հղիների ախտաբանության, այնպես էլ 2-րդ մանկաբարձական բաժանմունքում, որը միակն է հանրապետությունում և սպասարկում է ինֆեկցված հիվանդություններով (ՄԻԱՎ, ՁԻԱՎ, հեպատիտ В, հեպատիտ С, տուբերկուլյոզ, ջրծաղիկ և այլն), չհետազոտված, ինչպես նաև կանանց կոնսուլտացիաներում չհաշվառված, պտղի զարգացման արատներով հղիներին և ծննդաբերներին: Կլինիկայում աշխատում են պրոֆեսիոնալ բարձր որակավորում ունեցող աշխատակիցներ՝ բժշկական գիտությունների դոկտորներ, թեկնածուներ, բազմափորձ մանկաբարձ-գինեկոլոգներ: Հատուկ ուշադրության է արժանի նորածնային ծառայությունը՝ ծննդօգնության հիմնարկների մեջ խոշորագույն և ամենածանրաբեռնված նորածինների վերակենդանացման բաժանմունքով, որտեղ բուժվում են խիստ ցածր քաշով նորածիններ:

Ինչպես և ամբողջ աշխարհում, վերակենդանացման բաժանմունքում ևս ցավոք լինում են մահացության դեպքեր, որոնցից մի քանիսն այժմ դարձել են շահարկման առիթ: Ցանկացած պերինատալ մահացություն (մեռելածնություն և մինչև կյանքի 7-րդ օրը նորածնային մահացություն) ենթարկվում է պաթանատոմիական հետազոտության: ՎԱՊՄԳՀ ինստիտուտի և «Արաբկիր» բժշկական համալիր - երեխաների և դեռահասների առողջության ինստիտուտի կազմում գործող պաթանատոմիական լաբորատորիաները իրականացնում է նաև Երևանի այլ ծննդօգնության հիմնարկների պերինատալ մահվան դեպքերի պաթանատոմիական հետազոտությունը:
Մահացած նորածնի դին, բուժհիմնարկը ծնողի ցանկության դեպքում կարող է նրան տալ դիահերձումից և նորածնի ծնունդն ու մահը գրանցելուց հետո, քանի որ ՀՀ կառավարության 23.10.2006թ. N 1910-Ն որոշման թաղման և դիակիզման կարգի 3-րդ կետի համաձայն՝ հուղարկավորությունը իրականցվում է մահվան վկայականի հիման վրա:

Համաձայն «Հուղարկավորությունների կազմակերպան և գերեզմանատների ու դիակիզարանների շահագործման մասին» օրենքի 8-րդ հոդվածի 1-ին մասի՝ ՀՀ տարածքում հուղարկավորությունը իրականացվում է մահացածի մարմինը (աճյունը) գերեզմանատների սահմաններում տրամադրված գերեզմանատեղերում հողին հանձնելու կամ դիակիզման միջոցով: Մեռելածնության դեպքում ՔԿԱԳ մարմնում գրանցվում է միայն ծնունդը և մահվան վկայական չի տրվում, ինչի հետևանքով հուղարկավորություն չի կարող կատարվել, հետևաբար դիահերձումից հետո դիակը չի կարող տրամադրվել:
Նշված իրավակարգավորումներից անտեղյակ, առաջնորդվելով միայն իրենց հայտնի մոտիվներով՝ որոշ կանայք զրպարտում են ինստիտուտին՝ հայտարարելով, թե իբր իրենց երեխաները չեն մահացել: Վերջիններիս, ինչպես և տարիներ առաջ իրենց երեխաներից (ծնողական իրավունքներից) հրաժարված կանանց մերկապարանոց և անապացույց բողոքների հիման վրա արդյունքում հարուցվել է քրեական գործ, որը հանրության շրջանում ստացել է երեխաների ապօրինի որդեգրման գործ անվանումը:
Վստահեցնում ենք, որ ծննդօգնության հիմնարկները, այդ թվում՝ ՎԱՊՄԳՀ ինստիտուտը բացարձակապես որևէ կապ չունեն որդեգրման գործընթացի հետ: Մասնավորապես, ՀՀ ընտանեկան օրենսգրքի 118-րդ հոդվածը սահմանում է, որ երեխային որդեգրելու համար անհրաժեշտ է ծնողների գրավոր հրաժարումը երեխայի նկատմամբ ծնողական իրավունքներից կամ ծնողի գրավոր համաձայնությունը` երեխային որդեգրման տալու վերաբերյալ:

Այն դեպքում, երբ ծննդաբերելուց հետո մայրը համառորեն հրաժարվում է նորածնից, ապա բուժհաստատության աշխատակցի ուղեկցությամբ այցելում է ՔԿԱԳ մարմին, գրանցում նորածնի ծնունդը, այնուհետև գրավոր հրաժարվում ծնողական իրավունքներից: Հիմք ընդունելով օրենքի պահանջը՝ այդ համաձայնությունը և երեխայի այլ փաստաթղթերը ուղարկվում են տվյալ վարչական շրջանի խնամակալության և հոգաբարձության մարմին, որտեղից էլ՝ քաղաքապետարան կամ մարզպետարան, իսկ այնուհետև՝ ՀՀ կառավարության լիազորած մարմին: Վերջինս իրականացնում է առանց ծնողական խնամքի մնացած երեխաների կենտրոնացած հաշվառումը, տալիս է մանկատան ուղեգիր, աջակցում այդ երեխաների հետագա խնամքի և դաստիարականության կազմակերպմանը, որից հետո նորածինը տեղափոխվում է մանկատուն: Այդ պահից ամբողջությամբ ավարտվում են բուժհաստատության (ծննդատան) անելիքները: Որդեգրման հետագա գործընթացը մանրամասն կանոնակարգվում է գործող օրենսդրությամբ, որի շրջանակներում, ինչպես արդեն նշվեց, բուժհաստատությունը (ծննդատունը) որևէ գործառույթ չի իրականացնում, ուստի և տեղեկացված չէ այս կամ այն երեխայի որդեգրման գործընթացից:
Այսքանով հանդերձ՝ անհասկանալի և աբսուրդային է ծննդատանը մեղսագրվող դերակատարությունը որդեգրման դեպքերով, մասնավորապես առ այն, թե ինչպե՞ս կարող են երեխաները առանց ծնողական իրավունքներից հրաժարումի կամ որդեգրման համաձայնության հայտնվել մանկատանը և ապօրինի որդեգրվել, ինչը գործնականում անհնար է:

Պատվարժան այրեր,
Երկրի առողջ սերնդի ապահովման գործում մեր համեստ ավանդի հաշվառմամբ՝ կոչ ենք անում լինել աչալուրջ, չենթարկվել հասարակության որոշ խմբերի կամ կեղծ շահերով միավորված՝ մանրապատումասեր անձանց ճնշումներին, թույլ չտալ, որպեսզի լրատվամիջոցների կողմից ոչ մասնագիտական, սիրողական կամ հուզական բնույթի հրապարակումները կանխավ ազդեցություն ունենան նախաքննական մարմինների և դատարանների վրա՝ խախտելով անձանց անմեղության կանխավարկածը և բացառելով սույն գործով օբյեկտիվ ճշմարտության պարզման, ինչպես և լրիվ ու բազմակողմանի քննության հնարավորությունը:
Արդարադատության շահը ամբողջությամբ համընկնում է մեր մասնագիտական հեղինակության վերականգնման ցանկության հետ, ուստի կրկին անգամ խնդրում ենք Ձեր մշտական ուշադրության ներքո ապահովել վարույթի լրիվությունը, օբյեկտիվությունը, անաչառությունը և անմիջամտելիությունը:

Հարգանքով՝
մանկաբարձ-գինեկոլոգներ.