Ֆի­նանս­նե­րի նա­խա­րա­րու­թյու­նը ծախ­սե­րի փաս­տաթղ­թա­վոր­ման նոր կարգ կսահ­մա­նի. նա­խա­գիծ.

Ֆինանսների նախարարությունն իրավական ակտերի նախագծերի հրապարակման միասնական կայքում հանրային քննարկման է ներկայացրել նախագիծ, որի ընդունման արդյունքում ակնկալվում է սահմանել ՀՀ հարկային օրենսգրքի 55-րդ հոդվածի 13րդ մասով սահմանված ծախսերի փաստաթղթավորման այլ կարգ: 

Նախագծի հիմնավորման մեջ նշվում է, որ դրա նպատակը ոչ ռեզիդենտ կազմակերպությունից կատարվող ձեռքբերումների մասով ՀՀ հարկային օրենսգրքով սահմանված փաստաթղթավորման ընդհանուր կարգից տարբերվող այլ կարգի սահմանումն է: 

Նշենք, որ ոչ ռեզիդենտ են համարվում օտարերկրյա պետություններում ստեղծված կազմակերպությունները, ինչպես նաև միջազգային կազմակերպությունները և դրանց կողմից ՀՀ-ից դուրս ստեղծված կազմակերպությունները: 

Նշվում է, որ դեռևս նախորդ տարի կատարված օրենսդրական փոփոխությունները և 2019 թվականի հունիսի 25-ին ԱԺ-ի կողմից ընդունված համապատասխան օրենքը նախատեսել է կառավարության կողմից հարկային օրենսգրքի 55-րդ հոդվածի 13-րդ մասով սահմանված ծախսերի փաստաթղթավորման այլ կարգ սահմանելու հնարավորություն:

 Խնդիրն այն է, որ ներկայումս ՀՀ կառավարության կողմից նման կարգ սահմանված չէ: Նախագծով առաջարկվում է սահմանել, որ ոչ ռեզիդենտ կազմակերպություններից ՀՀ տարածքից դուրս կատարվող ձեռքբերումները կարող են փաստաթղթավորվել այդ ձեռքբերումների դիմաց կատարված՝ անկանխիկ եղանակով վճարումը հիմնավորող փաստաթղթով և ոչ ռեզիդենտ կազմակերպության կողմից դուրս գրված՝ ապրանքների մատակարարման, ծառայության մատուցման կամ աշխատանքի կատարման փաստը հիմնավորող փաստաթղթով: 

Բացառություն է կազմելու այն ծառայությունների կամ աշխատանքների ձեռքբերումը, որոնց մատուցման կամ կատարման վայրը, ՀՀ հարկային օրենսգրքի 39-րդ հոդվածի համաձայն, Հայաստանի Հանրապետությունն է։ 

Նշվում է, որ միևնույն ժամանակ «Ծախսերի փաստաթղթավորման այլ կարգ սահմանելու մասին» ՀՀ կառավարության որոշման նախագծի ընդունման առնչությամբ այլ իրավական ակտերի ընդունման անհրաժեշտություն չի առաջանա, ինչպես նաև այս նախագծի ընդունմամբ պետբյուջեի եկամուտների նվազեցում կամ ծախսերի ավելացում չի ակնկալվում: 

Որոշումն ուժի մեջ է մտնում պաշտոնական հրապարակմանը հաջորդող օրվանից և տարածվում է 2018 թվականի հունվարի 1-ից հետո ծագած (ծագող) հարաբերությունների վրա:

ԼՈՒՍԻՆԵ ԱՌԱՔԵԼՅԱՆ