Օկլահոմայում արտակարգ դրություն է հայտարարվել նահանգում մոլեգնող փոթորիկների պատճառով

ԱՄՆ-ի Օկլահոմայի նահանգի նահանգապետ Մերի Ֆելինը հայտարարել է նահանգի ամբողջ տարածքում արտակարգ դրություն սահմանելու մասին, որի պատճառը տարածաշրջանը պատուհասած փոթորիկներն են: Այդ մասին, նոյեմբերի 29-ին հաղորդել են տեղական ԶԼՄ-ները:

Արտակարգ դրության ռեժիմի սահմանումը թույլ է տալիս նահանգի իշխանություններին համերկրային կառավարությունից օգնություն ստանալ տարերային աղետների հետեւանքների վերացման համար:

Անցած օրերին Օկլահոմայում տեղացած աննախադեպ հորդառատ անձրեւները հանգեցրել են լուրջ հեղեղումների, ջրասույզ են եղել հարյուրավոր տներ: Նահանգի առանձին շրջաններում տեղումները, բախվելով սառը մթնոլորտային ճակատի հետ, վերածվել են սառցանձրեւի, ինչի հետեւանքով խզվել են էլեկտրահաղորդման գծերը, առանց լույսի է մնացել ավելի քան 80 հազար սպառող:

Ավտոճանապարհներից շատերը ծածկվել են մերկասառույցով, ինչը տասնյակ վթարների պատճառ է դարձել: Ոստիկանությունը խորհուրդ է տվել բնակիչներին՝ ավտոմեքենաներից օգտվել միայն ծայրահեղ անհրաժեշտության դեպքում:

Ընդամենը վերջին մի քանի օրվա ընթացքում անբարենպաստ եղանակ է հաստատվել ԱՄՆ-ի հարավային ու կենտրոնական մի շարք նահանգներում, ներառյալ Տեխասը, Կանզասը եւ Օկլահոման: Associated Press գործակալության տվյալներով՝ հինգշաբթի օրվանից փոթորիկների, սառցանձրեւների եւ հեղեղումների զոհ է դարձել առնվազն 14 մարդ:

Օդերեւութաբանները կանխատեսում են, որ անբարենպաստ եղանակը կշարունակվի առաջիկա մի քանի օրվա ընթացքում, հաղորդել Է ՏԱՍՍ-ը: