«Ազ­գաբ­նակ­չու­թյու­նը չպետք է իմա­նա՝ ինչ­պես տար­բե­րա­կել գրի­պի տե­սակ­նե­րը, պետք է դի­մել բժշկի»

Կորոնավիրուսը շարունակում է ընդլայնել աշխարհագրությունը։ Վերջին տվյալներով՝ աշխարհի շուրջ չորս տասնյակ երկրում հայտնաբերվել են կորոնավիրուսով վարակվածության դեպքեր։ Իհարկե, այս թիվը կարող է և փոխվում է ժամերի ընթացքում։ Շատ երկրներ փակում են հարևան երկրների հետ օդային և ցամաքային սահմանները՝ վիրուսի ներթափանցումն իրենց երկիր կանխելու նպատակով։ Եվրոպական որոշ երկրներում անգամ առանձին քաղաքներում կարանտին է հայտարարված։ 

Առողջապահության համաշխարհային կազմակերպությունը խորհուրդ է տալիս կորոնավիրուսով վարակվելու ռիսկը նվազեցնելու համար առաջին հերթին չայցելել այն երկրներ, որոնք համարվում են վիրուսի զարգացման օջախներ։ Բացի սա, խորհուրդ է տալիս մարդկանց հետևել անձնական հիգիենային՝ ձեռքերը լվանալ օճառով կամ մաքրել ալկոհոլ պարունակող ձեռքի քսուքով, հազալիս կամ փռշտալիս փակել բերանը և քիթն անձեռոցիկով, խուսափել հարբուխով կամ գրիպանման երևույթներով անձանց հետ շփումից, մանրակրկիտ եփել միսն ու ձուն, խուսափել վայրի կամ գյուղատնտեսական ընտանի կենդանիների հետ չպաշտպանված շփումից։

ՀՀ առողջապահության նախարարությունն էլ իր հերթին, ի հավելումն այս խորհուրդներին, հորդորում է միջազգային ուղևորություններ ծրագրելիս հաշվի առնել տվ յալ երկրի համաճարակային իրավիճակը, օգտագործել դիմակներ։ Իհարկե, բոլոր դեպքերում թերևս ամենակարևոր խորհուրդը գրիպանման երևույթների առկայության դեպքում ինքնաբուժությամբ չզբաղվելը, այլ բժշկի դիմելն է։

Սակայն, այստեղ բարդությունն այն է, որ մեծ հաշվով կորոնավիրուսն ու սովորական գրիպը շատ նման են իրար, շատ դեպքերում անգամ թեստերի միջոցով հնարավոր չէ պարզել՝ գործ ունենք սովորական գրիպի՞, թե՞ կորոնավիրուսի հետ։

Կորոնավիրուսը սուր շնչառական վարակի հարուցիչ է: Վարակվելիս նկատվում է օրգանիզմի արտահայտված ինտոքսիկացիա, շնչառական համակարգի խնդիրներ: Այն փոխանցվում է օդակաթիլային և կոնտակտային ճանապարհով՝ մարդուց մարդ, իսկ Չինաստանում՝ նաև կենդանիներից մարդուն: Ախտանշաններն են կրծքավանդակի հատվածում ծանրության զգացումը՝ ընդհատվող շնչառությունը, հազը, տենդը։

Ի՞նչ անել գրիպանման նախանշաններ ունենալու դեպքում, ինչպե՞ս չմատնվել խուճապի, և պետք է արդյոք հենց առաջին նախանշանների դեպքում դիմել բժշկի։ Ի դեպ, կառավարության վերջին նիստի ժամանակ, երբ նախարար Արսեն Թորոսյանը ներկայացնում էր կորոնավիրուսին առնչվող տվյալներ, նշեց, որ հիվանդների մեծ մասը բուժվում է, ընդ որում, մի մասն ինքնուրույն՝ նույնիսկ բժշկական օգնության կարիք չկա։ Ըստ նախարարի՝ հնարավոր է, որ մարդու մոտ շնչառական որևէ ախտանշան լինի՝ հազ կամ փռշտոց, թեստ արվի և նրա մոտ հայտնաբերվի կա՛մ սովորական սեզոնային գրիպ, կա՛մ էլ կորոնավիրուսով վարակվածություն։ 

Ի դեպ, Թորոսյանի խոսքերով, «քանի որ կորոնավիրուսը, որպես այդպիսին, շատ վտանգավոր վիրուս չի համարվում, շատ հատուկ միջոցառումների կարիք չկա»։

«Այո, գրիպի և կորոնավիրուսի ախտանշաններն իրար շատ նման են։ Այսպես ասենք՝ մարդկանց պետք է սկսի անհանգստացնել, եթե իրենք ունեն 38 և ավելի բարձր ջերմություն։ Մենք կրկին հորդորում ենք, որ քաղաքացիները չզբաղվեն ինքնաբուժությամբ, այցելեն կամ հրավիրեն բժշկի։ 

Այս պահին մեր խորհուրդը կամ հորդորը հետևյալն է՝ հետևել պաշտոնական լրահոսին՝ մեր խորհուրդներին և կանխարգելիչ միջոցառումներին, վստահել առողջապահության նախարարության այն քայլերին, որոնք մինչ այսօր իրականացվել են և շարունակվում են իրականացվել»,-այս մասին «Փաստին» հայտնում են առողջապահության նախարարության լրատվական ծառայությունից՝ մեր այն հարցին ի պատասխան, թե հնարավո՞ր է արդյոք տարբերակել գրիպն ու կորոնավիրուսը, և պե՞տք է գրիպանման երևույթների դեպքում անմիջապես խուճապի մատնվել և դիմել բժշկական օգնության համար։

Լրատվական ծառայությունից նաև տեղեկացնում են՝ երկրում առողջապահական իրավիճակի հետ կապված կփոփոխվի նաև նախարարության և մյուս գերատեսչությունների գործողությունների պլանը։ «Երբ վիրուսը դեռ նոր էր շրջանառվում Չինաստանում, խորհուրդ էինք տալիս, օրինակ՝ այնտեղ չմասնակցել մարդաշատ միջոցառումների, չայցելել կենդանական ծագման շուկաներ և այլն։ Հետո արդեն, երբ վիրուսն ընդգրկեց ավելի մեծ թվով երկրներ, մեր խորհուրդներն էլ փոխվեցին։ Մեր երկրում ստեղծվեց միջգերատեսչական հանձնաժողով, որտեղ իրավիճակին համահունչ որոշումներ են կայացվում»,-հավելում են նախարարության լրատվական ծառայությունից։

Նորքի ինֆեկցիոն կլինիկական հիվանդանոցից «Փաստի» հարցմանն ի պատասխան նշեցին, որ քաղաքացիները գանգատներ ունենալու դեպքում պետք է դիմեն իրենց տարածքային պոլիկլինիկաներ՝ իրենց տեղամասային բժիշկներին։ «Ազգաբնակչությունը չպետք է իմանա՝ ինչպես տարբերակել գրիպի տեսակները, պետք է դիմել բժշկի, և նրանք կորոշեն՝ գրիպ է, թե այլ հիվանդություն, կամ առհասարակ որևէ հիվանդություն կա, թե ոչ»,-տեղեկացնում են ինֆեկցիոն հիվանդանոցից։

Հ. Գ.- Արտաքին գործերի նախարարությունը երեկ հայտարարություն է տարածել՝ ՀՀ քաղաքացիներին հորդորելով ժամանակավորապես խուսափել Իրանի Իսլամական Հանրապետություն, Չինաստանի Ժողովրդական Հանրապետություն, Ճապոնիա, Հարավային Կորեայի Հանրապետություն և Իտալիայի Հանրապետություն (առավելապես՝ հյուսիսային շրջաններ) այցելություններից, բացառությամբ խիստ անհրաժեշտ դեպքերի:

ԼՈՒՍԻՆԵ ԱՌԱՔԵԼՅԱՆ