Աղավնի Գրիգորյան. Գորտը (Շաբաթօրյա ընթերցումներ «Փաստ» օրաթերթից)

«ՓԱՍՏ» ՕՐԱԹԵՐԹԸ ՇԱՐՈՒՆԱԿՈՒՄ Է «ՇԱԲԱԹՕՐՅԱ ԸՆԹԵՐՑՈՒՄՆԵՐ» ՇԱՐՔԸ՝ ՆԵՐԿԱՅԱՑՆԵԼՈՎ ՀԱՅ ԳՐԱԿԱՆՈՒԹՅԱՆ ՆՄՈՒՇՆԵՐԻՑ, ԱՅԴ ԹՎՈՒՄ՝ ՄԵՕՐՅԱ ԳՐՈՂՆԵՐԻ: ԱՅՍ ԳՈՐԾՈՒՄ ՄԵԶ ՄԵԾԱՊԵՍ ԱՋԱԿՑՈՒՄ Է ՀԱՄԱՀԱՅԿԱԿԱՆ ԳՐՈՂՆԵՐԻ ՄԻՈՒԹՅԱՆ ՆԱԽԱԳԱՀ, ԳՐԱԿԱՆԱԳԵՏ ԱԲԳԱՐ ԱՓԻՆՅԱՆԸ, ԻՆՉԻ ՀԱՄԱՐ ՇՆՈՐՀԱԿԱԼ ԵՆՔ:

ԱՂԱՎՆԻ ԳՐԻԳՈՐՅԱՆ

ԳՈՐ­ՏԸ

Գորտը որոշեց.

Ինքը հանճար է:

Մոր համար թանկ էր 

Իր մինուճարը,

 Ուստի որոշեց 

Քավորին դիմել.

 - Գորտիս կռռոցը 

Պիտի՛ գովազդել: 

Քավո՛ր, դու գիտես 

Բոլո՜ր ձևերը, 

Դո՛ւ ես գորտիկիս 

Մեջքն ու թևերը, 

Էս կըռ-կըռն հազա՜ր 

Գրված երգ արժի. 

Գորտս պոետ է, 

Պիտի՛ ճանաչվի:

Քավորը ասաց. 

- Սանամա՛յր անգին, 

Ամեն ինչ կանեմ 

տեղին ու կարգին, 

Սանիկիս գիրը 

էսօր թող կարդամ, 

Որ անելիքս վաղվա  հասկանամ:

Հարյուր էջ կըռռոց 

Վերից վար թերթեց, 

Մի սիրուն հնչյուն 

Մեջը չպեղեց. 

Գորտ մոր ասածն էր հնչում ականջին.

 «Գորտս պոետ է, 

պիտի ճանաչվի՜…»:

Քավոր է…Գիշերը 

չքնեց դարդից, 

Բայց ելք միշտ էլ կա 

նման վիճակից: 

Մի չեղած մրցույթ 

Օդից հորինեց, 

Մրցանակն էլ իր 

Սանիկին շնորհեց: 

Կողքից էլ կցեց 

Մի նամակ- երկտող. 

«Բարդ ձեռագիր է՝

 վերջից կարդացվող, 

գուցեև այսօր դժվար հասկացվի, 

վաղը գին կտան, 

եթե տարածվի»:

Գորտը դեռ 

երկու Նոր գիրք էլ գրեց 

Ափսոս, մորից զատ՝ 

Ոչ ոք չգնեց: 

«Հանճարեղ» գորտին 

Մինչ օրս ճահճում 

Իր կռռոցով են 

Միայն ճանաչում: