«Ամենատեղեկացված» նախարարի մտքի «գոհարները»

Չէ, հատուկ տաղանդ պետք է ունենալ՝ առողջապահության նախարար Արսեն Թորոսյանի ու նրա «քայլող» աջակիցների դիլետանտիզմին, անամոթության հասնող ցինիզմին դիմանալու համար։

Երբ խոհրդարանական ընդդիմությունը որևէ, օրինակ՝ սահմանադրական հանրաքվեի հարցով, հրաժարվում է «սև»-«սպիտակի» տրամաբանությամբ դիրքորոշում հայտնել, մեծամասնության պատգամավորները հարայ-հարայոց են դնում, թե՝ հասեք, ընդդիմություն չունենք, ու դառնում են կատարյալ անհանդուրժող, երբ ընդդիմությունը կոնկրետ հարցերով մեղադրում է իշխանության անգործությունը։
Ո՞վ չի հասկանում, որ կորոնավիրուսի հարցով մոտ մեկ ամիս իշխանությունն անգործություն է ցուցաբերել՝ այն աստիճանի, որ վիրուսակիրն ինքնաթիռով եկել, տուն էր գնացել ու հետո իր ոտքով հիվանդանոց էր գնացել ու «բացահայտվել»։ Կորոնավիրուսի առաջին դեպքը բացահայտվեց՝ կառավարության զրո միջամտությամբ, ու դա փաստ է ու փաստ է նաև, որ պոստֆակտում կառավարությունը ամենասխալ տեղում մեկուսացրեց երեք տասնյակ մեր հայրենակիցների՝ Ծաղկաձորն ու չարաբաստիկ վարակը դարձնելով հոմանիշներ։ Երեկ այս մասին էր բարձրաձայնել ԲՀԿ նախագահ Գագիկ Ծառուկյանը։
Ու եթե նույնիսկ նա այդ մասին չխոսեր էլ, պարզ էր, որ կարանտինը Ծաղկաձոր տանելու որոշումը ներքուստ սխալ էր համարել նաև Նիկոլ Փաշինյանը, որը նույն երեկոյան ընտանիքի հետ շտապեց Ծաղկաձոր՝ այնտեղից տուրիստների «փախուստը» կանխելու համար։
Դե, չստացվեց, որովհետև կորոնավիրուսն «անլուրջ» են համարում միայն մեր առողջապահության «գիտունիկ» նախարարն ու նրա հետ «անհոգ քայլող» որոշ պատգամավորներ։
«Երևի պարոն Գագիկ Ծառուկյանը մի քիչ համաշխարհային անցուդարձից էդքան տեղյակ չի»,- այսօր ասել է Թորոսյանը, ով, որպես կանոն, տեղյակ չի լինում անգամ իր կառավարության կայացրած որոշումներից։ Օրինակ՝ նա ասում էր, թե հայ-իրանական սահմանը պետք չէ փակել, որից հետո վարչապետը հակառակն արեց, կամ՝ մի քանի օր առաջ, Արսնեը դեռ ասուլիս էր տալիս ու խրոխտ ասում էր, որ իր երկու երեխաներին դպրոց է ուղարկելու ու հետո պարզվեց․․․ չի կարող, որովհետև վարչապետն արդեն դպրոցները փակելու որոշում է ստորագրել։
Զարմանում եմ՝ էսքան «տեղյակ» նախարարի տեղը ոնց չգիտեն արտասահմաններում, որ Թորսայան Արսենին դրսերում լավ ռոճիկով գործ չեն տալիս․ համ էս երկիրը կպրծնի, համ էլ՝ «ամենատեղյակը» մյուսներին էլ «կլուսավորի»։
Էս «տեղեկացված» նախարարին պաշտպանող «քայլուհին» էլ, թե՝ այս դեպքում գնահատական է տալիս ոչ այնքան պատգամավոր Գագիկ Ծառուկյանը, որքան սեփականատեր Գագիկ Ծառուկյանը՝ ունենալով իր որոշակի շահը։
Ինչ անճար փաստարկ եք բերում։ Մի հատ Ծաղկաձոր հասեք ու կտեսնեք, որ տուրկենտրոնը դատարկված է ու ԲՀԿ նախագահը խոսել է գլոբալ խնդրի մասին՝ բացարձակ չկարևորելով իր հյուրանոցը, որն, ի դեպ, իր բարձր կարգի շնորհիվ ամենապաշտպանվածն է ֆորս-մաժորային ցանկացած իրավիճակներից։
Եթե նախարարի ու նրան աջակցող պատգամավորների անհեթեթ պատճառաբանությամբ առաջնորդվենք, կարող ենք մտածել՝ Ծաղկաձորում կարանտին միոտւմնավոր է բացվել, որպեսզի կոնկրետ գործարարներ ու ոլորտ վնաս կրեն։
Խոսելուց առաջ մի քանի րոպե մտածեք։ Առողջությանը հաստատ չի վնասում։

 

Սուրեն Սուրենյանց