Յուրահատուկ ամենագնացը. քաղաքացիակա՞ն, թե՞ ռազմական մեքենա

Երևի թե ամենահայտնի ամենագնացը, որն, ըստ մասնագետների ու ավտոսիրողների, ավտոմեքենաների մեջ ունի ամենալավ անցողականությունը, Համմերն է։ Այն ունակ է անցնել այնպիսի խոչընդոտներ, որոնք անցնել չի կարող տվյալ դասի ցանկացած տրանսպորտային այլ միջոց։ Իր կարճ պատմության ընթացքում (մոտ մեկ քառորդ դար) Համմերը ներկայացել է ոչ միայն որպես հրաշալի ավտոմոբիլ, այլ նաև որպես կյանքի որոշակի ոճ, որը ասոցացվում է տղամարդկայնության և նշանակալիության հետ։ 

Համմերի պատմությունն սկսվում է նման ռազմական մեքենա ստեղծելու գաղափարից։ Այն հանդիսանում է ԱՄՆ-ի պաշտպանության նախարարության նոր անիվային տրանսպորտային միջոցներ ստեղծելու նախագծի մի մասը։ 

Ընդ որում, այնպիսի տրանսպորտային միջոցի, որը ունի մեծ շարժունակություն, հուսալիություն և վերանորոգումից հետո կարող է շարունակել պիտանի լինել շահագործման համար։ Ավտոմեքենան իր անունը ստացել է անգլերենով իր անվանման առաջին տառերից՝ High Mobility Multipurpose Wheeled Vehicl (HMMWV)։ Համառոտ այն կոչել են «համվի», իսկ ավելի ուշ սովորական է դարձել մեզ արդեն հայտնի «համմերը»։ 

Այս ավտոմեքենան բավականին կարճ ժամկետներում (մեկ տարուց էլ պակաս ժամկետում) ստեղծվել է General Motors ընկերությունում։ Առաջին մոդելն անվանվել է HMMWV М998։ Այն ստացվել է շատ հաջողված և բավարարել է Պենտագոնի ներկայացրած բոլոր պահանջները։ 

Ավտոմեքենան ստացվել է շատ պարզ կառավարվող և ունակ իր վրա կրել հետևակի աջակցությունը ապահովող ցանկացած զինատեսակ։ Համմերին մեծ փառք է բերել «Փոթորիկ անապատում» օպերացիան Իրաքում, որտեղ այն հանդես է եկել որպես ԱՄՆ-ի բանակի թեթև զրահավորված տեխնիկա։ 

Աշխարհի բոլոր հեռուստաալիքները ցուցադրել են կադրեր, որտեղ երևում է, թե ինչպես է այդ ամենագնացը հեշտությամբ տեղաշարժվում Պարսից ծոցի ավազներով։ Որպես արդյունք՝ այն ընդգրկված է շատ երկրների սպառազինությունների ցանկում։ 1992 թվականից General Motors ընկերությունը մշակել և սկսել է արտադրել Համմերի քաղաքացիական տարբերակը Hummer H1 անվանումով։ 

Արդյունքում այն մեծ ժողովրդականություն է ձեռք բերել։ Դրան նպաստել է նաև այն փաստը, որ այդ ամենագնացի առաջին տերերից մեկը եղել է Առնոլդ Շվարցենեգերը, և ստացվել է, որ Համմերն արժանի է իսկական տղամարդուն։ Այնուամենայնիվ, անգամ ամերիկացիների համար այդ ամենագնացը շատ թանկ ավտոմեքենա է. նրա գինը տատանվում է 70-85 հազար դոլարի սահմաններում։ Բացի դա, այդ ամենագնացի շահագործումը ևս շատ թանկ է ինչպես պահեստամասերի, այնպես էլ վառելիքի ծախսի տեսակետից։

 Ընդ որում, առաջին տարիներին General Motors-ը ամեն տարի արտադրել է այդ ամենագնացներից մոտ 2 000 հատ, այսինքն՝ այնքան, ինչքան թողարկվում են Ferrary-ի հանրահայտ մոդելները։ Սակայն, չնայած այդ ամենին, ներկայումս էլ այդ ամենագնացը պահանջված է։ 

Ի դեպ, դրանց ամենամեծ սպառողները հանդիսանում են Ռուսաստանը և Մերձավոր Արևելքը։ Նոր Համմեր գնելը այնքան էլ հեշտ չէ, քանի որ այդ ամենագնացներն ստեղծվում են ըստ պատվերի։ Ընդ որում, սկզբից անհրաժեշտ է մուծել հարյուր տոկոսանոց կանխավճարը, իսկ հետո սպասել, թե երբ կստեղծեն պատվերը։ Այս ամենը ևս մեկ անգամ հաստատում է, որ այդ ամենագնացները առանձնահատուկ են իրենց տեսակի մեջ։