Քննարկ­վում է կա­ռա­վա­րու­թյան և նա­խա­րա­րա­կան կո­մի­տե­նե­րի նիստերը հե­ռա­վար անց­կաց­նե­լու հնա­րա­վո­րու­թյու­նը

Արդարադատության նախարարությունն առաջարկում է լրացումներ կատարել կառավարության 2018 թվականի հունիսի 8-ի թիվ 667-Լ որոշման մեջ: Նախագիծը ներկայացվել է հանրային քննարկման: Նշվում է, որ այս որոշումն ուղղված է ապահովելու նախանիստերի, նախարարական կոմիտեների նիստերի և կառավարության նիստերի հեռավար անցկացման հնարավորությունը՝ առցանց հարթակի միջոցով: Նախագծի հիմնավորման մեջ նշվում է՝ սրա ընդունման անհրաժեշտությունը պայմանավորված է համաճարակի հետևանքով առաջացած արտակարգ դրությամբ պայմանավորված անձանց ազատ տեղաշարժման և շփումների հնարավորությունը կրճատելու հանգամանքով, միևնույն ժամանակ, հնարավորինս ապահովելով աշխատանքի բնականոն ընթացքը՝ էլեկտրոնային հաղորդակցության միջոցներով:

«Կառավարության կառուցվածքի և գործունեության մասին» օրենքի և կառավարության աշխատակարգի համապատասխան ներկայումս կառավարության նիստերը, կոմիտեների նիստերը և նախանիստն իրականացվում են կառավարության վարչական շենքում: Համաճարակի հետևանքով առաջացած արտակարգ դրությամբ պայմանավորված ստեղծվել է մի իրավիճակ, երբ տեղաշարժման և շփումների արդյունքում համաճարակի տարածման հնարավորությունն էականորեն ավելանում է: 

Ուստի, ըստ անհրաժեշտության, կիրառվել են սահմանափակումներ անձանց ազատ տեղաշարժման և շփումների հնարավորությունը կրճատելու համար: Միևնույն ժամանակ, անհրաժեշտություն է առաջացել նշված սահմանափակումների կիրառմանը զուգընթաց ապահովել աշխատանքի բնականոն ընթացքը՝ էլեկտրոնային հաղորդակցության միջոցներով, ապահովելով հնարավոր սոցիալական, տնտեսական, ֆինանսական խնդիրների լուծմանն ուղղված գործընթացները: 

Նշվում է, որ բացի ներկայիս իրավիճակն իրատեսական պետք է համարել նաև այն հանգամանքը, որ այլ դեպքեր նույնպես կարող են լինել, երբ վերը թվարկված նիստերը առցանց անցկացնելն անհրաժեշտություն կդառնա: 

Միգուցե և այդ եղանակով անցկացվող նիստերը բարձրացնեն աշխատանքի արդյունավետությունը, կարծում է նախարարությունը: Հաշվի առնելով սա, նախագծով առաջարկվում է կարգավորել նախանիստերի, կոմիտեների նիստերի և կառավարության նիստերի անցկացումը հեռավար՝ առցանց հարթակի միջոցով, որով ապահովվելու է նաև նիստերին ներկա գտնվելու իրավունք ունեցող անձանց հասանելիությունը, տեսակապը և նիստի արդյունավետ անցկացման համար անհրաժեշտ տեխնիկական հնարավորությունները:

Առաջարկվող կարգավորումը թույլ կտա կանխել վարակի արագ տարածումը և մեղմել հանրային առողջության վրա բացասական ազդեցությունը, գուցե հնարավորություն կստեղծվի խուսափել և առաջիկայում կայունացնել համաճարակային իրավիճակը Հայաստանում։

Մասնավորապես ի՞նչ փոփոխություններ են առաջարկվում: Նշվում է, որ նախանիստը, նիստը վարողի նախաձեռնությամբ, կարող է անցկացվել նաև հեռավար՝ առցանց ռեժիմով: Կոմիտեի նիստերը նույնպես կարող են անցկացվել առցանց ռեժիմով: 

Միևնույն ժամանակ բոլոր հեռավար նիստերին ապահովվում է դրանց ներկա գտնվելու իրավունք ունեցող անձանց հասանելիությունը, տեսակապը և նիստի արդյունավետ անցկացման համար անհրաժեշտ այլ տեխնիկական հնարավորությունները: Վարչապետի հանձնարարությամբ կառավարության նիստերը ևս կարող են անցկացվել այս ռեժիմով՝ միևնույն ժամանակ պետք է ապահովվի կառավարության անդամների և կառավարության նիստին ներկա գտնվելու իրավունք ունեցող անձանց հասանելիությունը:

Վարչապետի աշխատակազմի ղեկավարն այս որոշումն ուժի մեջ մտնելուց հետո՝ երկշաբաթյա ժամկետում պետք է ապահովի այս որոշմամբ սահմանված նիստերի հեռավար անցկացման տեխնիկական հնարավորությունը: Ի դեպ, ուշագրավ է, որ արտակարգ իրավիճակով պայմանավորված որոշման նախագիծը հանրային քննարկման է դրված մինչև... ապրիլի 22-ը:

ԼՈՒՍԻՆԵ ԱՌԱՔԵԼՅԱՆ