Տե­ղա­շարժ՝ գե­րա­կա հան­րա­յին շահ ճա­նաչ­ված տա­րածք­նե­րի մա­սով. հա­ջորդ քայ­լը կա­ռա­վա­րու­թյանն է

«Փաստ» օրաթերթը դեռևս նախորդ տարի անդրադարձել է Երևանի փոքր կենտրոնում գերակա հանրային շահ ճանաչված շենքերին, բնակիչների դիմումներին, որոնք պահանջում են անվավեր ճանաչել կառավարության 2007 թվականի որոշումները: 

Բնակիչները նշում էին՝ մի քանի տարի է, ինչ դատարանի միջոցով փորձում են լուծել իրենց խնդիրները, անվավեր ճանաչել որոշումները, սակայն ապարդյուն: Դիմում-նամակներով դիմել էին նաև վարչապետ Նիկոլ Փաշինյանին՝ իրենց խնդիրն ուշադրության կենտրոնում պահելու համար: 

Նրանք մեզ հետ զրույցում ասել էին, որ իրենց խնդրի լուծմանը հետամուտ են նաև ԱԺ փոխնախագահ Վահե Էնֆիաջյանը և «Իմ քայլը» խմբակցության պատգամավոր Արուսյակ Ջուլհակյանը:

 

Թերևս հետամուտ լինելով քաղաքացիների, նաև պաշտոնյաների բարձրաձայնումներին՝ վարչապետ Նիկոլ Փաշինյանի որոշմամբ 2019 թվականի դեկտեմբերին ստեղծվեց միջգերատեսչական հանձնաժողով՝ գերակա հանրային շահ ճանաչելու վերաբերյալ ՀՀ կառավարության 2006-2018 թվականներին ընդունված որոշումների հետագա ընթացքը քննարկելու և անհրաժեշտ առաջարկություններ ներկայացնելու նպատակով: 

Օրերս հանձնաժողովի աշխատանքների ընթացքի վերաբերյալ փաստաբան Նելլի Պապյանը ֆեյսբուքյան իր էջում տեղադրեց քաղաքաշինության կոմիտեին ուղղված իր դիմումի պատասխանը, որով գերատեսչությունը տեղեկացնում է, որ քաղաքաշինության կոմիտեում 2020 թվականի մարտի 10ին տեղի է ունեցել վարչապետի որոշմամբ ստեղծված հանձնաժողովի հերթական երկրորդ նիստը, որի ընթացքում քննարկվել և արդյունքում կառավարությանն առաջարկվել է Երևանի Պուշկին, Տերյան, Կողբացու և Հին Երևանցու փողոցներով պարփակված տարածքում պահպանել դեռևս չիրացված շենքը գույքագրել, բանակցել արտաքին տեսքի պահպանման տարբերակների շուրջ: 

Բացի դա, տեխնիկական վիճակի վերաբերյալ եզրակացության առկայության պարագայում իրականացնել ամրակայման աշխատանքներ և մշակել երեսպատման աշխատանքների նախագիծ, ինչպես նաև դատարան ներկայացված հայցի մասով իրականացնել իրավական կարգավորման գործընթաց: Ինքնին հասկանալի է, որ «վերջնական խոսքը» լինելու է կառավարությանը, սակայն թե՛ փաստաբանները, թե՛ բնակիչները այդ որոշում-առաջարկը փոքրիկ, բայց շատ կարևոր ու սպասված հաղթանակ են համարում:

Փաստաբան Նելլի Պապյանը նշում է՝ վարչապետի որոշմամբ ստեղծված միջգերատեսչական հանձնաժողովը Տերյան, Պուշկին, Կողբացի և Հին Երևանցի փողոցներով պարփակված հատվածում գտնվող շենքի մասով քննարկումներ է կազմակերպել և որոշում կայացրել՝ առաջարկ անել կառավարությանը այդ տարածքում գտնվող շենքը չիրացնելու մասով: 

«Բացի սա, առաջարկի մեջ ասվում է, որ պետք է լուծումներ գտնել շենքերի արտաքին տեսքի հետ կապված: 

Իհարկե, սա վերջնական որոշում չէ, ի վերջո, պետք է կառավարությունը մերժի կամ հաստատի այս առաջարկը, սակայն սա մեկ կարևոր քայլ է այս խնդրի լուծման հարցում, առաջընթաց է այն մասով, որ ունենք տեղաշարժ՝ միջգերատեսչական հանձնաժողովը որոշում է կայացրել, որ այդ շենքերը չպետք է իրացվեն:

 Հանձնաժողովը համարել է, որ կան խախտումներ, մասնավորապես խախտվում են սեփականատերերի իրավունքները: Այդ մասով ունենք շատ մեծ առաջընթաց: Տարիների ընթացքում մշտապես բնակիչների կողքին ենք եղել ու պաշտպանել նրանց իրավունքները, որպեսզի շարունակեն ապրել իրենց տներում, այնպես որ այս պահին նման որոշումը համարում ենք հաղթանակ, որովհետև, ի վերջո, դրական լուր ենք ստացել, տեղաշարժ ենք նկատում»,-«Փաստի» հետ զրույցում ասում է Նելլի Պապյանը:

Նա հիշեցնում է, որ Պուշկին փողոցում կան մշակութային արժեքներ՝ բավականին հին՝ 19-րդ դարին թվագրված գինետուն՝ իր ճզմարաններով: «Դրանք պատմամշակութային արժեքներ են, որոնք, ըստ իս, ենթակա են պահպանման: 

Իհարկե, հանձնաժողովի՝ մեզ տրամադրված պատասխանում խոսք չկա այն մասին, որ այդ գինետան առկայությունն է նաև նպաստել նրան, որ այդ տարածքը չիրացնելու մասին առաջարկ արվի կառավարությանը, բայց կարծում եմ, որ դա ևս իր նշանակությունն ունեցել է որոշումը կայացնելիս: Սա, իհարկե, իմ սուբյեկտիվ կարծիքն է»,-նշում է մեր զրուցակիցը:

Հետաքրքրվում ենք՝ փաստաբանի կարծիքով միջգերատեսչական հանձնաժողովի այս որոշումը կարո՞ղ է «վարակիչ» լինել նաև գերակա հանրային շահ ճանաչված մյուս տարածքների մասով: Նա դրական պատասխան է տալիս: 

«Այս առաջարկը կարող է վարակիչ լինել նաև գերակա հանրային շահ ճանաչված մյուս տարածքների մասով և ըստ տեղայնության քննարկվեն յուրաքանչյուր տարածքին վերաբերող հարցերը, որոնք ճանաչվել են բացառիկ գերակա հանրային շահ: 

Հնարավոր է՝ դրանց մասով ևս մոտ ապագայում քննարկվեն կառուցապատողների կողմից կատարված բազմաթիվ խախտումները, վեր հանվեն խնդիրները, դրանց լուծում տրվի և մարդիկ, ի վերջո, իմանան, թե դրանք իրենց տնե՞րն են, թե՞ ոչ: 

Այսօր ունենք բազմաթիվ բնակիչներ, որոնք ուղղակի լքել են իրենց տները՝ առանց իմանալու, թե հետագայում ինչ է լինելու: Կան բնակիչներ, որոնք վտարվել են հարկադիր ծառայության կողմից և անգամ որևէ գումար չեն ստացել»,-եզրափակում է Նելլի Պապյանը:

ԼՈՒՍԻՆԵ ԱՌԱՔԵԼՅԱՆ