Թանգարանները և գրադարանները՝ ձեր տանը

Past.am

Վերջին շաբաթներին մեր իրականության մեջ թերևս ամեն ինչ կատարվում է օնլայն, հեռավար տարբերակով՝ գնումներ, բանկային գործարքներ, հեռավար ուսուցում և այլն: Սոցիալական ցանցերը հատկապես լավ միջոց են տեղեկատվության տարածման, հետաքրքիր նախաձեռնություններն ավելի մատչելի դարձնելու առումով: Վերջերս ֆեյսբուք սոցիալական ցանցում ստեղծվել է «Տնից թանգարան և գրադարան» խումբը: Մի քանի օրում դրա մասնակիցների թիվը հատել է 1000-ը: Երևանյան և մարզային թանգարաններն ու գրադարաններն այս խմբում հանդես են գալիս դասախոսություններով, կազմակերպում տարբեր հարցումներ, ներկայացնում լուսանկարների ու ցուցանշումների պատմություններ, մշակույթի ոլորտի ներկայացուցիչները ներկայացնում են գրողների ստեղծագործությունները: Եվ սա ամբողջ չէ:

Թանգարանագետ, ԿԳՄՍնախարարիտեղակալիօգնականՀայկՄկրտչյանը նշում է՝ սոցիալական ցանցում այս խմբի ստեղծումը պայմանավորված էր համավարակի տարածմամբ: «Խնդիր ունեինք մի հարթակ բերել թանգարանների և գրադարանների բոլոր տիպի ծրագրերը, որոնք նրանք իրականացնում էին իրենց անհատական էջերի կամ էլ կայքերի միջոցով: Այս ամբողջը մեկ տեղում հավաքելու, բոլորին մեկ հարթակ բերելու միտք առաջացավ: Նրանք այսուհետ նաև այս հարթակում կներկայացնեն ծրագրերը՝ միաժամանակ զարգացնելով իրենց էջերը և կայքերը»,-«Past.am»-ի հետ զրույցում ասում է Մկրտչյանը: Նա նշում է՝ իրենց այս առաջարկին արձագանքել են թանգարանները և գրադարանները, որոնք, ըստ էության, ենթակա են կրթության, գիտության, մշակույթի և սպորտի նախարարությանը:

Ստեղծումից մի քանի օր անց ակնհայտ է, որ խումբը բավականին ակտիվ է, այնտեղ անընդհատ մշակութային հետաքրքիր նորություններ ենք տեսնում: «Սկզբում ինձ թվում էր, որ կսահմանափակվենք միայն թանգարանների և գրադարանների ներկայացուցիչներով, կլինի պասիվ տեսանելիություն, բայց խմբին միացան նաև հասարակության ներկայացուցիչները: Դիտելիությունն անցնում է 30 հազարը, այն դեպքում, երբ խումբը միայն վերջերս է ստեղծվել: Ամեն շաբաթ հաշվետվություններ ենք հավաքագրում թանգարաններից, թե ինչ նորություններ ունեն, ինչ աշխատանք են տանում: Այդ աշխատանքը հետաքրքիր մեթոդով կանոնակարգեցինք, քանի որ սկզբնական շրջանում ամեն տեսակի նյութ հայտնվում էր խմբում: Մեկնարկից մեկ շաբաթ անց առաջարկեցինք թանգարաններին ներկայացնել իրենց ամենօրյա ծրագիրը, թե որ ժամին ինչ են ուզում ներկայացնել: Այն պետք է լինի ինտերակտիվ, այսինքն հնարավորինս պետք է ապահովենք մեր վիրտուալ այցելուի մասնակցությունը՝ կլինի դա դիալոգ, խաղ, թե մեկ ուրիշ բան: Մեր այս առաջարկին թանգարաններն ընդառաջ գնացին և սկսեցին իրենց աշխատանքը վերափոխել այս ձևով»,-նշում է մեր զրուցակիցը:

Նա հիշեցնում է՝ թանգարանը կրթական ոչ ֆորմալ տարածք է: «Խնդիր ունեինք հեռավար ուսուցման կարգն ակտիվացնել նաև թվային հարթակում: Ընդ որում, թվայնացման գործընթացը մեր բոլոր թանգարանների և գրադարանների դեպքում աշխատանքի ակտիվ բաղադրիչ է եղել: Այս օրերին այդ աշխատանքներն ավելի արագացել են: Հիմա բավականին հետաքրքիր ծրագրեր են անում և դա լրացուցիչ ազդակ է, որ երբ ամեն ինչ կարգավորվի, իրական հերթեր կգոյանան թանգարաններում և գրադարաններում՝ մասնակցելու այն ծրագրերին, որոնք օնլայն են իրականացվում: Թանգարանների և գրադարանների համար սա շատ կարևոր մարտահրավեր էր, որպեսզի իրենք փորձեն հասկանալ, թե որքանո՞վ են գրավիչ իրենց սոցցանցային էջերը: Այստեղ մեդիագրագիտության կարևոր բաղադրիչ առաջ եկավ՝ որքանո՞վ են իրենք կարողանում գրավչություն ապահովել վիրտուալ հարթակում»,-ընդգծում է թանգարանագետը:

Նա հավելում է՝ այս պահին նախաձեռնությունը բավականին հաջող ընթացքի մեջ է: «Այս խումբը կգործի նաև հետագայում՝ շարունակելով մնալ որպես միասնական պլատֆորմ մարդկանց համար, ընդ որում, նաև տարբեր միջոցառումների մասին տեղեկատվություն տարածելու առումով»,-եզրափակում է Հայկ Մկրտչյանը:

Լուսինե Առաքելյան