Քաղաքապետարանից բնակարան ստացած Վահրամ Սահակյանը նախընտրում է «ճոռո-ճոռո» չխոսել

Նախկինում քաղաքական սկանդալային հայտարարություններով աչքի ընկնող թատերագետ, գրող Վահրամ Սահակյանը Past.am-ի հետ զրույցում նեղվեց, երբ փորձեցինք նրանից մեկնաբանություն ստանալ «Նոր Հայաստանի» կողմից կազմակերպված հանրահավաքի և նստացույցի մասին:

«Ես շատ ուրախ կլինեի, եթե դուք ինձ զանգեիք և հարցնեիք իմ նոր ներկայացման մասին: Ես չեմ հասկանում քաղաքական հասկացություններից, որ ձեզ պատասխան տամ: Ներողություն եմ խնդրում, դա վիրավորական է ձեր կողմից: Ես գրող եմ, պիեսներ եմ բեմադրում, շուտով «Մեա կուլպա-2»-ն եմ բեմադրելու, դրանից հարցրեք»,- ասաց Սահակյանը:

Արձագանքեցինք, թե նա մտավորական է և կազմում է հասարակության մի մասը և պետք է, որ տեսակետ ունենա: Ի պատասխան՝ գրողն ասաց. «Ցանկացած արվեստագետ իր խոսքն ասում է իր գործով, ես մյուսների նման ամբոխահաճո չեմ հելնելու «ճոռո-ճոռո» խոսամ»: Հետաքրքրական է, որ բազմիցս քաղաքական գնահատականներ հնչեցնող թատերագետը վերջին շրջանում խուսափում է որևէ քաղաքական գնահատական հնչեցնել:

Այնուամենայնիվ, պետք է արձանագրել, որ այս տարվա հոկտեմբերին Երևանի քաղաքապետարանը, ավագանու որոշման համաձայն, սկանդալային Վահրամ Սահակյանին նվիրել է բնակարան, որը գտնվում է Երևան քաղաքի Մարգարյան փողոցի նորակառույց շենքում: Իսկ թե արդյոք բնակարանի նվիրատվությունը կարող է կապ ունենալ նրա խորհրդավոր լռության հետ, կարող ենք միայն ենթադրել:

Լիլիթ Լալայան