«Սորոսականները» գրոհում են ու պահանջում

Չնայած այս օրերին համայն աշխարհում ուշադրության կենտրոնում են համաշխարհային պանդեմիայի հաղթահարման և համավարակից նվազագույն կորուստներով դուրս գալու տարբերակները, հայաստանյան իշխանությունները շարունակում են իրենց ուշադրության կենտրոնում պահել դատական համակարգում ամեն գնով փոփոխություններ իրականացնելու հարցը։ 

Թերթի տեղեկություններով, արտակարգ դրության այս օրերին հարցի վերաբերյալ առանձնահատուկ հետաքրքրություն ունեցող որոշակի շրջանակները մի քանի «մինի» հանդիպումներ են ունեցել և տեսակապով մի քանի քննարկումներ են անցկացրել ՍԴ-ի հետ կապված հետագա կարգավորումների ու դատավորների բարեվարքության հետ կապված տարբեր հարցերի վերաբերյալ։ 

Այս հարցում առավել ակտիվ են Սորոսի գրասենյակն ու այնտեղից գրանտներ ստացող շրջանակները։ Ի դեպ՝ նույն «սաստավն» ակտիվ էր նաև, երբ գործող իշխանությունները անցումային արդարադատության հետ կապված լսումներ էին կատարում, և «սորոսականների» հրավերով Հայաստան էր եկել անցումային արդարադատության փորձագետ Ռուբեն Կարանզան։ 

Նախօրեին հայտնի դարձավ, որ Սորոսի գրասենյակը մի քանի կազմակերպությունների հետ միասին հայաստանյան իշխանություններին դատական համակարգում փոփոխություններ իրականացնելու պահանջներ է ներկայացրել։ 

Հատկանշականն այն է, որ արդարադատության նախարարությունն այս հայտարարության հետ կապված նշել է, որ ներկայացված պահանջներն անբացատրելի են, քանի որ նախարարությունը հստակ նշել է իր քայլերի հաջորդականությունն ու անելիքները։ 

Ըստ էության, այսպես կոչված, «սորոսական» ողջ էշելոնը լայն ճակատով գրոհել է սեփական կադրի պատասխանատվության տակ գտնվող ոլորտի վրա, սակայն հանուն արդարության պետք է փաստենք, որ բավականին կոռեկտ պատասխան է ստացել։