«Մեր քաղաքականացված հասարակությանը պետք է կողմնորոշել դեպի մշակույթը»

Past.am

Բանաստեղծուհի Սուսաննա Ղազարյանը կարծում է, որ մեզ տրված այս ժամանակահատվածում պետք է փորձենք առանց խուճապի մատնվելու, ճիշտ վերագնահատելով և արժևորելով ժամանակը, ամեն մեկս մեր բնագավառում էլ ավելի  ինքնակրթվել, աշխատել և ավելի բարձր ու լավ արդյունքների հասնել: «Սեփական փորձից ասեմ, որ սկզբնական շրջանում մի փոքր տագնապի մեջ էի, հետո ինքս ինձ վերագտա, սկսեցի ընթերցել, ստեղծագործել, աշխատում եմ նոր գրքիս վրա, որն ապագայում կհայտնվի ընթերցողի սեղանին: Անկախ մասնագիտական բնագավառից՝ յուրաքանչյուրս մեր հոգին պետք է լցնենք արվեստով, բարձր արվեստի և ճշմարիտ գրականության միջոցով մեր հոգիները խաղաղվում և մաքրվում են»,-Past.am-ի հետ զրույցում ասում է բանաստեղծուհին:

Շատ է խոսվում այն մասին, որ այս օրերը ստիպեցին, որ մշակույթը տեղափոխվի օնլայն հարթակ, սա օգնեց շատ ստեղծագործողներին ավելի ճանաչելի դառնալ, հատկապես ժամանակակիցների առումով, որոնց հանդեպ որոշակի թերահավատություն կա մեր հասարակության մեջ: Ղազարյանը նշում է՝ այո, թերահավատությունը ժամանակակիցների հանդեպ կա, բայց կան ստեղծագործողներ, որոնք շարունակում են մեր ավանդույթները, դասականների կիսատ թողած գործը, և չի կարող այնպես ստացվել, որ նրանց ստեղծագործությունները վատը լինեն: «Այս օրերին մեր ստեղծագործողներից շատերը բավականին աշխուժացել են, շատերը ուղիղ եթերներով են հանդես գալիս, հաղորդումներ են պատրաստում, ներկայացնում մեր ժամանակակիցներին, ընդ որում, տարբեր ոլորտների: Այս ժամանակահատվածը մեզ համար հնարավորություն ստեղծեց, որ մենք էլ ավելի մոտենանք մեր ժամանակակիցների արվեստին: Դասական ստեղծագործողներին պետք է միշտ անդրադառնալ, իսկ ժամանակակիցներին թերահավատորեն վերաբերելու փոխարեն փորձենք ծանոթանալ նրանց աշխատանքներին»,-նշում է մեր զրուցակիցը:

Ղազարյանն ընդգծում է՝ օնլայն տիրույթում հանդես գալը հաճելի է, եթե չլիներ այն, մենք մեր ժամանակակիցներից շատերից ուղղակի չէինք ճանաչի: «Շատերին հենց այս տիրույթի միջոցով են հայտնաբերում: Պետք է լինի պետության հոգածությունը լավ ստեղծագործողների հանդեպ: Եթե պետությունն իր հոգատար ձեռքը դնի տաղանդավոր ստեղծագործողների վրա, նրանք ներկայացվեն ԶԼՄ-երի միջոցով, երբեմն պետական հովանավորությամբ տպագրեն գրքեր կամ կազմակերպեն ցուցահանդեսներ, այս կերպ հանրությունը կիմանա, թե ովքեր են իր ստեղծագործողները: Դա պետք է անի պետությունը, որևէ կազմակերպություն կամ անհատ չի կարող նման ծավալուն գործունեություն ծավալել: Պետությունը պետք է մշակույթը բերի առաջին տեղ, մենք շատ քաղաքականացված հասարակություն ենք, որին պետք է կողմնորոշել դեպի մշակույթը և դարձնել մշակութային հասարակություն, որովհետև այն բարձր արժեքներ է կրում»,-եզրափակում է Սուսաննա Ղազարյանը:

Լուսինե Առաքելյան