Հնարավոր է, որ ավելի ուժեղ, տոտալ սահմանափակումների ռեժիմներ սահմանվեն, ինչը ոչ մեկ չի ուզում. Թորոսյան

 

«Այսօրվա դրությամբ ունենք հաստատված նոր 121 դեպք, բուժված նոր 36 դեպք, ընդհանուր հաստատված դեպքերի թիվը կազմում է 2507, բուժվածների թիվը` 1071: Ցավոք, ունենք 4 նոր մահ: Կորոնավիրուսային հիվանդությունից ընդհանուր մահացության թիվը կազմում է 39-ը և 4 անուղղակի մահ, որոնք ունեցել են կորոնավիրուսային հիվանդություն, բայց մահը հասել է այլ պատճառներով: Այս պահին ակտիվ բժշկական հսկողության տակ գնվում է 1393 քաղաքացի: Մինչ օրս 25 հազար թեստավորում է կատարվել: Ունենք 9 քաղաքացի, որոնք միացված են թոքերի արհեստական շնչառության սարքերին, 35 ծայրահեղ ծանր և 65 ծանր վիճակում գտնվող քաղաքացիներ: Մեկուսացման վայրերում ունենք մոտ 2 հազար քաղաքացի, մահճակալային ֆոնդի առումով ունենք մոտ 350 ազատ մահճակալ»,-ԱԺ Առողջապահության և սոցիալական հարցերի մշտական հանձնաժողովի նիստին ասաց Առողջապահության նախարար Արսեն Թորոսյանը: Նա նշեց, որ գնալով առողջապահական համակարգի վրա ծանրաբեռնվածությունն ավելանում է:

 

«Դեռևս տանելի բեռնվածության մակարդակ է, կարելի է ասել, սակայն պետք է այնպես անենք, որ չգա մի օր, երբ բուժօգնության կարիք ունեցող քաղաքացին մնա առանց բուժօգնության: Մեր հիմնական նպատակն այս պահի դրությամբ դա է: Սարքերի, մահճակալների, բուժաշխատողների առումով այս պահի դրությամբ, կարծես թե, պակասի խնդիր չունենք, քանի դեռ իմ ասած թվերի մեջ ենք: Կարևոր է, որ այս սահմանափակումների թուլացմանը զուգընթաց, մենք բոլոր կանոնները, պարետատան կողմից հաստատվել են, պահպանվեն հնարավորինս խստագույն ռեժիմում, այլապես կարող է գալ մի իրավիճակ, որի մասին խոսում են շատ երկրներում, որ ավելի ուժեղ, տոտալ սահմանափակումների ռեժիմներ սահմանվեն, ինչը ոչ մեկ չի ուզում: Բայց դա է այն սցենարը, եթե չպահենք կանոնները: Հետևաբար ազգովի պետք է պայքարենք այս մարտահրավերի դեմ, քանի որ կառավարությունը միայնակ չի կարող պայքարել մարդուց մարդ փոխանցվող վարակների դեմ, եթե մարդիկ իրենք չեն կանխարգելում այդ փոխանցումը»,-նշեց նա:

 

Նախարարն անդրադարձավ նաև այն մեղադրանքներին, թե քիչ թեստեր են արվում. «Ես ուզում եմ ասել, որ Հայաստանն իր արված թեստերի քանակով համադրելի է Ճապոնիայի, Իտալիայի հետ: Խոսքը մեկ հայտնաբերված դեպքին քանի թեստ է արվում այդ հարաբերակցության մասին է: Իհարկե կան երկրներ, որոնք անում են օրինակ 10 անգամ ավելի շատ, քան մենք, օրինակ ԱՄԷ-ը, բայց մենք այդ առումով վատ դիրքում չենք և մեր թեստավորման հնարավորությունները գնալով ավելանալու են, ինչն իրականում շատ հեշտ չէ: Հայաստանում այսօր փաստացի բոլոր լաբորատորիաները ներգրավված են այդ պրոցեսում»:

 

Թորոսյանը շեշտեց, որ օրենսդրական փոփոխություններ են նախատեսվում և այսօր կառավարությունում կամփոփեն «Բժշկասանիտարական անվտանգության մասին» օրենքի նախագիծը և համապատասխան ընթացակարգով կուղարկեն ԱԺ:

 

«Օրենքի փոփոխության անհրաժեշտությունն այն է, որ արտակարգ դրության ավարտից հետո կառավարությունն ունենա գործիքակազմ լոկալ միջոցառումներ անելու: Խոսքը աշխարհագրական լոկալ սահմանափակումների մասին է, ինչպես նաև այսօր գործող անձնական սահմանափակումների մասին:Կարծում եմ` արագ ընթացակարգով կկարողանանք դա ընդունել, նայած արտակարգ դրությունը կշարունակվի, թե չէ»,-հավելեց նա: