Մի փոքր վախեցրեց բոլորիս, բայց կարևորը, որ Գոհարն ու աղջիկս արդեն շատ լավ են. Հայրիկը պատմում է Գոհար Հովհաննիսյանի դստեր «էքստրեմալ» ծնունդի մասին

Life.panorama.am-ը գրում է.

Երեկ ոչ միայն Հայաստանը, այլ նաեւ երկինքը «ցնցեց» ժողովրդական երգերի կատարող Գոհար Հովհաննիսյանի դստեր ծնունդը. Երգչուհին, Աղասի Իսպիրյանի եւ Ռուբեն Սասունցու հետ հյուրախաղերի էր մեկնել, եւ արդեն վերադառնում էր Հայաստան, իսկ դստեր ծնունդին սպասում էր դեկտեմբերի վերջին, բայց արի ու տես, որ փոքրիկ Գայանեն մայրիկի եւ Սիդնեյ-Դուբայ չվերթի 450 ուղեւորների համար անակնկալ էր պատրաստել՝ ժամանակից մի փոքր շուտ ծնվելով: Ավստրալիա-Դուբայ չվերթի ինքնաթիռը երեք ժամ թռչելուց հետո հարկադրաբար վայրէջք է կատարել, որից հետո էլ երկունքի ցավերով երգչուհուն տեղափոխել են Ավստրալիայի հյուսիսում գտնվող Պերթ քաղաք, ուր եւ ծնվել է  փոքրիկը:

Life.panorama.am-ը կապ հաստատեց Գոհար Հովհաննիսյանի ամուսնու՝ դհոլահար Գուրգեն Թամրազյանի հետ: Մեզ հետ զրույցում նորաթուխ հայրիկը հուզված էր՝ աղջկա «էքստրեմալ» ծնունդը հայրիկին ավելի շատ անհանգստություն էր պատճառել.

«Աղջիկս պետք է ծնվեր դեկտեմբերի վերջին, բայց որոշեց շուտ լույս աշխարհ գալ, մի փոքր վախեցրեց բոլորիս, բայց կարեւորը, որ Գոհարն ու աղջիկս արդեն շատ լավ են: Դե իսկ մեր տանը հիմա մեծ ուրախության հետ մեկտեղ, շարունակվում է շփոթմունքն ու անհանգստությունը: Հավանաբար 10 օրից նրանք արդեն ինձ հետ կլինեն, այդ ժամանակ ավելի հանգիստ կլինեմ»,- հուզված պատմեց նորածնի հայրիկը:

2.9 կգ կշռող Գայանեին անվանակոչել են տատիկի պատվին. «Դե քանի որ գիտեինք, որ աղջիկ է, նախապես որոշել էինք, որ կանվանակոչենք տատիկի անունով»:

Life.panorama.am-ը նորածին Գայանեին եւ աշխարհի բոլոր փոքրիկներին առողջ ու անհոգ մանկություն է մաղթում:

Հեղինակ՝ Անուշիկ Մելքոնյան