Ասեցիր՝ դեպուտատ եմ, հերիք էր, էլ հայհոյելս ո՞րն ա

«Իրավունք» թերթը գրում է. «Երեկ ԱԺ նիստից հետո մի շարք պատգամավորներ խորհրդարանական միջանցքներում՝ մասնավոր զրույցներում, ամփոփում էին արտահերթ նիստը, իսկ ոմանք էլ ամփոփում էին ԱԺ ԲՀԿ-ական պատգամավոր Հրանտ Դավթյանի պահվածքը: ԲՀԿ-ական ավագ սերնդի պատգամավորները մասնավորապես նշում էին. «Թե ասա, Հրանտ, ասեցիր՝ դեպուտատ եմ, հերիք էր, էլ հայհոյելս ո՞րն ա», մեկ ուրիշն էլ ավելացրեց. «Ինձ էլ են ոստիկանները բռնում ճանապարհին, ջանով-ջիգյարով ասում եմ՝ սխալվել եմ, պատգամավոր եմ, անցնում-գնում ա»:

Հիշեցնենք, որ օրեր առաջ ճանապարհային ոստիկանության 2-րդ սպայական գումարտակի 3-րդ վաշտի աշխատակիցները ճանապարհային երթեւեկության կանոնների խախտման համար, Երեւան-Աբովյան ավտոճանապարհի Աբովյանի վարչական տարածքում կանգնեցրել են Toyota մակնիշի 098 QQ 11 համարանիշի ավտոմեքենան: Սակայն սա չէ ուշագրավ, այլ այն, որ մինչեւ ՃՈ աշխատակիցը կկազմեր արձանագրություն, ավտոմեքենայի միջից հայհոյանքների տեղատարափով դուրս է գալիս ոչ ավել, ոչ պակաս ԱԺ ԲՀԿ-ական պատգամավոր Հրանտ Դավթյանը. «Էս յեքա տռասի վրա էլ ավտո չկար, դեպուտատին պիտի կանգնացնես, ակտ գրես, բեսամթ տղա ես դառել դու, արա…»:

Ապ պատգամավորը նույն ոճով շարունակել էր. «Քեզ դրել ես Հիսուս Քրիստոսի աշակերտի տեղը… անշնորհքավարի ակտ ես գրում դեպուտատի վրա»: Թերեւս հրապարակված տեսանյութից միայն այսքանն էր առանց հայհոյանքների, ինչը ներկայացրինք ձեր ուշադրությանը»:

Առավել մանրամասն՝ թերթի այսօրվա համարում