«Ապ­րան­քը պարտ­քով են ձեռք բե­րել, վար­կեր ունեն». առևտ­րա­կան­նե­րը խնդիր­նե­րի առաջ են կանգ­նել

Համաճարակով պայմանավորված իրավիճակն իր ազդեցությունն է ունեցել նաև առևտրականների գործունեության վրա: Խոսքը միայն տոնավաճառներում իրենց գործունեությունը ծավալողների մասին չէ: Խնդիրը նաև հագուստի կամ կոշիկի խանութներ ունեցողներին է վերաբերում: «Փաստի» հետ զրույցում այս մասին հայտնեց «Հայաստանի տոնավաճառներ» ՀԿ նախագահ Գագիկ Դանիելյանը:

Հասարակական կազմակերպության նախագահը մի շարք մտահոգություններ ունի: Կարծում է՝ անգամ եթե սահմանափակումները մեղմացվեն, ու գործի նաև տրանսպորտը, իրենց խնդիրները դրանով չեն լուծվի: Պատճառն այն է, որ այս ընթացքում առևտրականները միանգամից մի քանի խնդրի առաջ են կանգնել:

«Առևտրականների վիճակը ծանր է: Ես համոզված եմ, որ առևտուր այդքան շատ չի լինելու, բայց դրան զուգահեռ՝ մարդիկ ստիպված են լինելու վճարել տեղի գումարները, վարձակալած տարածքների վարձավճարները: Մյուս կողմից՝ այլ խնդիրներ էլ են ծագել: Այս իրավիճակից առաջ մարդիկ ապրանքներ են բերել, նոր ապրանքներ են ստացել, որոնք մնացել են պահեստներում: Ապրանքը եկել է, բայց առևտուր չկա: Առևտուր չկա նաև այն տեղերում, որոնք ավելի վաղ էին բացվել: 

Բացի այդ, հիմնականում գարնանային ապրանքներ՝ հագուստ ու կոշիկ են բերել, բայց ամառ է գալիս, իսկ այդ ապրանքները, համենայն դեպս, այս սեզոնին չեն վաճառվի»,-ասաց մեր զրուցակիցը՝ շեշտելով, որ բացի այս հարցերից, մեկ այլ՝ ավելի կարևոր խնդիր կա:

«Առևտրականներից շատերը ապրանքը պարտքով են ձեռք բերել, հիմա դրսից զանգում ու այդ գումարներն են ուզում, բայց այս մարդիկ հացի փող չունեն, որտեղի՞ց տան պարտքը: 

Կան տնտեսվարողներ, որոնք խանութները վարձակալել են, բայց հիմա սեփականատերերը պահանջում են այն գումարը, որի շուրջ հենց սկզբից են պայմանավորվածություն ձեռք բերել»,-ասաց Գ. Դանիելյանը:

Նա հավելեց, որ պետության կողմից աջակցություն ստացողներ եղել են, բայց դա մեծ խնդիր չի լուծում. «36 հազար դրամ գումար է տրվել, երկու ամսվա մեջ 36 հազարով հնարավո՞ր է ապրել: 

Միգուցե այդքան են կարողանում, այդքան են տալիս, բայց խնդիրն այլ է: Մեզ համար զարմանալի էր, թե ինչու էին բացում փոքր խանութները, բայց տոնավաճառների ու առևտրի կենտրոնների վերաբերյալ ավելի վաղ նման որոշում չէր կայացվում»:

 

Նա շեշտեց, որ առևտրականներից շատերն արդեն այլ գործունեությամբ զբաղվելու որոշման մասին են մտածում:

«Կարծում եմ՝ առևտուրը զգալիորեն կպակասի, որովհետև բոլորն այսօր սնունդ ձեռք բերելու մասին են մտածում, ո՞վ է հագուստի կամ կոշիկի մասին մտածում: Ամենաքիչը 50 հազար առևտրական կա ոլորտում: Որ առևտուր չլինի, տեղի գումարը, հարկերը, պետության հարկ ու տուրքը ինչպե՞ս պետք է տան: 

Այնքան մարդիկ կդադարեն այդ գործունեությամբ զբաղվել: 

Ո՞վ կգնա ու վնասով կաշխատի: Շատ-շատ բացվելուց հետո մեկ ամիս փորձեն աշխատել, որից հետո, համոզված եմ, շատերն են փակվելու»,-ընդգծեց մեր զրուցակիցը՝ հավելելով, որ հարկային արձակուրդների և նման այլ արտոնություններ սպասելու առումով ինքն անձամբ այլ պատկերացում ունի:

«Եթե բոլորս հարկ ու տուրք չմուծենք, պետությունն ինչո՞վ է գոյատևելու: Այնպես որ, դա էլ հարցի լուծում չէ: Ընդհանուր առմամբ, անորոշություն կա: 

Այսպիսի անորոշ իրավիճակ ոչ մի ժամանակ չի եղել: Մարդը, որ դեռ մի քիչ փող ունի, մտածում է՝ ինչ անի, մտածում է գործունեությունը փոխելու մասին: 

Իսկ ով էլ փող չունի՝ մտածում է՝ ոնց ապրի ու գոյությունը պահպանի: Բացի այդ, նրանց մի մասն էլ այսօր մտածում է վարկերը փակելու մասին: Մարդիկ կան՝ պարտքով, մարդիկ էլ կան՝ վարկի միջոցով են ապրանքները ձեռք բերել ու հիմա նստած՝ չգիտեն՝ ինչպե՞ս փակել վարկերը: Այսօր ոչ ոք չգիտի՝ իր գլխին ինչ է գալու»,-ընդգծեց մեր զրուցակիցը:

Նա շեշտեց, որ, ամեն դեպքում, լավատեսությունը չեն կորցնում:

«Սպասում են, տեսնենք՝ բացելուց հետո ինչ վիճակ կլինի, որից հետո յուրաքանչյուրն իր անելիքը կհասկանա»,-եզրափակեց նա: Հավելենք, որ երեկ հայտարարվեց մայիսի 18-ից նաև առևտրի իրականացման վայրերը վերաբացելու մասին:

ԱՆՆԱ ԲԱԴԱԼՅԱՆ