«Թի­թե­ռի կյանք ունե­ցող թե­մա­ներ են քննարկ­վում, բայց տպա­վո­րու­թյուն է, թե ամե­նա­կա­րև­որ­նե­րի հար­ցում զգո­նու­թյու­նը կորց­րել ենք»․ «Փաստ»

«Փաստ» օրաթերթը գրում է

Ադրբեջանի լայնածավալ ռազմական զորավարժություններին անդրադարձել է նաև Հայաստանի պաշտպանության նախարարությունը՝ դատապարտելով Ադրբեջանի կողմից տարածաշրջանում անվտանգային միջավայրը սրող զորավարժության անցկացումը: Մինչ այդ՝ ադրբեջանական մարտական հենակետերից խոշոր տրամաչափի զենքերից Տավուշի մարզի Բերքաբեր գյուղի ուղղությամբ էին կրակել՝ վնասելով բնակելի տներ։

«Ելնելով նրանից, որ Հայաստանի արտաքին քաղաքականության վեկտորի որոշակի փոփոխություն կա, Ադրբեջանը փորձում է որոշ դիվիդենտներ շահել: Ադրբեջանը փորձում է այդ հանգամանքից իր օգուտները քաղել: Լավրովի հայտարարությունից հետո, որը ես սադրիչ հայտարարություն եմ համարում, Ադրբեջանը գործի դրեց իր մեդիա քարոզչությունը՝ հասկանալով, որ կարող է որոշակի ազդեցություն ունենալ Հայաստանի ներքաղաքական տրամադրությունների վրա: 

Ես մի առիթով էլի եմ ասել, որ Ալիևն իր քայլերով ու հայտարարություններով փորձ է անում ազդել Հայաստանի ներքաղաքական կյանքի վրա: Մեր հասարակությունը պետք է զգույշ լինի այս առումով, և դրսից եկող բոլոր ինֆորմացիաները հալած յուղի տեղ չընդունի»,-«Փաստի» հետ զրույցում ասաց ռազմական փորձագետ Կարեն Հովհաննիսյանը՝ շեշտելով, որ միևնույն ժամանակ պետք է զգոն լինել ու, որպես ազգ, բանակցողներին պարտադրել մեր պայմանները:

«Բացի քարոզչական բումից, վերոնշյալ հայտարարությունից հետո Ադրբեջանը փորձ արեց նաև սահմանին լարվածություն մտցնել: Ի դեպ՝ այդ լարվածությունը բավականին տարբերվում է նախորդ տարիներին գրանցված նման միջադեպերից ու լարվածության պահերից: Վերջին տարիներին սահմանը վերազինված է նաև տեսանկարահանող սարքերով, ու, չնայած դրան, նրանք Տավուշի մարզում դիվերսիոն ներթափանցման փորձ արեցին, սկսեցին կրակել նաև խաղաղ բնակչության ուղղությամբ՝ այս անգամ արդեն խոշոր տրամաչափի զենքերով: 

Ադրբեջանը փորձում է լարվածություն մտցնել, միևնույն ժամանակ սադրել, որ մենք պատասխան գործողություններով հանդես գանք»,-ասաց մեր զրուցակիցը: Ինչ վերաբերում է վերոնշյալ զորավարժություններին, Կարեն Հովհաննիսյանը նշեց, որ իր համար դրանք սպասելի էին՝ հաշվի առնելով Ադրբեջանի ներքաղաքական ու սոցիալական իրավիճակը:

«Ադրբեջանի ներքաղաքական կյանքը, կարծես, դուրս է գալիս վերահսկողությունից: Ադրբեջանում բավականին զգայուն են դարձել սոցիալական խնդիրները, ինչը պայմանավորված է թագավարակով: 

Տնտեսության մեջ որոշակի բացասական էլեմենտներ կան: Սոցիալական բունտը թափ է առնում, իսկ Ադրբեջանի իշխանությունը պետք է փորձի շեղել բնակչությանը, և միակ ճանապարհը «հայրենասիրական պոռթկումներն» են, որոնք պետք է դրսևորվեն սահմանին՝ ռազմական գործողությունների տեսքով: 

Չորս օր տևող զորավարժությունների մասին խոսելով՝ օգտագործում են «քառօրյա» բառը, որն ասոցացվում է պատերազմի հետ: Այդպիսով ուզում են ենթագիտակցորեն ազդել իրենց բնակչության վրա՝ փորձելով շեղել հիմնական սոցիալական բունտից»,-նշեց նա:

Խոսելով Ադրբեջանի ներկայիս հռետորաբանությունից, զորավարժության անցկացման վերաբերյալ հնչեցրած հայտարարության բնույթից՝ Կ. Հովհաննիսյանը նշեց, որ ադրբեջանական կողմը, մեծ հաշվով, սադրում է, որ հայկական կողմը որոշակի գործողության գնա, որ միջազգային հանրությանը ցույց տան, թե իբրև Հայաստանն է ագրեսորը, ու իրենք փորձում ենք պաշտպանվել Հայաստանից:

Կարեն Հովհաննիսյանը հավելեց՝ ընդհանուր առմամբ, մեր պաշտպանության նախարարությունը ուշիուշով հետևում է գործողություններին, տիրապետում է ամբողջ իրավիճակին, ժամանակին հայտնաբերում և չեզոքացնում է վտանգը:

«Այս առումով մենք որևէ խնդիր չունենք: Բայց հասարակության առումով խնդիր կա: Մեր հասարակությունը, կարծես, մոռացել է, թե մենք որտեղ ենք ապրում ու մեր հարևաններն ովքեր են: 

Ամեն օր թիթեռի կյանք ունեցող թեմաներ են քննարկվում, բայց տպավորություն է, թե ամենակարևոր թեմաների հարցում զգոնությունը կորցրել ենք: 

Երբեմն տպավորություն է ստեղծվում, թե մարդկանց չի հետաքրքրում, թե աշխարհաքաղաքական իմաստով ինչ է կատարվում Հայաստան-Ադրբեջան հարաբերություններում»,ասաց նա՝ ընդգծելով, որ, մյուս կողմից, որոշ շրջանակներ փորձում են ադրբեջանական հատվածից եկող ինֆորմացիան հալած յուղի տեղ մատուցել հասարակությանը:

«Ցանկացած իշխանության ժամանակ պետք է հստակ իմանանք հետևյալը. Ադրբեջանից եկող ինֆորմացիան մեզ համար նաև խիստ կասկածելի պետք է լինի: Ներքաղաքական հակասությունների ժամանակ այն չպետք է օգտագործենք միմյանց դեմ: Դա անընդունելի է»,-ընդգծեց մեր զրուցակիցը:

Նա նկատեց՝ մեր հասարակությունը բավականին զգայուն է բանակցային գործընթացի նկատմամբ. 

«Հիմա գաղտնիության լույսի ներքո մեր իշխանությունները չեն բացահայտում, թե իրականում ինչ է տեղի ունենում: 

Բայց, հաշվի առնելով հայտարարությունների բառապաշարը, որոշ հայտարարությունների էլեմենտներ, տպավորություն եմ ստանում, որ, համենայն դեպս, ոչ հայանպաստ ճանապարհով չենք գնում կամ էլ չենք բանակցում»:

Մանրամասները՝ «Փաստ» օրաթերթի այսօրվա համարում