Հիվանդանոցներում տեղ չլինելու պարագայում ստիպված ենք լինելու վերադառնալ տոտալ լոքդաունի. Փաշինյան

ՀՀ վարչապետ Նիկոլ Փաշինայնը «Ֆեյսբուք» սոցիալական ցանցի իր էջում ուղիղ միացման ժամանակ քաղաքացիներին հորդորեց հետևել անվտանգության կանոններին՝ վարակվելու հավանականությունը նվազեցնելու համար: Նա նշեց, որ երկրում կան հազարավոր մարդիկ, որոնք ախտանիշներ չունեն, բայց, կանխարգելիչ միջոցառումներ չձեռնարկելով, կարող են վարակել իրենց շրջապատին:

«Որքան շատ է վարակվածների թիվը, այնքան շատ է ծանր և առանձնապես ծանր հիվանդների թիվը, մահացությունների թիվը ևս ավելանում է: Մեր առողջապահական համակարգի հզորությունը մեծացել է, շարունակում է մեծանա, սակայն, եթե ծանր դեպքերը շատանան, ապա հիվանդանոցներում տեղ չի լինի: Նման դեպքերում մենք ստիպված ենք լինելու վերադառանալ տոտալ լոքդաունի, կյանքը կանգնելու է իր բոլոր տնտեսական ու սոցիալական հետևանքներով»,- «Արմենպրես»-ի փոխանցմամբ՝ ասաց Նիկոլ Փաշինյանը:

ՀՀ վարչապետը նշեց, որ նույնիսկ դա խնդրի լուծում չէ, որովհետև աշխարհում, նույնիսկ զրո ցուցանիշով երկրում կորոնավիրուսը շարունակում է գոյություն ունենալ: Երբ ամբողջական արգելափակումը բացվում է, վարակը սկսում է նորից տարածվել: Այդ դեպքում նոր արգելափակման մասին հայտարարելու հավանականություն է առաջանում:

«Այս պարագայում խնդիրն այն է, որ ունքը սարքելու տեղը, աչքն էլ ենք հանում: Մի կողմից կորոնավիորւսի հարցը չենք լուծում, մյուս կողմից սոցիալական, տնտեսական լուրջ խնդրի առաջ ենք կանգնում: Լավագույն լուծումն այն է, որ ասիմպտոմ դեպքերը շատ լինեն»,-ասաց վարչապետը: Նրա խոսքով, դրանից բացի կարևոր է, որ իրավիճակն այնպես կառավարելի պահել, որ բուժման կարիք ունեցող հիվանդները կարողանան պատշաճ բուժօգնություն ստանալ: Հայաստանում վերջին շրջանում օրական գրանցվում է 500-700 հիվանդ, ու եթե նրանց 5 տոկոսը ծանր է լինում, ապա արդեն առողջապահական համակարգը չի կարողանում սպասարկել: Ըստ Նիկոլ Փաշինյանի՝ մեծագույն խնդիրն այն է, որ  բուժման կարիք ունեցողների թիվը համապատասխանի հիվանդանոցային կարողությունների թվին:

Նիկոլ Փաշինյանը ներկայացրեց հունիսի 1-ի դրությամբ հանրապետությունում ընդհանուր մահերի վիճակագրությունը՝ համեմատելով նախորդ տարվա նույն ժամանակահատվածի հետ: Ըստ վիճակագրության՝ 2020 թվականի հունիսի 1-ի դրությամբ ունենք մի քանի հարյուրով ավելի պակաս մահ, քան 2019 թվականի հունիսի 1-ի դրությամբ: Նախորդ տարի քաղցկեղից հունիսի 1-ի դրությամբ մահացել է 2 հազար 307 մարդ, այս տարի նույն ժամանակահատվածում 2 հազար 213 մարդ: Ըստ Նիկոլ Փաշինյանի՝ բացատրությունն այն է, որ այս տարվա առաջին վեց ամիսներին քաղցկեղից պոտենցիալ մահացողների բավական մեծ տոկոսի դեպքում կորոնավիրուսը թույլ չի տվել, որ քաղցկեղը դառնա մահվան պատճառ, ինքն է դարձել մահվան պատճառ:

«Նույնն էլ շնչառական հիվանդությունների պարագայում է: Նախորդ տարի հունիսի 1-ի դրությամբ այդ հիվանդություններից մահացել է 1448 մարդ, այս տարի 1062 մարդ: Այսինքն՝ մոտավոր 400-ով պակաս մարդ է մահացել շնչառական հիվանդություններից: Պատճառն այն է, որ այս հիվանդություններից մահացողների պոտենցիալ թիվը մեծ հավանականությամբ կմահանար հենց այս հիվանդություններից, սակայն կորոնավիրուսը թույլ չի տվել,որ այդ հիվանդություններից մահանա, մի մասի դեպքում ինքն է դարձել մահվան պատճառ: Ես ուզում եմ ձեր ուշադրությունը հրավիրել ընդհանուր 400-ով պակաս մահացության թվի վրա: Կորոնավիրուսի պատճառով այս հիվանդություններով հիվանդ մարդն ավելի շուտ է հոսպիտալացվել, ինտենսիվ է բուժում ստացել, իր վիճակն ավելի լավացել է, թեթևացել է, դրա համար էլ 400-ով պակաս մահ ունենք: Մոտավոր նույն պատկերն է այլ հիվանդությունների մահացության ցուցանիշում: Վիճակագրությունը ցույց է տալիս, որ ընթացիկ տարվա հունիսի 1-ի դրությամբ տարբեր հիվանդություններից մահացության ավելի լավ ցուցանիշ ունենք, քան 2019 թվականին»,-ասաց Նիկոլ Փաշինյանն՝ ընդգծելով, որ այլ հիվանդությունների դեպքում առողջապահական համակարգն ունի ժամանակ արձագանքելու, իսկ կորոնավիրուսի դեպքում այդ ժամանակը չկա: Անվտանգության կանոնները չպահելով՝ կմեծանա վարակվածության, ծանր և առավել ծանր դեպքերի, հետևաբար նաև մահերի թիվը:

«Մեր այսօրվա հիմնական խնդիրն այն է, որ կորոնավիրուսով հիվանդացած անձանց կարողանանք պատշաճ բուժօգնություն ցույց տալ: Այսինքն, բուժօգնության կարիք ունեցող պացիետների թիվը լինի այնքան, որ մեր հիվանդանոցներում եղած տեղերի թիվը բավարարի: Հակառակ պարագայում մահացության ցուցանիշն աճելու է: Սրա համար մի ձև կա այդ խնդիրը լուծելու, պետք է մեր կողմից ուրիշներին վարակելու հավանականությունը քչացնենք: Սա վերաբերում է բոլորին»,-նշեց Նիկոլ Փաշինյանը: