«Այդ գոր­ծի­քա­կազ­մը վաղ թե ուշ իրենց դեմ է աշ­խա­տե­լու»

Յուրաքանչյուր ժողովրդավարական երկրի համար ամենակարևոր խնդիրներից մեկը քաղաքական հետապնդումների և քաղբանտարկյալների բացառումն է: Փաստաբան Լուսինե Սահակյանի պնդումն է, որը նշվածին զուգահեռ հիշեցնում է նաև ներկայիս իշխանության՝ նախկինում արված հայտարարությունները:

«Մինչ իշխանությունը ստանձնելն այս իշխանության ներկայացուցիչները, հատկապես Նիկոլ Փաշինյանը, բարձր գոռում էին այն մասին, որ Հայաստանում քաղբանտարկյալներ կան, և հիմա, կարծես, նման հետապնդումներ չպետք է լինեին: 

Սակայն կյանքն այլ պատկեր ցույց տվեց. իրականում իշխանության առաջին իսկ օրվանից այս իշխանությունները սկսեցին քաղաքական հետապնդումներ իրականացնել: Քրեական գործերի, առաջադրված մեղադրանքների հետևում հիմնականում քաղաքական ենթատեքստ էր թաքնված:

 Եվ մենք տեսանք, որ իրենց քաղաքական հակառակորդների նկատմամբ ճնշումները հասան նաև դատական համակարգին:

 Ես չեմ ցանկանում դատական համակարգը տարանջատել իրենց քաղաքական հակառակորդներից, որովհետև իրենց քաղաքական հակառակորդներից, անգամ հնարավոր քաղաքական հակառակորդներից ձերբազատվելու համար տարբեր քրեական գործեր հարուցվեցին, որոնք հասան դատարաններ, որ դատարաններն անձանց ազատությունից զրկեն ու հետապնդումները շարունակվեն»,-«Փաստի» հետ զրույցում ասաց Լ. Սահակյանը:

Փաստաբանը հավելեց՝ այն դեպքերում, երբ դատարանները հրաժարվեցին քաղաքական պատվերներ կատարել, և օրինական լուծումներ տրվեցին, հետապնդումներ սկսեցին արդեն դատարանների նկատմամբ. 

«Այսքան բացահայտ հետապնդումներ երբեք ոչ մի իշխանության օրոք չեն եղել: 

Իրենք անգամ չեն թաքցնում, որ իրականում հետապնդում են իրականացնում: Իրենք անգամ մինչ գործը սկսելը, մինչև մեղադրանքներ առաջադրելն են հայտարարում այդ մասին: 

Ընդ որում, փորձում են ժողովրդի հետևում թաքնվել՝ ներկայացնելով դա որպես ժողովրդի պահանջ: Եթե կա այնպիսի ժողովուրդ, որը ցանկանում է՝ անձինք հետապնդվեն իրենց քաղաքական նկատառումներից ելնելով, սա նույնպես երկրի խնդիրն է: Եթե իշխանությունն իսկապես ցանկանում է երկիր կառուցել, չպետք է ենթարկվի ժողովրդի ապօրինի պահանջներին, եթե, իհարկե, դա իրականում ժողովրդի պահանջն է: Նման բան իրականում չկա»:

Լուսինե Սահակյանը նշեց, որ այս ընթացքում իշխանություններն անգամ փորձ չարեցին, որ բացառվեն քաղաքական հետապնդումները:

«Եվ հիմա շատ ավելի է սրվել իրավիճակը, որովհետև մինչ այդ, կարծես, հակառակ բևեռում լուրջ պայքար չէինք տեսնում: Վերջին օրերի զարգացումները ցույց տվեցին, որ արդեն ձևավորվել են որոշակի ուժեր, որոնք այլևս չեն կարողանում հանդուրժել իրավիճակը: 

Արդեն, կարծես թե, քաղաքական լուրջ պայքար է սկսվում, ու այս պայմաններում տեսնում ենք, որ ակտիվացան նաև հետապնդումները: Երևում է նաև ապագան՝ հաշվի առնելով, որ ուժային կառույցների ղեկավարներ փոխվեցին: Ավելին, տեսանք, որ նույնիսկ դռնփակ դատական նիստերի դատավճիռներ հրապարակվեցին, ինչն իրավական երկրում անթույլատրելի է: 

Առհասարակ, ակնհայտ է ուղղությունը. ցանկացած դեպքում, երբ անձը հայտարարում է հակառակ դիրքորոշման մասին, ընդ որում, որքան ավելի լուրջ է հայտարարում, հետապնդումներն առավել ակնհայտ են դառնում: 

Հաշվի առնելով առկա զարգացումները՝ սա ավելի քան ակնառու է: Բացի այդ, մենք որոշակի ինֆորմացիա ունենք, ըստ որի՝ այդ հետապնդումները սպասվում են նաև ապագայում»,-ընդգծեց մեր զրուցակիցը՝ նշելով, որ շատ ավելի լուրջ քրեական հետապնդումներ են սպասվում:

«Յուրաքանչյուր իշխանություն պետք է հասկանա, որ երբ բացում է պանդորայի արկղը, դա վտանգ է բոլորի համար: Իրենք պետք է հասկանան, որ երբ սկսում են այդ գործիքակազմով աշխատել, բնականաբար, այն վաղ թե ուշ իրենց դեմ է աշխատելու: Ավելին՝ համակարգում կան մարդիկ, որոնք այդ գործիքակազմն աններելի են համարում: Իշխանությունները պետք է հասկանան, որ իրենց հենարաններն էլ են կորցնում նման գործելաոճով. ինչ-որ անձանց բերել, ինչ-որ կառույցների ղեկավար նշանակել ու հուսալ, որ այդ կառույցներն ամբողջ ծավալով իրենց պատվերը կատարելու են, ճիշտ չէ. այդ կառույցներն էլ են վաղ թե ուշ սկսելու իրենց դեմ աշխատել: 

Կան երևույթներ, որոնք փաստում են, որ մարդիկ ուղղակի պատրաստ չեն պատվերներ կատարել ու հեռանալու դիմումներ են գրում: Մի մասն էլ չի հեռանում, բայց իշխանությունների դեմ որոշակի բացասական կարծիք է կուտակվում, որոնք ինչ-որ մի պահի կարող են գործողությունների վերածվել: 

Բայց այս ամենից զատ՝ իրենք միշտ պետք է հիշեն, որ անվերջ իշխանության չեն լինելու, ու երբ պետության ուղին են փոխում, կատարում են գործողություններ, որոնք վաղ թե ուշ հանգեցնելու են պետություն կորցնելուն, դա ևս իրենց դեմ է աշխատելու: 

Ավելին, եթե անգամ հետո իշխանությունները փոխվեն, այդ նույն մեքենայի տակ իրենք են ընկնելու: Պետք է հասկանալ, որ սա անթույլատրելի է, և սա պետք է հասկանա նաև ժողովուրդը. կան գործիքակազմեր, որոնք ոչ մի դեպքում չի կարելի օգտագործել»,-եզրափակեց փաստաբանը:

ԱՆՆԱ ԲԱԴԱԼՅԱՆ