Ցայտնոտային պայմանները, ռուսաց լեզվի «իներցիան» և մասնագիտական կողմնորոշման գերակայությունը

Գնահատման և թեստավորման կենտրոնի մամուլի քարտուղար Խաչանուշ Գրիգորյանը «Փաստի» հետ զրույցում անդրադարձել է ընդունելության քննությունների հայտում հանդիպած մի շարք խնդրահարույց հարցերի, որոնց պարզաբանման նպատակով թերթի խմբագրությանն էին դիմել դիմորդներն ու նրանց ծնողները:

Մնացել է նախկին իներցիայով

Եվ այսպես՝ ընդունելության հայտի մեջ, որտեղ ներկայացված է լեզուների ցանկը, նշվում է՝ «Հայոց լեզու», «Ռուսաց լեզու» և «Օտար լեզու»: Հարց է առաջանում՝ «Ռուսաց լեզուն» օտար լեզու չէ՞: Գրիգորյանը նշում է. «Ռուսաց լեզուն» օտար լեզու է, դա հստակ է, այն ներառվել է օտար լեզուների խմբի մեջ: Այն, որ առանձին-առանձին է գրվում «Ռուսաց լեզու» և «Օտար լեզու», հավանաբար մնացել է նախկին իներցիայով»,-«Փաստի» հետ զրույցում ասում է Գրիգորյանը:

Առաջացող խնդիրները չեն անդրադառնա դիմորդների վրա

Դիմորդը պետք է ընդունելության հայտում լրացնի պետական ավարտական քննությունների գնահատականները՝ նշելով դրանք 20-միավորանոց սանդղակով: Սակայն այս պարագայում կա մեկ այլ խնդիր՝ քոլեջների և միջին մասնագիտական հաստատությունների դեպքում ոչ թե գործում է 20-միավորանոց, այլ 10-միավորանոց բալային համակարգը: Այս դեպքում արդյո՞ք չենք ունենալու անարդարության հարց, և ինչպե՞ս պետք է կատարվեն հաշվարկները:

Խաչանուշ Գրիգորյանը նշում է՝ դրանք նշանակություն են ունենալու դիմորդների՝ հավասար միավորներ ունենալու դեպքում: «Հավասար միավորների դեպքում նոր նայելու են այդ գնահատականներին:

 Երբ դիմորդը, օրինակ՝ ներկայացնի 9 միավորը որպես առավելագույն միավոր, մրցույթի ժամանակ խնդիր չի առաջանա: Եթե դիմորդը բուհ է դիմում միջին մասնագիտական կրթությամբ, նշանակում է, որ մրցույթների ժամանակ արդեն հաշվի են առնելու գնահատման համակարգը: 

Այս տարվա արտակարգ պայմաններում ընդունելության մի քիչ ցայտնոտային պայմաններ ստացվեցին: Ընթացքում բազում խնդիրներ առաջացան, բայց դրանք հաստատ դիմորդների վրա չեն անդրադառնա: Հաշվի կառնեն բոլոր հարցերը»,-նշում է մեր զրուցակիցը:

Մասնագիտական կողմնորոշման առումով դա ավելի ճիշտ ու արդարացի է

Մյուս խնդիրը վերաբերում էր հետևյալին. երբ նախկինում դիմորդները դիմում էին բուհեր, հնարավորություն ունեին նախ դիմելու մի քանի բուհերի իրենց նախընտրած մասնագիտության անվճար տեղերի համար, այնուհետև նշում էին վճարովի տեղերը: 

Իսկ հիմա, երբ դիմորդն առաջին տողով դիմում է ցանկացած մասնագիտության անվճար տեղի համար և հետագայում իր միավորները չեն բավականացնում անվճարի համար, նա ավտոմատ կերպով սկսում է մասնակցել նույն մասնագիտության վճարովի տեղի պայքարին: Փաստորեն՝ այս տարի ԿԳՄՍ նախարարությունը փոխել է երկար տարիներ գործող կարգը: 

ԳԹԿ-ի մամուլի քարտուղարը նշում է՝ դիմորդն առաջին հերթին մասնակցում է առաջին հայտի մրցույթին, պահպանվում է առաջին հայտի գերակայության սկզբունքը: «Եթե միավորները չեն բավականացնում առաջին հայտի համար, դիմորդն ավտոմատ մասնակցում է նույն մասնագիտության վճարովի մրցույթին: 

Եթե այդ դեպքում էլ միավորները չեն բավականացնում, մասնակցում է արդեն հաջորդ հայտերով մասնագիտությունների մրցույթին այն դեպքում, եթե այդ մասնագիտությունների համար թափուր տեղեր կան:

 Առաջին հայտը գերակա է թե՛ անվճարի, թե՛ վճարովիի դեպքում, եթե անվճարի մրցույթից դուրս է մնում, դիմորդն ավտոմատ մասնակցում է վճարովիի մրցույթին, հաջորդիվ արդեն այլ մասնագիտությունների մրցույթներին, եթե կան թափուր տեղեր»,-ասում է մեր զրուցակիցը:

Մեր այն դիտարկմանը, որ նախկինում, օրինակ՝ ես, որպես դիմորդ, կարող էի մի քանի բուհերում նշել մասնագիտությունների անվճար տեղերը, իսկ հետո նոր վճարովիները, այժմ փոխվել է այդ կարգը և դիմորդն առաջին տողով մասնակցում է իր ընտրած մասնագիտության նախ անվճար, հետո արդեն վճարովի տեղի համար, որքանո՞վ է սա արդարացված մոտեցում, Գրիգորյանը պարզաբանում է՝ կատարված փոփոխությունը մասնագիտական կողմնորոշման առումով ավելի ռացիոնալ, օպտիմալ և արդար տարբերակ է: 

«Եթե դիմորդը որոշել է ընտրել կոնկրետ մասնագիտություն և չի ստացվում, որ նա անվճար ընդունվի, ավտոմատ մասնակցում է նույն մասնագիտության վճարովի մրցույթին: 

Առաջ այսպես էր՝ դիմորդը մասնակցում էր անվճար տեղերի մրցույթներին, առաջին հայտի գերակայությունն էր, հետո 2-րդ, 3-րդ, հետո շարունակությունը գալիս էին վճարովի տեղերը: Դիմորդը մասնակցում էր մրցույթներին այն դեպքում, երբ թափուր տեղեր էին լինում իր ցանկալի մասնագիտության համար: 

Հիմա փաստորեն վճարովի տեղերի համար էլ առաջին հայտի գերակայության սկզբունքը գործում է: Այսինքն՝ մարդը դիմում է որևէ անվճար տեղի համար, իր միավորները չեն հերիքում, եթե բավականացնում են նույն մասնագիտության վճարովի տեղի համար, նա մասնակցում է այդ մրցույթին: 

Այսինքն՝ առաջին հայտի գերակայությունը գործում է և՛ անվճարի, և՛ վճարովիի պարագայում, որովհետև մասնագիտական կողմնորոշման առումով դա ավելի ճիշտ ու արդարացի է»,-եզրափակում է Խաչանուշ Գրիգորյանը:

ԼՈՒՍԻՆԵ ԱՌԱՔԵԼՅԱՆ