ԱՄՆ-ը «Իսլամական պետության» կողմից Թուրքիային մատակարարվող նավթի քանակն աննշան է համարել

Վաշինգթոնում աննշան են համարել նավթի այն քանակությունը, որը մաքսանենգ ճանապարհով Թուրքիա է հասցվում «Իսլամական պետություն» ահաբեկչական կազմակերպության կողմից վերահսկվող տարածքներից: 

ԱՄՆ-ի Պետքարտուղարության էներգետիկայի հարցերով կոորդինատոր Ամոս Հոխսթեյնի խոսքով,  «մաքսանենգ նավթի քանակը շատ փոքր է ծավալների եւ ստացվող եկամուտների տեսանկյունից»:

Ամերիկացի փորձագետները ենթադրում են, որ ռմբակոծիչները զգալի վնաս են հասցրել նավթային ենթակառուցվածքին, որը Սիրիայում եւ Իրաքում իսլամիստ արմատականների վերահսկողության տակ է գտնվում, տեղեկացնում է  «Ինտերֆաքսը»:

ԱՄՆ-ում համարում են, որ Ռուսաստանի Պաշտպանության նախարարության լուսանկարները, որոնցում ցուցադրված են «Իսլամական պետություն» ահաբեկչական խմբավորման` նավթով բեռնված հարյուրավոր բեռնատարներ, իսկական են, սակայն միաժամանակ ենթադրում են, որ ավտոցիստեռններն ուղեւորվում էին ոչ թե Թուրքիա, այլ Սիրիայի այլ շրջաններ: Այդ մասին լրագրողներին հայտնել է ԱՄՆ-ի Պետքարտուղարության բարձրաստիճան ներկայացուցիչը: 

«Սա ավտոցիստեռնների հերթ է, որոնք վերցնում են նավթը, հետո բաշխում են ամբողջ Սիրիայում… Ես առայժմ չեմ տեսել ավտոցիստեռններով սահմանային անցումներ, որ ցիստեռններն անցնեն սահմանը, չեմ կարծում, թե նման լուսանկարներ կան», — ասել է Պետքարտուղարության ներկայացուցիչը, տեղեկացնում է «ՌԻԱ Նովոստին»:

Ավելի վաղ ՌԴ ՌՈՒ Գլխավոր շտաբի գլխավոր վարչության պետ Սերգեյ Ռուդսկոյը հայտնել էր, որ Թուրքիայի հետ Սիրիայի սահմանն անցնելուց հետո  «Իսլամական պետության» բենզատարներն ուղեւորվում են նավահանգիստներ եւ նավերով ճանապարհ են ընկնում դեպի երրորդ երկրներ` նավթի վերամշակման համար: Որպես ապացույց, ՌԴ Պաշտպանության նախարարությունը արբանյակային լուսանկարներ է ներկայացրել: